Read Lamnso Aysaya 48 Bible Online

Aysaya 48 - Lamnso bible

Aysaya 48

¹Ven vee rám Jakov, vèn yuúrí kin ki. Vèn yuúrí, ven ve á yoŋ e meŋkfəm ji Isray, ven vin ve dzəə̀n rám Juda. Vèn dzə̀ kén wír, aá lóo yiì kilìʼ, á wàa kàn a dzə̀ yír NYÙY TÀR, a vèn naarì vitú vén ji á ghvə́m Nyùy wìr veé Isray. Yii bèy, vèn kù ghvə́m wun a dzə̀ fó shuù, a bó vèn yòʼ tíy rú e wun wùn.

²Vèn yoŋ vitú vén ji wír veé ŋkàlaʼ ye dzəə̀n ye Nyùy, yoŋ ji vèn kù yoy, tiir a dzə̀ e Nyùy wìr veé Isray wùn. Wun wo yír rəə́ dzəə̀n ji NYÙY TÀR woo Taà Mànjòŋ.

³Á bèy, vèn yuúrí ri ke wù suuy e vèn kí. «Mò‑oò yoòyí vinyo ve ví‑iì dzəə́ wìy a koóy, a m kù‑uù sí yoóyi fo yàŋgùʼ, yii, a wíri kiiyì. M lo, m kù nèn sàsìn, e yiì vinyo vìn, ví kòóy réŋréŋ.

⁴Mò‑oò yii bèy, kù kiiy ji vèn tàv á kitú feyì, a bó vèn yòʼ yíi a yu kinyo. Vèn dzə̀ rú ben, a kitú kén ke tavín kí yòʼ dzə̀ é kirə̀ʼ, kiguynìn kén kí dzə̀, a kí kóʼ bam.

⁵Bìʼ bey, mò‑oò yoòyí ne vinyo vìn fo yàŋgùʼ, e yiì, vèn kiíy, é bo ví wìy a koóy. Mò‑oò yii bèy, fo vèn wáa yòŋ jii, kù yiì a anyùy ve vèn ghvə́mé, é bo vinyo vìn vi wáa koóy. Kù yiì a mebvə̀m me á semen, à me á tònèn é kilàm mè, é bo vinyo vìn vi wáa koóy.

⁶«Vèn yù ne, e kfə̀n yèn vinyo vìn vidzə̀m ve mò‑oò naàrìn ji ví wíy a koóy. A dzə̀ la vèn yòʼ a fìʼtì ji á mo kí kooyin a? Kèʼ fo lèn, m lo, e naàrì ven vinyo ve fíy vímóʼ ví ve vèn yòʼ kiìn, vinyo ve ví‑iì dzəə̀n é kilìtì vímóʼ ví ve vèn yòʼ‑oò ghàn kìíy.

⁷M kù lo lèn, e yiì vinyo vímóʼ ví ve ví yòʼ‑oò ghàn ne a dzə. Vinyo, a vèn yòʼ‑oò ghàn yù vee bey. Mò‑oò litì fo wìr wìy a dzə̀v nsaŋ jii, ‹Mò‑oò kìíy ne vinyo vìn.›

⁸Aày, bó vèn yòʼ‑oò ghàn ne kìíy vinyo vìn, kìn ji vèn yú yuún. Á yòʼ‑oò ghàn ne feèsí vituʼùr vén, ye vèn yú vinyo vìn. Mò‑oò kìíy ne jii, aá dìn kinyo e vèn, bo vèn kù yíi kfən ji alá fó fèn, e là fó fèsə. Vèn kù‑uù sí tsə́y kóy vèsən, e kèʼ mo mò‑oò yìyìn ven ji kitúm.

⁹«Yii bèy, bìʼ viwìr vém, m yòʼ‑óò táv, e lòvtí e vèn mo dòʼshwíiy wom dzəə̀n. M kù‑úù kfə́mén, bìʼ búrí ye á kù wíy a burí mo, a m yii bèy, ji fo m laar ven láarin.

¹⁰Vèn leéy, e yèn, mò‑oò sí sheŋrì ven, yii bèy, a bó m yòʼ‑oò sheŋrì a dzə̀ e və́yí, mo wìr shèŋrì kisha ke mbàm ke fəvír kí. Mò‑oò lì a dzə̀ ŋgeʼ, a shèŋrì ven shó mo á shèŋrì kisha e kǐŋ kilàm.

¹¹M kù wíy bòyìr ven, a dzə̀ bìʼ yír yém cáʼ, fo wìr wáa tàʼ kinyè kém ntéŋ. A dzə̀ m ghàn é le, e bóo màʼtì, aá wáa bivír yír yém? Bó yòʼ dzə̀ m biìmé féyì ji búrí ye kì yíi a dzə yémé du e wìr wo sən.»

¹²«Ven vee rám Jakov, vèn yuúrí. Ven vee wír veé Isray ve m shoʼon, vèn yuúrí. Kù mày mo Nyùy, a kù‑uù dzə̀ mo, e kèʼ fo kèʼ, a kù wíy a dzə mo, e dù, e jòʼsì.

¹³Yì‑iì wày mo kinsə̀ŋ ke nsay e wó yémé, e sàŋrì yúv e kiwó kém ké yìy kí. M tooy vifá vìn, ví nànèn é yuv ghàn mòʼón.

¹⁴Vèn báʼtí adzə̀m, e yuùrí. Shibvə̀m shi dzə̀ shó she shí‑iì ghàn ne yoòyí kinyo kìn a? Kinyo kee jii, m koŋ ŋgaà lìm wo m shoʼon, a wù wíy yiì vinyo vidzə̀m ve m wayin ji wù yii e Babilon. Wù wíy tòn fó, e taʼár áwune vee wír veé Kaldea táʼárín.

¹⁵Mómò, kù‑uù yòŋ mo kinyo kìn fo ghan, a kù jàŋ mo wun. Tsə̀ə́r mo wun e shùu lìm fèn, a m yíi yiì, é kinyo ke m taʼ ji wù yii kí ghán kijuŋ.

¹⁶Vèn kóʼtí e mǒ mentsə̀m, e yuùrí kinyo ke m suuy ki. Kèʼ fo kèʼ, bó m yòʼ‑oò lò a suúy kinyo e kilìr. Vinyo ve mò‑oò yòŋèn ví‑iì lo, ví wàa koóy, a m kù dzə̀ fó si.» Á mo NYÙY TÀR suuyin. Ké lèn ki, NYÙY TÀR woo Taà Ndzə tsə̀nsí ne mo ji m yii lim rə́, e fò mo Kiyoy kfə́.

¹⁷NYÙY TÀR wo wù boyìr ven, wun woo Ŋgaà wo Ranén woó Isray suuy jii: «Dzə̀ mo NYÙY TÀR woo Nyùy won. Kù yéʼey mo ven kinyo ke kí yíi sə ven, a kù danèr mo ven mo vèn wáa shoʼ kiwuú kén.

¹⁸Wìr ku lì ji vèn‑eè lo yuùrí kém, e yùnín nsər yem, bo vèn kì yíi a dzə dzə́ yee nyaáŋ, é yí wáa dzə, kù moo ndzə́v ye yí léŋ là meemè, é yii yén ye réŋé wáa dù fo mbìy, moo rìbà ndzə̀v wo wù kiy wún ghán sidzə̀m.

¹⁹Kiŋgoòy kén kí kì yíi a sen senén, moo síy seé ghaa rìbà ndzə̀v, é rám yéné wáa dzə nyanyày, a bó m yòʼ‑oò yíi màʼtì ji kitúm ki ton ven, é yír yéné wìy lày.»

²⁰Vèn lo cér fo kitum kee Babilon, a kfən. Vèn wáa leʼ cér fo wòŋ wìr veé Kaldea fèn. Vèn wáa fìʼtì ntum rə̀n e wíri é ŋgèŋgèr, lóo tiisí, vèn wàa ndzəʼ e kishéʼrì ki. Vèn wáa fìʼtì vitóŋtóŋ vé ndzə vidzə̀m, a suúy jii, «NYÙY TÀR tìn ne aŋgaà və́ lìm vee rám Jakov fo vikwàn.»

²¹Wù‑uù dànèr áwune, e tòsín wóʼ shó, a kilòŋ kí yòʼ‑oò lo yùm áwune. Wù‑uù yiì, ndzə́ví wáa fəə fo kilan, áwune wáa no, e wàʼ kilán, ndzə́ví wáa mee fo fo.

²²Yii bèy, NYÙY TÀR suuy jii, «Wìr wo wù méŋ mo yòʼ kér nyaáŋ.»