Read Lamnso Aysaya 5 Bible Online

Aysaya 5 - Lamnso bible

Aysaya 5

¹Vèn yuúrí, é m tórí yòv e ŋgaà ŋkòŋmé wóm kiliŋ. Yòv kikòŋnìn ke ŋgaà ŋkòŋmé wom wùn à súm və́ vitiír vé *vayine. Ŋgaà ŋkòŋmé wom‑eè kér súm vitiír vé vayin, súm, a wú dzə̀ a dzə̀ é gwan, a nsay yee fó dzə̀ nsay vifa.

²Wù‑uù kóm súm woo shooy, fəər tíy fó fo, e nèn bìy vitiír vé vayin sho, a mbìy sidzə̀m si kù dzə̀ se shavín sí. Wù‑uù bòm kitaàtì ke ŋgaà shìy wáa dzə sho e kintìntìn ke sum, e bùʼ bií é kilan, wo á wáa kòy báŋ se vitiír, a nyèŋ sho. Wù yiì vinyo vìn, a shìy ji vitiír ví koóm á báŋ se juŋ si, yii bèy, ví ló fó fo, e kòóm, a kwayrí kwayrín.

³NYÙY TÀR woo ŋgaà sùm suúy jii, «Ké lèn ki, éè wìr ve á dzə́ e Jerusalem, éè wìr veé Juda, kii vèn, vèn tar ó ji lòné sà lò fo mò moo fo mǒ súm vitiír á?

⁴Kifá ke a yì‑iì dzə̀ á yiì e mǒ súm vitiír ke m yoʼ yiì ki dzə̀ ka? Yiì ka, é bo m wáa shìy ji m yíi kav báŋ se juŋ si fó fo, é lo kòóm vintùʼ, a ví kwáyri kwàyrín.

⁵Ké lèn ki, vèn maʼti, é m suúy kinyo ke m lo, e yiì e súm wóm və́ne. M lo, e gwàr vinyáʼnyaʼ fó wǔn kày, gwarì, é m saʼ virə́v vé kày vidzə̀m, é nyám si fiʼ nə̀ə́ sho, e ndzə̀ə́y kifá kidzə̀m fo fo, ndzəəyì, é sí nyeŋ súm, é wú kfə́n é ŋgèŋgèr.

⁶M yíi màʼtì, é súm və́ne kwiíy, e rə̀ŋsìn. Wìr yòʼ yíi a kom, kìn ji wù wáa naŋsín vitiír vee fó. Vimbìn wùn à vicí vé njoŋ vi kù yíi sə fó səə́n, é m kfən tìír mbàʼ, fo yì yii, é wuú wáa lo fo.»

⁷Rúrú, súm vitiír və́ne dzə̀ ji kitúm kee Isray, kitúm ke NYÙY TÀR woo Taà Mànjòŋ. Wír veé Judàa wáa dzə vitiír ve wù shavin, a geʼsín sho, a leéy ji á wáa dzə, a yiì vinyo vee tìítiy, yii bèy, ku fəə̀ kinjuyrì. Wù leey ji á wáa yiì vinyo vee réŋ ví, yii bèy, ku kòʼ tóŋ sə́moó, bìʼ táy ye á táy wíri.

⁸Lòné dzə̀ wó wìr ve á taʼ kifàʼ ke lav, taʼ ké sum, kù koó súm sí, du duùn. Koó, a bó yòʼ dzə̀ wìr wùmòʼ kfə̀n kòóy shinsàn. Vèn jwe, ven vee aŋgàa mbàm, vèn koó nsay bèy, koó ji vèn fíʼ a dzə sho ven ven.

⁹M yù ne, a NYÙY TÀR woo Taà Mànjòŋ suuy kiránén, liʼ jii, «Rúrú, lav se vé kifàʼa kùvrìn sin si yíi kfən e vifə̀m, é lav se á bomen sikuʼkìn, a sí kiʼ sijuŋ si kú a tiynín kisáŋ kisáŋ.

¹⁰Á wíy nəə́ e súm vitiír vé vayin, a wú néŋ bèn ji moòr, kám báŋ se vitiír vee fó, é ku fəə̀ joŋ e mòʼón cáʼ. Ké súm vifa ve yi, á li ŋgoòy saàr ŋkaà e ghvə̀m, wáy e nsay, wíy búʼú, é ku fəə̀ ŋkaà e mòʼón.»

¹¹Lòné dzə̀ wó wìr ve ndzə lóo kaʼ kaʼán, aá ló ne e yuv, lo e yuv, kév kí kù a dzə ji á ku sù sí e bàr shilùʼ, e kù a no bèy, e meé mo yúví yíi koŋrí, a meluʼ mè koó ne áwune, a bó fóo yèe yòʼ dzə̀ə́.

¹²Áwune du fo ŋkàʼ, á kù a yu kinyo ji lúŋ yee rəy wùn à yé nshìí, e bóo lì nshùm wùn à loŋ ye toŋén, aá kù sí nó meluʼ, sev sèvìn. Aáwune yii bèy, e làa yòʼ dzə́ə a gwàrìr lím NYÙY TÀR, e bóo jòkìnyàʼ, a rə̀m ji Nyùy sà lim vinyo vìn e wó rəə́ e le á.

¹³Bìʼ bey, á yíi koorí wír vém, e dù sho e kwaʼ nsàm, aá koóri áwune, bìʼ fo á yòʼ gwarìr lím NYÙY TÀR. Jìŋ yíi a kom vitó ve kfə́m sé wìr sév komén, é wír ve áwune sáʼáa wáa kpu kilòŋ ke yumén kí.

¹⁴Wóŋ aŋkfəə wíy mvə̀ʼ shuu, e lèm e rə́, é wíri wáa kpukír nyanyày, a nsay kù sí yíkir yìkín, là meemè. Wìr dzə̀m kù wíy a sheemé aàŋkfəə́ wòŋ, à fòn, à kwàné, e lì wir dzə̀m wo wù kóʼor kiyor, yú vijuŋ ve Jerusalem.

¹⁵Á wíy sèn wir dzə̀m, a dzəə̀ ye wìr kóʼór kitú kfə́ yòʼ kfə̀n wíy a dzə. NYÙY TÀR wíy sèn wír wo wù li kitú kfə́ ji Nyùybomkpù.

¹⁶NYÙY TÀR woo Taà Mànjòŋ wíy tinén nsaʼ wìr və́ mo yì dzəə̀n, tínenè, aá bínsí ji wù dzə̀ á feyì e gháʼtín. Wun woo Nyùy wo ranén wíy lòo neèr vinyo a dzə̀ ve ru ví, aá yén rú ji wù dzə̀ á e ránén, tíy jeéy fo wìr msòŋ.

¹⁷Ŋkàlaʼ yev wíy kfən ji kirə́ʼ kee fo njiì wíy a ceè viŋgà é wùn, é wón nyàme[7] wìy a ghan, a bòn yí e wùn, e vifə̀m ve vé bùʼu màʼtìn.

¹⁸Lòné dzə̀ wó wìr ve á bóʼti vitú vév, lór vinyo ve bi ví é wùn mo á kùr áwune shó kurín áàkfə̀ə́. Áwune kù səŋ vinyo ve bi ví é wùn, kù moo ji á səŋ a dzə̀ e kfəə̀ nàʼ.

¹⁹Lòné dzə̀ wó wìr ve á nye lám jii, «NYÙY TÀR ku yiì o kinyo ke wù taʼ ji wun‑éè yii. Wù ku yiì rì cér, é vèr yén ó. Wun woo Ŋgaà wo Ranén woó Isray, wù ku lìm kinyo ke wù‑uù baʼtin, é vèr yén ó.»

²⁰Lòné dzə̀ wó wìr ve á bínsi kinyo ke bi kí bínsín ji ke juŋ ki, nyaysì ke juŋ ki nyáysin ji ke bi kí. Áwune yoŋ ndzə ye ranén ji vitsə́ʼ, yoŋ vitsə́ʼ ji ndzə ye ranén. Wìr yén kifá ke shiʼirín kí, wù yòŋ ji ke nyomèn kí, yén ke nyomèn kí, wù yòŋ ji ke shiʼirín kí.

²¹Lòné dzə̀ wó wìr ve á kwaʼ ji á fìír, wír, aá kù yén a dzə̀ vitú vév ji afií.

²²Lòné dzə̀ sá wó amfoòkìnó. Wír, aá bìr é melùʼ mee bìŋrì, é wìr nó, a fə̀nkìr.

²³Lòné dzə̀ wó wìr ve á sə́ kòyàr, á bìn nsaʼ, e fò e ŋgaà jay, e nèn tòy wír wo wù yoʼ jày é kinyò, a lovtí sho.

²⁴Ŋgeʼ wíy laàr áwune mo və́yí laàr kisúsu ké saŋ, e to, e səʼsí áwune mo və́yí tò é kinshaàrì. Wír vìne wíy a dzə moo kicí ke gháŋé fòyìn ne, vibuushì ví dzə́ʼ moo kibvər. A kù dzə̀ bìʼ fo áwune ŋwayin ne ntir NYÙY TÀR woo Taà Mànjòŋ ŋwáyín, e nyàysì kinyo ke wun woo Ŋgaà wo Ranén woó Isray suuyì.

²⁵Bìʼ bey, NYÙY TÀR shwìíy ne kilòŋ wùn à wír vəə́. Wù‑uù nàn kóy və́ é yuv, e màʼ ŋgeʼlàʼ aáwuné kitu. Agwane‑eè səʼsì, a dzə́n sé wíri sí néŋnin e dzəə moo tóo nàʼ. Fə̀m mo vinyo vee shooy vi‑iì kooyin bey, NYÙY TÀR kù dzəə́ shwiiy kilòŋ wùn áwune, a wù dzə̀ kibáʼtín móo shaà fo mbìy, a dzə̀sì ŋgeʼlàʼ aáwuné kitu.

²⁶NYÙY TÀR wíy kùm toóy, e koʼór kisəəm é yuv é njà cícíwàr ji vitúm vi wáa yen, a wìy. Wù wíy toóy kitúm ke sàŋbóy, kù mo ŋgaà ŋwaʼ yoòyí yúu. Kù mo wù tooy vitúm vìn, àáy, á víne, aá liìn ne kiwuú é dzəə, a wìy e kileʼ ki.

²⁷Vé rər víne wiyì, a bó wìr mòʼón fo áwuné mvəm yoʼ dòr, e bó a bàyrìn, a bó wo wù yeʼè, kìn ji wù wáa buuné yòʼ dzə̀. Wìr fo áwuné mvəm wo kikuúví kí wèʼèn ne yòʼ dzə̀, a bó wo lábáʼ tinen ne yòʼ dzə̀.

²⁸Áwune sày ne mvən sév, e daà vinte vév, a shìy kifá ké a lov shíyin. Nyám sév sé ŋkoʼ si dzə̀, a wuú sí dzə̀ ji tíy, a kár sév sé *vitentén vé rər sí binkìr cércér moo kinsəm.

²⁹Áwune wíy wìy, é kiyor ki wáa koʼ, a koo mo nyamkìr bvərə̀ʼ. Kí wíy a koʼ, a koo moo wón bvərə̀ʼ ve á yú shilív, nyamkìrì, a beemé moo bvərə̀ʼ wo wù koon nyám, a nyàmkìr, e bóo lì, a dù sho, a bó yòʼ dzə̀ wìr faàsì.

³⁰Wíy lòo dzə e ghan fóo fèy, áàŋgàa vibàné wáa ghav e wír ve áwune kooné kitu, a ghav, é kí wáa koo mo yor rìbà ndzə̀v. Wíri binkìr, leey kitúm kév, aá yén, a kí sə́n ne sə́nén ji dzə̀v, a kù sì ŋgeʼ fo, a kibvər ki kóʼ e yuv é njà kikfəm ke mbàʼ, sə́ti sí shùy.