Read Lamnso Aysaya 50 Bible Online

Aysaya 50 - Lamnso bible

Aysaya 50

¹NYÙY TÀR nén a suŋnín, a suúy jii: «A fèn dzə̀ rú ji mò‑oò fə̀ə́r yè won woo Jerusalem, vèn dìn ri ŋwàʼ woo ji mò‑oò jùm wune. Wìr wo wù kaá mo, é bo m wáa fiìnè ven ji m laʼ kaá dzə̀ la? Vèn yuúrí, vé‑eè koòrí ven, e dù sho e kitum kímóʼ kí, a kù dzə̀ bìʼ vinyo vén ve bi ví. Rúrú, kù‑uù yiì liì won kisaŋ, é bo á koórí ven.

²Mò‑oò wìy ji m luŋer ven, yiì ka, la wìr yòʼ a dzə wóo yuurí? Yì‑iì yiì ka, é bo m wáa suúy kinyo, é la wìr mòʼón yòʼ a bìnèr fo věn mvəm? Vèn kwaʼ ji bó m yòʼ kér mbòv wóo tin ven shó fo vikwàn, a bó m yòʼ kér kitar kée bòyìr ven shó à? A dzə̀ m sùŋnín suŋnín, rìbà ndzə̀v yùm, ndzə́v sí yùm, sə́ si toòŋé kilòŋ ke yumén kí, e kpùkír.

³A dzə̀ m yiì, yúví sə̀n ji dzə̀v, kù moo ndzə̀y sé kpu.»

⁴Kù yèʼéy NYÙY TÀR woo Taà Ndzə mo, é bo m wáa fèr kinyo kiránén. Wù yiì bèy, ji m lóo suúy kinyo ke m suuyì, é kí wáa tavír wír ve kibeʼèy kí yúy áwune. NYÙY TÀR yim mo kijàvndzə kidzə̀m, yii, a m yár jiŋ kinyò ke wù suuyì, kù moo wánlè wo wù fó vituʼùr e ŋgaà yèʼéy və.

⁵NYÙY TÀR woo Taà Ndzə mvə̀ʼ ne vituʼùr vém, a m yòʼ‑oò lo tèn fó yunín wun, a bó m yòʼ‑oò lo ŋwày kinyo ke wù‑uù yéʼey mo shó.

⁶Mò‑oò bìnèr ndzə̀m yem, á wáa shoʼ e ŋgwàne. Mò‑oò biìmé, á wáa dzə̀n kighev kém. Wíri‑iì cú mentíy e mǒ wùn ji á ku shòór mo, a bó m yòʼ‑oò lo bìnèr sí yém fo á wáa cu.

⁷Mo NYÙY TÀR sə́ mo, wun woo Taà Ndzə, bó yòʼ dzə̀ féyì, kí kòóy ji m shoór kitú. Bìʼ bey, m lì ne sí yém moo sáylúm, a m kì féyì ji bó yòʼ dzə̀ á yiì shòór mo.

⁸NYÙY TÀR dzə̀ e mǒ mentsə̀m, a wù din ji m dzə̀ wír və lìm woo jwáʼ. Kfə̀n yíi a tsəy la kóy vèr wun? A dzə̀ wír wo wù roomè mo fo mǒ lìm, ŋgaàŋ kù wìy, é m baʼ kinyè kfə́.

⁹Rúrú, NYÙY TÀR woo Taà Ndzə dzə̀ ŋgaà ntom wom. Wìr feyì wo wù yíi tinén ji nsaʼ koò mo dzə̀ la? Vèn wáa kiíy jii, wìr dzə̀m wo wù roomè mo wíy woomé. Áwune wíy lày kisáŋ moo ndzə̀y se séʼ si laan.

¹⁰Wìr fo věn mvəm wo wù wayin ŋàŋ, a ghvəm NYÙY TÀR, e wày ŋàŋ, a yunín ŋgaà lìm və dzə̀ la? A ndzə lòo dzə, e màʼ wun, wù wáa ghan, a ghaà virə́ʼ gháan, ŋgaàŋ kù tìír a dzə̀ NYÙY TÀR fó mbìy, a yeʼtí a dzə̀ e wun woo Nyùy və́ wùn.

¹¹Vèn yuúrí, ven ve á səʼ vikaʼày ji ví fíʼ a kàʼày ven, vèn kú a ghan rì e vikaʼày vén vee shó vi. Ke m yíi yiì e vèn kí dzə̀ jii, vèn kù yíi bàyrìn, e gbù, a neŋ a dzə̀ é mvə̀m ŋgeʼ.