Read Lamnso Aysaya 51 Bible Online

Aysaya 51 - Lamnso bible

Aysaya 51

¹NYÙY TÀR suuy jii: «Vèn yuúrí, ven ve á wáy ŋàŋ ji á kú a yiì vinyo ve ví dzəə̀n réŋ, diy ji á wáa ghan e NYÙY TǍR mbòv, vèn shoóshí kilán ke vèn sanen fó fo ki, wun woo ŋgaà wo vèn ràmèn fo wun bvə̀m.

²Vèn ku shoòshí tàr won woo Abraham wùn Sara, áwune ve vèn fəən fo áwuné bvə̀m. Mò‑oò shòʼ Abraham, a wù dzə̀ə́ e sí rə́ kituu, e nèn səə̀vì wun, rám rəə́ táʼám.»

³Rúrú, NYÙY TÀR dzəə́ wìy rəə̀r shilív shé wìr veé Sion. Wù dzəə́ wìy sham mendzən me virə̀ʼ vév ve á laàrìn, e yiì, é virə́ʼ vé woʼ vee fó vi kfə́n ji kiboó keé Eden. Wù wíy yiì, é virə́ʼ vév vee nsay ŋgaŋ vi kfə́n ji kiboó ké NYÙY TÀR. Wír veé Sione wíy a yu vijuŋ, a sheʼrí. Á wíy a fo vibeerì e NYÙY TÀR, a yòv yòv, a burí wun sho.

⁴NYÙY TÀR suuy jii, «Éè wìr vem, vèn ku yuùrí kinyo ke m lo, a suúy ki kijuŋ. Ven vee kitúm kém, vèn fó vituʼùr ví, e yuùrí. M lo, e fəə́r ntir yem, é yì ghánén, é sáʼ yémé fəə́sín, a fo rán e vitúm vi, sáʼ, a dzə̀ yee là kiloʼ.

⁵Yii yém yee réŋé lo, e fəəsín cér, a ntàm yòʼ‑óò dar, a bó m lúŋér ven. M sí lo, a saʼ vitúm veé kitu ke nsay e vitaáví vém ví. Wír ve á dzə́ e ŋguùŋè rìbà ndzə̀ví kù sí shiy a dzə̀ mo, aá kù wíy a yòy, a tiír a dzə̀ e mǒ wùn.

⁶Vèn nan síi, e lèéy yúví shó, e kfə̀n lèéy nsay. Yúví wíy lò, e ŋeemé, e lày moo kindzə́ʼ, nsay wíy wèʼ moo kindzə̀n ke ndzə̀y, a wíri kù wíy a kpukír, a mày moo merə́rəʼ. Yii bèy, luŋèr ye m luŋèr wírií kù wíy a tiy fo, e dù, e jòʼsì, a yii yém yee réŋé kù wíy a tiy fo mo ŋgwàʼ si wíy a koʼ.

⁷«Ven ve á kiìn kinyo ke ru kí, ven ve á yuun ntir sém, a yiì mo m koŋè, vèn yuúrí. Wíri lóo kuù ven, lá vèn yòʼ a fàn, á lóo shùr ven e liy si, lá vèn yòʼ a yàʼ.

⁸M kù lo, e laàr áwune mo mbvə̀njàŋ kfə̀r ndzə̀y, e laàr áwune mo séʼ si là ndzə̀y. Yii bèy, a yii yém yee réŋé kù wíy a tiy fo, e dù, e jòʼsì, é m kú a lùŋèr ŋgwàʼ rə̀y, a tumsín e rə̀y.»

⁹Á bèy, NYÙY TÀR, ku ŋàʼáy. Ku ŋàʼáy, e lì vitaáví vé vi, e sə̀ ver shó. Ku ŋàʼáy, e sə̀ ver mo wò‑oò rə́si yii fo yàŋgùʼ. Kù‑uù gwàtì wò kigàgǎʼsòŋ kee Rahav[87] e vitin vitin, a yì‑iì sòv wò kimà ké yò kìn, e tòsín.

¹⁰Kù‑uù yiì wò, rìbà ndzə̀v yúm, ndzə́v yeé loònsayi yúm, e fə̀ə́r nshwǎn dzəə é mvə̀m rìbà ndzə̀v, wír ve wò‑oò bòyìrìn fó vikwàné túm shó.

¹¹Á bèy, wír ve NYÙY TÀR tinen fó vikwàné wíy a kfənkír e bàm. Á wíy a kfənkír fo kwaʼ nsàm, a nəə́ e Sion e yòv e shuù, a vijuŋ vee là may vi wíy a dzə aáwuné wùn. Áwune kù sí wìy a ker a dzə̀ kishéʼrì, a yu vijuŋ. Mendzən mè wíy tin kiwuú fo áwuné bàm, é shwéme búŋ fo áwuné shuù.

¹²NYÙY TÀR suuy jii, «Kù dzə̀ mo və̀n wo m shám ven, rəər shilív shén, bo wìr msòŋ á ka, é bo vèn wáa fàn wun. Wír, a dzəʼə̀m rəə́ kù lo, e mày, kù mo yòvrí viŋgà.

¹³Wìr msòŋ á ka, e bóo yiì, é vèn laysin NYÙY TÀR woo Ŋgaà Mbom won, wun wo wù‑uù sàŋrìn yúv fó, e wày kinsə̀ŋ ke nsay. Vèn ghàn é le, e bóo kù a dzə, a fàn aŋgaà vén vibàn ji bìʼ fo á shwiiy kilòŋ, kù dzə́, yaʼ yàʼàn ji bìʼ fo á baʼtin ne ji á laar ven. A dzə̀ dòʼshwíiy wov kfə̀n yiì ka e vèn?

¹⁴Wír ve á koorin, e wày é sháŋé sí lo, a fəə fo sháŋ. Á yòʼ dzəə́ yìi kpukír e bii wo á fìnèn áwune shó, aá yòʼ dzəə́ yiì a buŋ vifá ve yi.

¹⁵Kí wíy koóy bèy, bìʼ fo m dzəə̀n NYÙY TÀR woo Nyùy won. Kù yii mo, é bo rìbà ndzə̀v wáa tsəynín, a yír yémé dzə̀ NYÙY TÀR woo Taà Mànjòŋ.

¹⁶Sion, à dzə̀ ji ŋgaà lìm wom. M tiìsí ne ntum ye m taʼ, é wìr dzə̀m yú a dzə̀ e wò. M kìŋsìn ne wò, kù mo wìr kìŋsìn kifá e kiwó ki. Kù‑uù sàŋrì mo yúv fo wú dzəə̀n, a kù‑uù wày mo kinsə̀ŋ ke nsay. Ké lèn ki, m suuy e vèn veé Sion jii, ‹Vèn dzə̀ wír vém.› »

¹⁷Wír veé Jerusalem, vèn lo é yuv, vèn lokir é yuv. Vèn ŋáʼáy, e tìím e yuv, e yìmrì vitú vén ví. Vèn nò ne bàr ŋgeʼ wo dòʼshwiíy kivin NYÙY TÀR, wù fó ji vèn nó. Vèn nò ne, à kidzə́ŋ kí shó, e lò, a tùŋkìr.

¹⁸Fo wón ve vèn‑eè dzəən adzə̀me, wo a dzə̀ wù wàa dànèr ven bèé? Fo wón ve vèn lìyìn adzə̀me, wo wù wíy sə ven fə̀m e mòʼón yoʼ bèr.

¹⁹Ŋgeʼ si gbù ne e věn kitu kfəə́ e baà. Wìr feyì wo wù yíi sham ven dzə̀ la? Á sàʼtì ne kitúm kén, e laàr láʼ sén, jìŋ koó ven, rə́r sí nəə́, e gòʼ e věn nsàn. Wìr feyì feyì wo wù lo, e rəə̀r melív men dzə̀ la?

²⁰Wír vén adzə̀me wèʼ ne, e lò gbùkìr, a neŋnín e ghaŋ se dzəə, kù moo ŋgav wo wù toon é lálán. NYÙY TÀR lòvtí ne e vèn mo dòʼshwíiy və dzəə̀n, wun woo Nyùy won màʼ ne ŋgeʼ e věn kitu.

²¹Ven ve á màʼàn ne ŋgeʼ e věn kitu, ven ve á sí tuŋkìr, aá yoʼ nò a dzə̀ meluʼ, vèn yuúrí kin ki.

²²NYÙY TÀR woo Nyùy won, wun wo wù kér ven suuy jii, «Vèn leéy, e yèn, m sí lo, e sə bàr ŋgeʼ fo věn wo. Vèn yòʼ dzəə́ yìi no fo mǒ dòʼshwiíy, kí kù mày ne bèy.

²³M lo lèn, e way bàr ŋgeʼ və̀n a dzə̀ e wír ve á nyavrì e vèné wo, é ku nò áwune, áwune ve á kan ven ji vèn neem fó nsay, aá kóʼrí e věn kitu. Á kan bèy, vèn kù neèm kén néemen fó nsay, e siìr ndzə̀m sén é njà dzəə̀, é wír ve á koorin vené wáa koʼrí e věn kitu, a ghan sho, kù mo wìr ghàn é dzəə.»