Read Lamnso Aysaya 52 Bible Online

Aysaya 52 - Lamnso bible

Aysaya 52

¹Wír veé Sion, vèn ŋáʼáy, vèn ku ŋàʼáy. Vèn siir vitaáví ve vèn‑eè rə́si kér vi é bàm. Vèn ku maʼ vifá vén vé sùsù vi. Wír veé Jerusalem, ŋkàlaʼ ye ranén,[88] wír ve yòʼ dzəə̀n vé Nyùyi yòʼ kfə̀n dzəə́ wìy nəə́ e věn ŋkàlaʼ. Wír ve á kér *kifàné yòʼ dzəə́ wìy tiír kiwuú fó.

²Wìr veé Jerusalem, vèn lo é yuv fó kibvə̀r. Vèn ŋáʼáy, e dzə̀ʼə̀m e věn kàvàʼ. Ven vee wír veé Sion ve vé‑eè koorin, vèn shóʼtí fáŋ see kisha se vé‑eè wayin e věn kilòŋ sí.

³NYÙY TÀR suuy jii, wun‑eè fiinè ven, a bó yòʼ dzə̀ á ji mbàm, a kù dzə̀ sá mo wun yíi bòyìr ven kisáŋ, là mbàm.

⁴Kí dzə̀ bey, bìʼ fo wun woo NYÙY TÀR woo Taà Ndzə suuy jii, «Wír ve mò‑oò shoʼoné‑eè tòmbìy dù e Ejiv fo áwuné kitu ji á du, e beè fo. Fo bàm, wír veé Assiriyàa wìy lò kév, e ghàr áwune ghárín, a nyàvrì sho, a bó yòʼ dzə̀ ji vé‑eè làʼ kifá kímóʼ kí.

⁵Mo woo NYÙY TÀR wáa ghay jii, ké lèn ki, kinyo ke a dzə̀ m yiì fen lèn ki dzə̀ ka, aá lí ne wír vém, e dù sho e kwaʼ nsàm fo kisáŋ ki? Wír ve á sáʼ áwuneé yii, aáwune diyì, a wíri kù leey mo ntéŋ kishiíy kidzə̀m.

⁶Bìʼ bèy, m yíi tumnín, é wír veé Israyi kiíy wír wo dzəə̀n mo. M yíi fəə́r áwune fó ŋgeʼ e kishiíy fó, aá kiíy ji dzə̀ á mo wo m súŋnin aáwune, yoŋ jii, ‹Mo və̀ne.› »

⁷Feyì feyì, dzə̀ kinyo ke juŋ ki fóo yen ŋgaà ntum, a wù wiy fo agwan, wiy, fiʼtì ji vinyo vidzə̀m vi sì á e mboʼ. Ŋgaà ntum, a wù wiy e ntum nyaáŋ, wiy e sáʼka wo juŋ, naarì ji Nyùy lùŋèr a ne wír və́, suuy e wír veé Sione jii, kù sí sáʼ Nyùy won ji Fon.

⁸Vèn yuúrí kijuŋ, wír ve á shiy kitúme sí lo, a jàŋ kitávín. Á sí lo, e tatí, a yòv adzə̀m bìʼ kishéʼrì ke kí lo, a yuy áwune. NYÙY TÀR yíi lòo siìr wír və́ é bàm é Jerusalem, aáwune yén e sí yéví.

⁹Ven veé Jerusalem ve vèn dzə́ e wòŋ, a wú keémé ne, vèn ker yòv, a yòv kitávín. Vèn wáa yòv, bìʼ fo NYÙY TÀR rərin ne mendzən me wìr və́. Wù bòyìr ne wír veé Jerusalem.

¹⁰NYÙY TÀR sí lo, a dìn vitaáví və́ ve ghaʼán ví, a vitúm vidzə̀m vi lo, e yen e sí yéví. Wìr dzə̀m woó vitum vidzə̀m veé kitu ke nsay lo, e yen mo Nyùy wov luŋèr wír və́.

¹¹Vèn ŋáʼáy, vèn lokir, vèn fəə́ fó wòŋ woo Babilon. Ven ve á béʼ vikáŋ veé lav cù, ven fəə́ fó fo, e *kfə̀mrí vitú vén ví. Vèn lóo fəə, lá vèn yòʼ kùm kifá ke *kifàn kí.

¹²Vèn ló a lò e ghan fen, a vèn yòʼ ló a tumnín lo túmnín, a bó vèn yòʼ ló a lò a dzə̀ e kigir ki, bìʼ fo NYÙY TÀR wíy a dù ven fó mbìy. Wun woo Nyùy wìr veé Isray wíy a kìŋsìn ven fó mbìy, a kìŋsìn fo bàm.

¹³NYÙY TÀR suuy jii: «Vèn yén ri, wìr wom lìm və̀ne, a vinyo və́ ví wíy a ghanén kijuŋ. Á wíy a burí wun, a koʼór yír rə́, a ghvəm wun feyì kigháʼán.

¹⁴Yii bèy, wíri‑iì yèn wun, kí wáa jivír áwune ji sà kù yòʼ dzə̀ wun a? Vé‑eè méŋnin bèy, a wún vəə́ sì e forkìn, a wù yòʼ dzəə́ kiʼ e njà wìr. Wún vəə́‑əə̀ sòrkìr féyì, a bó wù yòʼ dzəə́ sə́nin wir msòŋ.

¹⁵Mo vé‑eè méŋnin wun, kù dzə̀ mo vitúm vinín vi wíy a leéy wun lèn, a ker gháʼ.[89] Afone wíy a leéy wun, é shúu wáa ma áwune. Kí dzə̀ jii, kinyo ke á yòʼ‑oò yiì ne fìʼtì aáwune, aá yén mo kí dzəə̀n, é ke áwune yòʼ‑oò yiì ne yù, aá kiíy mo kí dzəə̀n.»