Read Lamnso Aysaya 53 Bible Online

Aysaya 53 - Lamnso bible

Aysaya 53

¹Yii bèy, wìr dzə̀ shó wo wù biimen ntum ye vèr tiísi a? Wìr dzə̀ shó wo wù yenen vitaáví vé NYÙY TÀR é kinyò fèn, e səə̀m a?

²Wìr lìm Nyùy‑iì kúy e Nyùy si moo kifá ke kí toon toón, tó bèy, a megháŋ mè kù dzə̀ a dzə̀ é nsay ŋgaŋ. Ké ru kí, wù yòʼ‑oò ló a ker sí ye juŋe, a kìʼ e njà wìr ye vèr wáa ker shií wó a leéy wun. Wù‑uù dzə̀ ben là viwìr, ye bó yòʼ‑oò dzə̀ vèr wàa ker shií ji bo á kì jumrì wun.

³Wíri‑iì leey wun fo kisaŋ, kù nyaysì nyàysìn. Wù‑uù dzə̀ wír, a wù‑uù toòmé ŋgeʼ, e toòmé nyár. Wìr yòʼ kfə̀n‑eè kóŋ a leéy wun. Vèr kù‑uù sí ŋwáy wun ŋwáyín, yén wun ji kifá ke kisaŋ ki.

⁴Yii bèy, wù kù‑uù bèʼèy ayàsí a dzə̀ vér, e toòmé nyár a dzə̀ yér, a vèr‑iì yén kér ji màʼ a Nyùy ŋgeʼ e wun kitu, e lòvtí e wun bèn bìʼ ajay və́, e yiì, wù wáa sòrkìr.

⁵Yii bèy, vé‑eè sòv wun, e lèmér, a kù dzə̀ bìʼ ajay vér, e bvə̀ʼtí wún və́, a dzə̀ bìʼ vinyo vér ve bi ví. Wù‑uù toòmé ŋgeʼ a kù dzə̀ yéer, ji vèr fíʼ a ker nyaáŋ. Dzə̀ vileémé və́ ve ví yiìn ne, vèr bónén.

⁶Vèsən adzə̀me‑eè dzə́ fo mbìy, ján janén moo njiì wo wù jayin dzə́ə. Vèsən‑eè shwèy ne dzə́ə Nyùy, wìr wáa bìn e rə́ə yee dzə́ə. Yii bèy, NYÙY TÀR lí vinyo vesən ve bi ví vidzə̀m, e siìr e wìr və lìm və̀n kitu.

⁷Vé‑eè nyavrì e wun, wáy vileémé e wun wùn, a bó wù yòʼ‑oò ló a ghay kinyo. Wù‑uù dzə̀ moo wan njiì wo á li ji á du, e see, e kfə̀n a dzə moo njiì wo á lóo kom wuy, la wù yòʼ a toŋ. Kù dzə̀ mo wù yòʼ‑oò ló a ghay sa kinyo.

⁸Vé‑eè koò wun, e lì, a dù sho ji á du, e yuyrí, la wìr wóo bìn kinyo kfə́ réŋ yòʼ a dzə. Kfə̀n wíy a yòŋ la rám rə́, a vé‑eè tìn ne dzəʼə̀m rə́. Vé‑eè yùyrí wun, a kù‑uù dzə̀ bìʼ ajay vesən.[90]

⁹Vé‑eè tàtí wùn à wír ve bií, e yùyrí, e lì dzə́n rə́, e dzəə̀mè e ŋgaà mbàm sày, a bó wù yòʼ‑oò lo ghàn yiì kinyo ke bi kí gheéy, a bó wù yòʼ‑oò lo yiì sùúy kinyo ke kisaŋ ki fo wun shuù.

¹⁰Yii bèy, kù‑uù sìysì NYÙY TÀR ji wù yén ŋgeʼ, aá bvə́ʼ wun, é fó ye wù foon kitú kfəə́ fiʼ tàŋrí wíri, a wù kù wíy a dzə sho e tin, a yen wón wùn à wón won vəə́, a ntaŋ NYÙY TÀR kù wíy shaà a dzə̀ fo wun kiwo, e bóo ghan kijuŋ.

¹¹Wù wíy yen ŋgeʼ, yì mayì, lóo yen vijuŋ ve yì wìyìn shó, kiiy nsàv, é shilív sə́ shí neem é nsay. NYÙY TÀR suuy jii, «Rúrú, ŋgaà wom lìm wíy yiì, aá mayir ajay wìr anín, bìʼ fo wun wo wù yòʼ kér jay wíy bèʼèy ajay wìr anín.

¹²Bìʼ bey, m wíy bùʼ wun, e fo ghay, é wù wáa jàv vifá ve á kuuyin fó kwaʼ rər e kfə́m sé wìr si. M wíy yiì bèy, bìʼ fo wù‑uù foon kitú kfə́, e kpù bìʼ wíri, e biìmé ji á tátí wun wùn à vé jayi. Wù‑uù bèʼèy ajay wìr anín, e kfə̀n tìím mbìy, ji á ku làysìn ajay vév.»