Read Lamnso Aysaya 54 Bible Online

Aysaya 54 - Lamnso bible

Aysaya 54

¹NYÙY TÀR yoŋ e Jerusalem jii: «Wò, woo wiíy woo kár, wo bó à yòʼ dzəə wón, kú a ndzəʼ, a leŋ shéʼe. Wò wo bó à yòʼ kiìn mo nyár wané koó, á leŋ shéʼe, a kwakír. Kú a kiíy jii, wón wiíy woo là lúme wíy kùʼ, e shaà vé wiíy wo wù dzə́ e wun nsaàlav.

²Ku kùʼùr kibàn ke à dzə́ sho ki, e sə̀ŋrì akfə̀ə́, aá táʼám, e kùm viŋkùm, é ví táv.

³Ku yiì bèy, bìʼ fo wír vée wíy kùʼ, e saŋrí, e dù, a dzə vitóŋtóŋ vidzə̀m. Rám yée wíy tòn vitúm, tonè, aá nèn yòv ŋkà se laʼ sév, a dzə sho, ŋka se laʼ, a sí sì é vifə̀m.

⁴«Lá à yòʼ a fàn, wìr yòʼ kfə̀n dzəə́ wìy yiì kinyo ke à wáa woomé. Lá mbvəərì yòʼ fəə̀ e věn mvəm, bìʼ fo wìr yòʼ dzəə̀n shó wo wù wíy yiì, áà wáa woomé. À wíy làysìn vinyo ve nshoórmé ve wò‑oò yii, aà dzə̀ə́ wánlè ŋgòn. À wíy làysìn shéʼ ye vé‑eè shéʼ wò, aà dzə̀ é kwaʼ kimfəə, shéʼé, kù moo ji à sì wiiy ŋkfə woo là ŋgaà benben.

⁵Lum wò kù dzə̀ə́ wun woo Ŋgaà Mbom wò. Yír yémé dzə̀ NYÙY TÀR woo Taà Mànjòŋ. Dzə̀ mo Ŋgaà wo Ranén woó Isray, a tìn mo wò fo ŋgeʼ, a kù sáʼ mo kitú ke nsay kidzə̀m.»

⁶Wír veé Isray, rúrú, vèn dzə̀ moo wánlè ŋgòn wo lum jùmèn, wù wáa yu nyár e shiliv, a dìy. Yii bèy, NYÙY TÀR woo Nyùy won suuy jii, «M lo, e siìr ven é bàm e mǒ wùn.

⁷Mò‑oò màʼtì ven é bǎm shintàm, e làa yòʼ dzə́ə a leéy fo vèn. Yii bèy, lèn, bìʼ shií wo m kér fo vèn, m lo, e lì ven é bàm, a leéy fo fo.

⁸Mò‑oò shwìíy kilòŋ ke ghaʼán kí vèsən fó bǎm shintàm, e bìn ndzə̀m e vèn. Yii bèy, m wíy a kòŋ ven, e dìn mo m shám ven, e dù, e jòʼsì. Suuy mo woo NYÙY TÀR wo wù tín ven fó ŋgeʼ.

⁹«Mò‑oò lo kàʼ e Noa ji bó m yòʼ dzəə́ wìy laàr kitú ke nsay e ndzə́ví. Ké lèn ki, m kàʼ ne ji bó m yòʼ dzəə́ wìy shwiíy kilòŋ vèsən, e màʼ ŋgeʼ e vèn.

¹⁰A dzə̀ virùmèn wùn aàgwane bùŋ fó wòŋ, yii bèy, a bó yòʼ dzə̀ féyì koŋ ye m kér fo vèné wìy mày. M yòʼ wíy yaʼáy *mensaŋ me mò‑oò gwàrìn ji vèn wáa dzə dzə́ yee nyaáŋ. Suuy mo woo NYÙY TÀR, mo wo m kér shií é ŋàŋ bìʼ ven.»

¹¹NYÙY TÀR suuy jii: «Éè ŋkàlaʼ Jerusalem, wò wo à siìn ji wo ŋgeʼ, à sì moo wír wo kinyo ki gbuùn é kitu wo, là ŋgaà sham. Rúrú, m yíi yiì, aá kfən bàʼrì wò, áà kfə́n a kìʼ kijuŋ.

¹²M yíi bàʼrì kirə́ʼ ké ke ŋkiy e *síbaŋ ye yí rán moo kileèyi. M yíi bàʼrì shuu sé se kày e síbaŋ ye njaʼkìné, e bom virə́v vé kày e tíy yeé kilùme.

¹³Mómò woo NYÙY TÀR, m wíy yeʼéy wír ve á dzə́ e wò ŋkàlaʼ adzə̀m. Áwune wíy a dzə dzə́ yee nyaáŋ, a ker kifá kidzə̀m ke á kér shií shó.

¹⁴Vèn wíy lòo jùmrì kinyo kee réŋ, é la kinyo ki yòʼ sə̀ʼ ven. Bó vèn yòʼ kfə̀n wíy a dzə e wír ve səné sar, a bó vèn yòʼ kfə̀n dzəə́ wìy a fàn kifá. Vèn wíy bòy fo fàn, bìʼ fo kifá ké a bemér ven kí yòʼ wíy a meʼ mentsə̀m men.

¹⁵A kitúm ki ghìʼ ven e rə́r sí, bo bó yòʼ sùúy mo ji á ghíʼ. Kitúm ki wíy nəə́ ven e rə́r sí, é vèn ku tòn áwune.

¹⁶Vèn leéy, kù‑uù bòm mo taà kilàm wo wù sətì kilam, a fer rəə́ kù dzə̀ vifá ve kinjuyrì, a kù‑uù bòm mo vé rər ve á yúyri wíri.

¹⁷Aá fə̀m fèr vifá ve rər é le, e ghìʼ ven shó, bo bó yòʼ dzə̀ á tòn ven. Wìr wíy tiír ven é kibàʼ ke nsaʼ, é vèn ku sò wun soón. Vèn wíy yu fó a yiì vinyo vìn, bìʼ fo dzəə̀n vitsə́ʼ ve m lèmèn áàŋgàa lìm vémé, a kfə̀n dzə̀ dzə́ə ye m din ji vé lìm vémé tíy sho réŋ. Suuy mo woo NYÙY TÀR.»