Read Lamnso Aysaya 55 Bible Online

Aysaya 55 - Lamnso bible

Aysaya 55

¹NYÙY TÀR suuy jii: «Vèn yuúrí, ven adzə̀m ve kilòŋ kí yúmé, vèn wiy é ntoò ndzə̀v. Rúrú, ven ve á yòʼ kér mbàm, vèn wiy, e yùn viyíkìr vi, e yì. Vèn wiy, e yùn meluʼ mè wùn à vín nyàme, fə̀m mo bó vèn yòʼ kér mbàm. Fò Nyùy, a ví dzə̀ kisáŋ.

²Yiì ka, é bo vèn wáa tòn mbàm e vifa, a bó ví yòʼ kúr bvəm? Vèn ghàn é le, e bóo ndzə̀ʼnìn, e kav mbàm, e lì, a yun vifá sho, a bó yòʼ dzə̀ ví sə̀ ven? Vèn yuúrí kinyo ke m suuy ki, é m din fo a dzə̀ vèn kòóy vifá ve yi ve juŋ vi. Vifá ve yi, a vèn ló yi, e yu búʼ.

³Éè wìr vem, vèn yuúrí kijuŋ, vèn wiy, e yèn mo. Vèn wiy fo mǒ wùn, e fíʼ wìy bonén, e shiíy. A vèn yiì bèy, bo m wíy gwàr *mensaŋ vèsən, mensaŋ, a mè wíy a tiy fo, e dù, e jòʼsì. Dzə̀ koŋ ye ruú, a dzə̀ yíwun ye mò‑oò kàʼàn Davir sho, e kfə̀n lìʼ.

⁴Rúrú, m yiì ne, wun woo Davir wáa dzə ji njen, a fìʼtì mo m dzəə̀n e vitúm vi, a m lèm ne wun ji kilìmbìy, wù wáa saʼ vitúm.

⁵Bìʼ bey, wù wíy a lì vitúm, a wìy sho fo mǒ wùn. Vitúm, a bó wù yòʼ kì, a ví yòʼ kì sá wun. Ví wíy a leʼ, a wìy ji ví fiʼ tàtí ven, bìʼ mo woo NYÙY TÀR woo Nyùy won. Á wíy a wìy, bìʼ fo mo woo Ŋgaà wo Ranén woó Isray bùʼùn ne ven e vikuʼùy ví.»

⁶Á bèy, vèn kú a tàʼ NYÙY TÀR lèn və̀n wo dzə̀ á yèn wun. Vèn wáa toŋ e wun lèn və̀n wo wù dzə̀ə́ e věn mentsə̀m.

⁷Wír ve á méŋ Nyùyi ku màʼtì liì wov kisaŋ, é wír ve bií maʼti kwaʼtì sév sé kisaŋ si. Áwune ku kfə̀n é bàm e NYÙY TǍR wùn, é wù fiʼ shàm áwune. Á ku kfə̀n e Nyùy wòsə́n wùn, bìʼ fo wù yíi làysìn ajay vév, e làa yòʼ kìm wùmòʼ.

⁸NYÙY TÀR suuy jii, «Kwaʼtì yémé dzə̀ jeéy fo yéné, a bó m yòʼ yii yii vinyo e dzəə ye vèn yii vén shó.

⁹Mo yúví dzəə̀n kwaʼda fo nsay, bo dzə̀ sá mo dzəə̀ ye m yii vinyo sho dzəə̀n jeéy fo yéen, a kù dzə̀ sá réŋréŋ mo dzəə̀ ye m yii kwaʼtì vinyo sho dzəə̀n jeéy fo yéen.

¹⁰«Wuú wùn à mentíy mè yii gbu fo yuv, la mè yòʼ kfə̀n é bàm, a bó mè səə́ví nsay, səəvì, vifá vi nèn a kuy, ŋgaà way kòóy ŋgoòy ye fíy, ŋgaà yi kòóy viyíkìr.

¹¹Kù dzə̀ sá réŋréŋ mo jí se sí fəə́ fo mǒ shuù si dzəə̀n, a bó yòʼ dzə̀ sí lày kisáŋ. Sí kù yíi lìm kinyo ke m yòŋèn ji kí wáa dzə. Kinyo ke m suuyin ji kí wíy koóy ki kù dzə̀ kíwun ke kí wíy koóy.»

¹²Rúrú, vèn wíy a lò fo kwaʼ vikwàn é Babilon e kishéʼrì ki. Nyùy wíy a dànèr ven ji nyaáŋ, a kìŋsìn ven. Vèn wíy lòo nəə́ woŋ, áàgwane wáa sèv sèvìn moo wír, a fuŋ yòv, é vicí ví wáa sheʼrí, a kwaʼ wó.

¹³Vitiír vé njoŋ vi wíy fo ghay e vicí vé dzəʼə̀y ví, é ví wáa tèʼ, é vimbìn ví fó ghay e vicí vee *mirtel vi. Kin ki wíy a yiì, é vèn wáa kuumé vinyo ve NYÙY TÀR yiìn. Dzə̀ kisəəm, a kí wíy a dzə fo ŋkuuŋkùŋ. Kisəəm, a bó yòʼ dzə̀ wìr wìy laàr.