Read Lamnso Aysaya 56 Bible Online

Aysaya 56 - Lamnso bible

Aysaya 56

¹NYÙY TÀR suuy jii: «Vèn lóo yiì kinyo e wíri, á kù a yiì a dzə̀ kee tìítiy. Vèn kú a yiì vinyo a dzə̀ ve ví dzəə̀n réŋ, bìʼ fo m kù sí wiy lèn lèn ji m luŋer ven, a vèn kù lo, e yen mo m kwàŋrìn vinyo vén tìítiy, e bòyìr ven.

²M yíi səə̀vì wir dzə̀m wo wù lem kishiíy ké bam ke NYÙY TÀR. Wír ve á yii vinyo vee shooy ghán sidzə̀m, shoóshi kijuŋ. M wíy səə̀vì wír ve á yòʼ wáy wó e kinyò ke bi kí.»

³A dzə̀ wir kitum, a wù suúsín ne wùn NYÙY TÀR, la wù yòʼ dzəə gàʼ jii, «Ké ru kí, NYÙY TÀR kù dzəə́ wìy bày mo fo wír vəə́.» Lá wìr wo á sòŋèn yòʼ a suúy jii, «Mo m siìn ji kicí ke yumér kí, bo bó m yòʼ dzəə́ kér kilíŋ e Nyùy kinyò.»[91]

⁴Ke NYÙY TÀR suuy ki dzə̀ jii, «A vinsòŋ ve wìr vi lò, a lèm kishiíy kém ké bam, a yiì vinyo ve ví wáa bòŋ mo, a jùmrì ntò se *mensàŋ mèn sidzə̀m,

⁵bo m bóm kirə́v e mǒ lav, e saŋ yír sév shó wir dzə̀m. Kin ki wíy bòŋ, e shaà fo áwune wáa ker a dzə̀ wóné, bìʼ fo yír yéví kù wíy a tiy fo, e dù, e jòʼsì, aá yòʼ wíy làysìn.

⁶«Vitúm ve bó yòʼ dzəə̀n wír veé Isray, ve ví kfənen ji áwune‑éè wáa jùmrì mo woo NYÙY TÀR, a sùyrì mo, e kfə̀n a ghvəm yír yém, e fò vitú vév ji vé lìm vém, a lèm kishiíy kém ké bam, e làa yòʼ a ŋway, e kfə̀n ghàr mensaŋ mem kitávín, a yunín,

⁷á wír ve m wíy yiì, aá wáa wìy e mǒ gwan wo ranén. Á kù wíy a wàʼrì, a wìy e mǒ lav bùnrì, a sheʼrí mo. M wíy səəsí cu yév ye tonèné wùn à ye seeríné e mǒ kiy cù, aá wíy a yòŋ lav yem ji lav bùnrì fo vitúm vi vidzə̀m.»

⁸Á bèy, NYÙY TÀR woo Taà Ndzə, wun wo wù báʼti wír veé Isray fo kwaʼ nsàm, wù suuy jii, «M dzəə́ yìi baʼtí wír ámóʼó, aá tátí áwune.»

⁹Ven vee vitúm, ven ve vèn dzəə̀n aŋgàa vibǎn wìr veé Isray, vèn ku wìy, e laàr áwune láarin.

¹⁰Vilìmbìy veé Isray ve dzəə̀n aŋkiyi sì ji amfìr. Áwune vee anshìyi yòʼ kér vifií, á kù sì ji jwí se sí buúne buùnén, a sí yòʼ dzəə́ wámé. Áwune kù sí néŋ, a njèm si shí áwune, kù koŋ, a boʼ a dzə̀ mbuùné.

¹¹Áwune kù sì ji jwí se sí səŋnìn vifá ve yi sə́ŋnin. Aá fə̀m yìkír e le, bo bó yòʼ dzə̀ buù kpù. Anshìy wìr veé Israyi yòʼ kér vifií. Áwune adzə̀me kù sí yii kinyo a dzə̀ ke kí gheen áwune, a wìr kù taʼ a dzə̀ və́ə woo séʼ.

¹²Wìr lo, wù kù a suúy e wùmòʼ jii, «Vèn wáa wìy, é vèsən du, e m taʼ meluʼ, aá nó. Vèsən ku nò meluʼ me tavkín mè, e tònén, é buù kpú. Vèsən nónín, é kibvəə́shí kí bvəə́shí, a dzə kijuŋ feyì moo kishiíy ké lán ki.»