Read Lamnso Aysaya 58 Bible Online

Aysaya 58 - Lamnso bible

Aysaya 58

¹NYÙY TÀR suuy jii: «Vèn fúŋ kitávín, e tiìsí ntum rə̀n. Vèn nan jí si, é sí wáa koo mo á tóŋ a dzə̀ sóŋ. Vèn tóʼ ajay ve wír vémé jáyíi, e sàr vinyo ve bi ve áwune vee rám Jakovi yii vi, aáwune yú.

²Áwune lo kév, á kù a meenín e mǒ si mo kishiíy kí dzəə̀n, a laàrì sí ji á koŋ, e yeʼéy vinyo ve m taʼ ji á wáa yiì. Á yii, kù moo ji dzə̀ wír ve á yúnin mo, a bó á yòʼ ŋwáy sáʼ Nyùy wov. Á lón mo ji m ku fò á áwune sáʼ yee là kiloʼ, koŋ feyì ji bo á kì kóʼti e mǒ mentsə̀m.

³Á lo, á wàa ghvə̀vrì mo jii, ‹Vèr lem jíŋ, la à yòʼ a yen bìʼ ka? Vèr tsə́m ndzəə́ e wò si, la à yòʼ a yen bìʼ ka?› Á bèy, m nén a suúy kém jii, vèn lóo lèm jíŋ e kishiíy fó, vèn kù a dìy a dzə̀ vitú vén, kfə̀n a nə̀ʼsì vé lìme, a boʼ áwune.

⁴Vèn fó vituʼùr ví, e yuùrí. Vèn lem jíŋ, á kù màysì a dzə̀ é kitaŋnìn, e màysì e vindzə̀ʼ, wìr wàa kfəvtí kiwó, a fòr wùmòʼ e ŋkùm. A vèn lem jíŋ a dzə̀ é dzəə fen, bo bó yòʼ dzə̀ m yù bunrì yén.

⁵Kù yòʼ á kfə́ə jiŋ ye m taʼ ji á wáa lèm a? M kù yòʼ diy a dzə̀ ji vèn lem kishiíy, e rə̀sí e jìŋ, a nə̀ʼsì vitú vén á? A dzə̀ m wàa sheʼrí vitú ve vèn joor moo ŋkiʼ, a sheʼrí néŋ ye vèn néŋ e kibvə e ndzə̀y sé kpu sí wùn á? A kù yòʼ dzə̀ vèn wàa yòŋ kin ji á lem jíŋ a? Kù yòʼ dzə̀ mo woo NYÙY TÀR səə̀sí yee shoon yee jíŋ a?

⁶«Vinyo ve m taʼ ji wír ve á lem jíŋe wáa yiì vi dzə̀ jii, M taʼ ji á bvəti asháŋ ve á gòvtìn wíri, e kùr shó, e bvə̀tì akfəə̀ ve á kurin fáŋ ye yí dzər, gháʼ áwune shó. M taʼ ji á ku sə̀ wír ve á nyavrì sho, aáwune boy, e laàr dzə́ə se wíri shaa sho, e bó a yiì ŋgeʼ aámóʼó.

⁷M taʼ ji vèn wáa jàv vifá vén vé yi e wír ve á yòʼ kéríi, a səəsí aŋgàa kitàn vee alàlav, a fo áwune kirə́ʼ ké shiíy. Vèn yén wír, a wù ghán kinshóʼ, vèn kùr ndzə̀y é wùn wó. Lá vèn yòʼ a ten fó a sə afə́r vén.

⁸A vèn lò, a yiì vinyo vìn, bo vèn yíi yen mo m koŋ ven, é kí wáa dzə moo shúy ye ndzə rán, yì tò, a ban, bo kù sì fer mo m fèrìn ven bey. Mo woo NYÙY TÀR, m yíi a dù fo věn mbìy, a dànèr ven. M yíi a wìy e věn bàm, a kìŋsìn ven.

⁹Á bèy, vèn lóo bùnrì lèn, é mo woo NYÙY TÀR wáa yu, a sə ven. Vèn lóo toŋ e mò, é m biner jii, ‹M və̀ne, mo‑óò sə́ ven.› «Kù dzə̀ ji vèn yar fó a nyàvrì e wíri, e làa yòʼ a toy wír e kinyò kisáŋ, kìn ji á wáa roòmè wír là jay.

¹⁰Vèn kú a fo viyíkìr vi e wír ve jìŋ yáríi, a sə wír ve á dzəə̀n é mvə̀m kitàn. A vèn lòo dzə a yiì bèy, bo yì wíy sən e věn kitu, é m yii, é vèn yén rán, é ŋgeʼ sén sí may, kù moo ji bàn shúy.

¹¹Mo woo NYÙY TÀR, m yíi a dànèr ven ghán sidzə̀m. M yíi a nəʼsín ven e vifá ve juŋ ve vèn kér shií shó vi, a yiì, é vèn wáa dzə atávkín. Vèn yíi a dzə kijuŋ moo kiboó ke á wáyri mendzə́v shó kijuŋ, a bun bunén é mvə̀m vifa moo ntoò ndzə̀v ye yì léŋ ghán sidzə̀m.

¹²Wón véné kfə̀n wíy bàʼrì ŋkà se laʼ sén se sí siìn é vifə̀m, e kfə̀n siìr kinsə̀ŋ ke vé‑eè wayin ne fo ŋgùʼ. Á wíy a yòŋ ven ji wír ve á náŋsin virə́v ve ví keèsìn, a yòŋ ji wír ve á náŋsin dzə́ə sí é mvə̀m sé laʼ ji wíri wáa dzə fo.»

¹³NYÙY TÀR suuy jii: «A vèn lò, a lèm kishiíy kém ké bam ji kishiíy kee jeéy kí, e làa yòʼ a yiì vinyo vén é kishiíy fóo fèy, e kù a ker shií ji bo á kì rə́si kishiíy kee shoon, a yen ji dzə̀ kishiíy ben, a kí kér ghvə́m, e làa yòʼ a dù ghán yén é kishiíy fen, e làa yòʼ a dìy vinyo vén é kishiíy fen, e làa yòʼ a jaár kisúŋnìn,

¹⁴bo vèn yíi a yu vijuŋ ve mo woo NYÙY TÀR, é m yii, aá wáa ghvəm ven kitú ke nsay kidzə̀m, é vèn kfə́n a yu vijuŋ e nsay ye mò‑oò foon e taà kfəə won woo Jakov. Kù suuy mo woo NYÙY TÀR vinyo vìn.»