Read Lamnso Aysaya 59 Bible Online

Aysaya 59 - Lamnso bible

Aysaya 59

¹Rúrú, vitaáví vé NYÙY TÀR ví yoʼ dòr fo wù luŋer wíri, a vituʼùr və́ ví yoʼ səə̀rí fo wù wáa yu bunrì yév.

²Kù dzə̀ vinyo vén ve bi ví ve ví jàvsìn ne vèn à Nyùy won. Ví yiì ne Nyùy kór sí fo věn wùn, a bó yòʼ dzə̀ wù kfə̀n yù kinyo kén.

³Vèn lì ne njò kinjuyrìwìr, a lǒn vinyò ve vèn buʼtìi kù ló a dzə e věn kitu. Vèn mvəʼ shuu, kù fəər a dzə̀ kimboʼtì, a kiliímé kén kí kù tíy a dzə̀ é kinyò ke kisaŋ ki.

⁴Wìr fo vèn wo wù taʼ kinyo kee tínén é nsànloŋ yòʼ kfə̀n dzə̀. Wìr yòʼ kfə̀n sáʼ nsaʼ, suuy suuyrú, kù ghaa a dzə̀ vinyo ve kisaŋ vi, e bó a suúy, bóʼti a dzə̀ kimboʼtì e ŋàŋ. Wìr dzə̀m kù sí kér a dzə̀ bvə́m ŋgeʼe, a yí kù sí bvə́ysin a dzə̀ é kinyò ke bi kí,

⁵kù moo búv wo wù kay wúm, wúm ye a wìr lùʼ é shuù, bo ŋgaàŋ kù‑úù kpú, á bvə́ʼə́, kù fəə̀ yó fo mvəm wó. Yii bèy, menàŋ me wír vìne bá mè kù dzə̀ ji láv taàŋgám.

⁶Menàŋ me á bá mèn mè yòʼ yíi sə áwune, réŋréŋ mo a taàŋgám fə̀m fèr lav, yí kuʼ é le, bo bó yòʼ dzə̀ á lì, e bà ndzə̀y shó. Lim yév e dzə̀me kù dzə̀ ji á buʼti vinyo, lo, á ghàr wír, a kàr.

⁷Wír vìne kù sí yár jíŋ ji á yii kinyo ke bi kí, waʼrì gheéy, á yùy wír là njò. Á kù dzəʼə̀m, bá antaŋ a dzə̀ vé yìi kisaŋe, nəə e kirə̀ʼ, bo kí fòy ne, e kfə̀n é vifə̀m.

⁸Áwune yòʼ dzə̀ wír kimane gheéy, aá yòʼ tíy e kinyò kee ji á tínén réŋ. Áwune kù kér a dzə̀ liì kisaŋ, a bó wìr yòʼ shèm ŋgoo yev, ŋgaàŋ wìy a lèm nyaáŋ.

⁹Á bèy, wíri ku nèn a suúy kév jii: «Rúrú, vèr kìíy ne lèn kinyo ke kí yiìn, é bo Nyùy tén fóo bòyìr ver fo aŋgaà vér vibàné wo. Vèr yòʼ kfə̀n dzəə́ yén vinyo ve Nyùy vee réŋ e věr dzə̀ʼə̀m. Vèr diy feyì ji ráne ku wìy fo vèr, a kù nèn wiy ndzə ye sənér. Lón feyì ji bo vèr kù kì ghán fo meranén, yii bèy, vèr kù sí ghán a dzə̀ é mvə̀m ndzə, a yì sə́n ji cùm, beéme.

¹⁰Vèr kù sí ghaa wún lav moo mfìr, e bó a ghan, mumrì dzə́ə múmrin moo alàsí. Lóo dzə e ntìntìn shùy, vèr wàa ghan, a bàyrìn, kù moo ji sì é meraaràŋ. Vèr kù sì e wír ve tavkíné mvəm moo aŋkfəsày.

¹¹Vèr kù sí kónsi kònsín, diy dìyìn. Vèr taʼ feyì ji bo á kì kwàŋ kinyo kér é nsànloŋ, a kí yòʼ kooyì. Vèr diy feyì ji bo Nyùy kì bòyìr ver, yii bèy, a wù yòʼ boyìrì.»

¹²Éè NYÙY TÀR, kí dzə̀ bey, bìʼ fo à kiiyin ne nyanyày vinyò vér ve bi ví. Vinyo vér ve bi ví sí tíy e wò si, fiʼtì ajay vér e wò. Feyì feyì, vèr yòʼ méŋ ajay vér. Vèr kì féyì mo vinyo vér ve bi ví dzəə̀n.

¹³Vèr tàv ne kitú, e mèŋ wò woo NYÙY TÀR. Vèr bìn ne ndzə̀m e wò woo Nyùy wor. Vèr nə̀ʼsì ne wír ámóʼó, e ŋwày kinyo ké. Vèr kù sí baʼrì a dzə̀ kimboʼtì e věr meliv, fəər a dzə̀ kíwun fo shuù.

¹⁴Wíri yòʼ dzəə́ taʼ feyì ji á kfən tìnén kinyo e nsànloŋ, a bó á yòʼ dzəə́ taʼ feyì ji bo á kì ghán e Nyùy mbòv. Suuyrú yòʼ kfə̀n dzə̀ə́ e wìr msǒŋ mvəm, aá yòʼ kfə̀n fó kilíŋ e kinyo kee tìítiy ki.

¹⁵Wìr dzə̀m kù sì ŋgaà lǎm baà. Wìr neer njiìn wo bi, ghár a dzə̀ wo juŋ, wír ve bií nèn a sùm vifá və́. NYÙY TÀR yèn ne vinyo vìn, e yèn, a kinyo keé nsànloŋ ki yòʼ dzə̀, kí bír wun.

¹⁶Wù leéy, e làa yòʼ yen wír wo wù tiím mbìy, wír wóo tiím bèn ji kinyo keé nsànloŋ ki wáa dzə. Wù táʼ ntéŋ, kitú ki lúm wun. Wúnwun NYÙY TÀR ku nèn shèm fó kintìntìn ji kù yíi so a wun vinyo ve bi ví e vitaáví və́ ví. Shií wo wù kér fo vinyò veé nsànloŋ kú a banrí wun.

¹⁷Wíy lòo dzə e kishiíy ke wù nəə e mvə̀m vinyò, é wù li yii rə́ yee réŋ ji kikúm kfə́ ké kishà, e lì vitaáví ve wù luŋèr wíri shó ji tán rə́ kishàa. Shií və woo ji wun ku siìr ŋkfə́tír, e màʼ ŋgeʼ e wír ve bií kitu wíy sùm wun, kù moo kikúm ke da ke wìr màʼàn.

¹⁸Wù kù wíy làʼ wir dzə̀m a dzə̀ mo ŋgaàŋ lìmèn. Wù wíy màʼ ŋgeʼ aàŋgàa vibàn vəə́ kitu adzə̀m, e màʼ e wìr dzə̀m kitu wo wù tún kinyo kfə́, fə̀m e vitúm vidzə̀m veé ŋguùŋè rìbà ndzə̀v ví.

¹⁹NYÙY TÀR wíy yiì kin, é wìr dzə̀m wáa ghvəm yír rə́, a fàn vitaáví və́ ve ghaʼán ví. Wir dzə̀m woo kèʼ fó mbìv yee fo shùy yii tó, e dù, e meé fo yì nəə. NYÙY TÀR wíy a wìy cércér, kù moo ndzə́v ye yí léŋ kitávín, a wìy moo ndzə́v ye shwér NYÙY TÀRí dom, a yí tsə́y virə́ʼ.

²⁰NYÙY TÀR suuy jii, «Mfə̀ə́r wíy wìy e Sion, e bòyìr wír vee rám Jakov ve á bìnèrìn meliv mev, e màʼtì vinyo ve bi ví.»

²¹NYÙY TÀR kfə́n a kàʼ aáwune jii, «Fo kém kí, m wíy gwàr *mensaŋ vèsən jii, Kiyoy kém ke kí dzəə̀n e věn meliv kí kù wíy a dzə vèn áwune, e dù, e jòʼsì, é vèn kú a ruvtí jí sém se m yeʼeyin ven shó. Wón véné yòʼ wíy a yàr fó a ruvtí, à wón won véné shó. Á yòʼ wíy a yàr fó a rə̀tì sho, e kèʼ fo lèn, e dù, e jòʼsì.»