Read Lamnso Aysaya 60 Bible Online

Aysaya 60 - Lamnso bible

Aysaya 60

¹Éè Jerusalem, vèn ŋáʼáy, e dìn e wìr msòŋ mo Nyùy luŋèr ven. Rán yéné wìy ne, vikuʼùy vé NYÙY TÀR ví nəə́ ven.

²Rúrú, ndzə vitsə̀ʼ sə̀tí ne kitú ke nsay, ndzə ye sənér súm vitúm vidzə̀m. Yii bèy, fo kén kí, NYÙY TÀR wíy ŋaʼáy, e lùŋèr ven, é wíri yén vikuʼùy və́ e věn wùn.

³Vitúm vímóʼ ví wíy a wìy fo NYÙY TÀR woo rán yén wùn, áàfone wáa wìy sa fo NYÙY TÀR won wo wù bán moo shúy wùn.

⁴Éè wìr veé Isray, vèn nan síi, e lèéy. Vèn leéy, e yèn mo wón véné baʼtin ne, a kfən e laʼ fo kwaʼ nsàm. Wón vén vee vilum ve á dzə́ e ndzəywoŋe sí kfə́n fo věn wùn. Á baàrí ne wón vén vee vikìy, a wìy sho.

⁵Á wíy kfən e bàm fo věn wùn, é vishí vén ví bvərkir. Kí wíy nyànyày ven, é kishéʼrì ki rún e věn meliv. Á wíy bèʼèy bùʼ woó vitum, e wìy, e yen ven shó, á wíy bèʼèy, e tumsín rìbà ndzə̀v shó, e fo e vèn.

⁶Á wíy bèʼèy bùʼ və̀n aàkamer, e wìy sho, áàkameri rún nsay yen. Mbèʼŋkùm və̀n wíy a wìykìr fo Midian, a wìy fo Efa. Wìr dzə̀m woó Sheba wíy a wìy, a ker *kisha ke mbàm ke baar kí wùn à kiláy kee *frankinsen ki. Wiyì, aá kweʼ viŋgaʼnìn ve vinyò ve NYÙY TÀR yiìn, e fèr e vèn.

⁷Wír veé Kedari wíy a kuúy njiì wov wùn à bvə́y si, a wìy sho, a fo e vèn. Vèn wíy a lì viyáʼ ve wír veé Nebayioti wíy a wìy sho, a yiì cu sho. Vèn wíy cù mo woo NYÙY TÀR shó, é m səə́sí e kishéʼrì ki, e yiì, é wíri wáa ghvəm lav yem fo m dzə́.

⁸Vèn leéy ó, wír ve á wiy mo féŋ mbàʼ wiy vìne dzə̀ ala? Dzə̀ ala ve á wiy moo vibìŋ ve ví féŋ, kfə́n e laʼ?

⁹Rúrú, dzə̀ vikóŋ veé vitum vímóʼ ví mo ví meʼèm, wiy ji á yén mo. Mo ŋgoo rə̀n meʼèm, wiy bèn, vikóŋ veé Tarshish vi lo, e tòmbìy meé. Ví wiy, béʼ wón vén ve vé‑eè dzəə̀n é vitum veé ndzəywoŋ. Á wiy, kér kisha ke mbàm ke fəvír kí wùn à ke baar kí, wiy sho ji fómo NYÙY TÀR woo Nyùy won, wun woo Ŋgaà wo Ranén woó Isray. Á wiy e vifá vi bey, bìʼ fo NYÙY TÀR nànèn ne ghay wón, vitúm vi wáa ghvəm ven.

¹⁰Viŋgwìy vi wíy bàʼrì kay yén yeé ŋkàlaʼ Jerusalem. Afon veé vitum fène wíy fo kifá kidzə̀m ke vèn taʼ ji á baʼri Jerusalem sho. Fə̀m mo mò‑oò shwiiyin kilòŋ vèsən, e màʼ ŋgeʼ e vèn, m yòʼ dzəə́ shwiiy kilòŋ. M lo, e sham ven, e lì ven é bàm.

¹¹Shuu sén sé ŋkàlaʼ si sí wìy a tiynín sirə́ sirə́. Wìr yòʼ wíy a sətí, a fə̀m dzə̀ e shùy, a fə̀m dzə̀ vitsə́ʼə́. Sí kù wíy a tiynín sirə́ sirə́, é vitúm vi fiʼ yù fóo nəə́ e bùʼ wov, e fo e vèn. Á wíy a wìy sho, a vilìmbìy vév ví wíy a dzə afon vév.

¹²Á kù kér fóo wìy a wìy sho bèy, bìʼ fo, a kitúm ki tèn, bo á wíy tòn kitúm kee shooy, é kí lay ŋkuuŋkùŋ. Á wíy tatí vitúm vee shooy, e laàr vidzə̀m.

¹³Jerusalem, á wíy wìy e bùʼ woó Lebanon e věn wòŋ. Vicí vé dzəʼə̀y, wùn à vé *payin, à vé *fir vi, á wíy wìy sho, e fo e vèn. Vèn wíy lì, e bàʼrì lav yem shó, é kirə́ʼ kee fo m dzə́ ki wáa njàʼkìr.

¹⁴Rám wìr dzə̀m wo wù‑uù ghanen ne tòn ven, e siìr ji akwàné wíy wìy, e tsəm e věn si. Wìr dzə̀m wo wù káy ven ji akwàn wíy wìy, e tsəm ndzəə́ e věn si. Á wíy a yòŋ ven ji Ŋkàlaʼ NYÙY TÀR. A yòŋ jii, Sion, Ŋkàlaʼ Ŋgaà wo Ranén woó Isray.

¹⁵Jerusalem, mo á tònèn ne ven, e siìr ji vifə̀m, wíri wáa jàʼ ven, a bàn ven, wìr yòʼ kfə̀n dzəə́ shaa dzə́ə fo věn ŋkàlaʼ. Yii bèy, m yíi koʼór ven, é vèn wáa ker viwìr ve ghaʼán ví, é ŋkàlaʼ yen wáa dzə kirə́ʼ ké kisheʼrì fo ŋgwàʼ si sidzə̀m, e dù, e jòʼsì.

¹⁶Vitúm vi yíi a fo bùʼ e vèn, kù mo kiyìy kí nyòór wán. Afone yíi a fo nyanyày vifa e vèn. Kí kooy bèy, é vèn nèn kìíy ji dzə̀ á mo və̀n wo mò‑oò bòyìrìn ven, mo woo NYÙY TÀR féyì feyì, mo woo Ŋgaà Vitaàvi Jakov, wo m dzəə̀n e gháʼtín, mo woo Mfə̀ə́r won.

¹⁷Fo věn vifa ve kibàʼrì, m yíi yòŋ, é vitúm vi maʼti kisha kee *brons, a wìy a dzə̀ e kisha ke mbàm ke baar kí. M yíi yòŋ, aá maʼti kisha kee kiy, a wìy a dzə̀ e kisha ke mbàm ke fəvír kí. M kfə̀n yíi yòŋ, aá maʼti vicí ve á kì yíi a wìy sho, a wìy a dzə̀ e kisha kee brons ki, e yòŋ, aá wáa wìy a dzə̀ e kisha kee kiy ki, e màʼtì tíy ye á kì yíi a wìy sho. M yíi yiì, é la vé saʼ véné yòʼ kfə̀n a tay ven, e yiì, aá wáa saʼ ven é nsànloŋ, é vèn wáa dzə dzə́ yee nyaáŋ.

¹⁸M wíy yiì vinyo vìn vidzə̀m, é la melaà mè yòʼ dzə́ə a dzə e věn nsay. Rə́r se sí bívir vifá vén, yii, a virə́ʼ ví du e vifə̀m si lo, e seéy. Luŋèr ye m luŋèr vené wíy a kìŋsìn ven moo kay yeé ŋkàlaʼ, a wìr dzə̀m wo wù nəə shúu kày wíy a ndzəʼ, a burí mo.

¹⁹Vèn yòʼ kfə̀n wíy a shìy a dzə̀ shúy, kìn ŋwee ji wú wáa ban, a fo ven rán. Kù wíy a dzə NYÙY TÀR woo Nyùy won rán ye yí gòʼòn kàŋ mòʼón. Kù dzə̀ wun wo wù wíy gòʼ ji viwìr vén.

²⁰Shùy yen yòʼ kfə̀n wíy a ndzəmén, a ŋwee yòʼ kfə̀n wíy a ndzəmén sa, bìʼ fo kù wíy a dzə NYÙY TÀR woo Nyùy won rán ye yí gòʼòn kàŋ mòʼón. Kpú ye vèn rə́si diyìi wíy mày fo věn nsàn.

²¹Wír vén adzə̀m veé Israyi wíy a ghan e Nyùy mbòv. Áwune wíy yòv nsay ji vitsə́ʼ vév ŋkuuŋkùŋ. Áwune wíy a dzə moo kitiír ke m bìyìn. Dzə̀ wír vém féyì feyì, a bòm mo áwune e wó yémé. M yiì bèy ji wíri fíʼ a burí mo.

²²M wíy yiì, é láʼ wìr ye yí dzəə̀n e shàri táʼám, e kfə̀n ji rám ye kuʼùné. Wír vén ve á dzəə̀n là ndzə̀né wíy kfən ji kitúm ke wiy kí. Wíy yiì mo woo NYÙY TÀR vinyo vìn. Ghán sí wíy gheén, é m yii, é ví koóy nsənnsən.