Read Lamnso Aysaya 61 Bible Online

Aysaya 61 - Lamnso bible

Aysaya 61

¹Kiyoy ke NYÙY TÀR woo Taà Ndzə ki shiy mo, bìʼ fo NYÙY TÀR yoʼon ne mo, e tùm ji m wáa fiʼtì sáʼka wo juŋ e vé ŋgeʼe. Wù‑uù tùm mo ji m rəər wír ve melív mev mè seèmèn ne, a tiisí e wír ve á koon é shùu rərí ji á yíi bòyìr áwune fó vikwàn, a tiisí e vé sháŋé ji á sí lo, e fəə́r áwune fó lav sháŋ.

²Wù‑uù tùm mo ji m wáa fìʼtì ji kiyá kìn ki sì ke Nyùy buʼ wír və́, a kfə̀n dzə̀ kishiíy ke wù siir ŋkfə́tír, e màʼ ŋgeʼ aàŋgàa vibàné kitu. Wù tùm ne mo ji m rəər melív me wìr dzə̀m wo wù diyì.

³Rúrú, NYÙY TÀR tùm ne mo ji m sə́mér wír ve á diy e Sion. Wù tùm ne mo ji m sə́ʼsí kibvə́ fo áwuné wùn, e sòv tán vibuùshì aáwuné kitu, e yiì, aáwune wáa yu vijuŋ moo wír wo á bòrìn virə̀ʼtìn ve bìʼ e wùn wó, e làa yòʼ dzə́ə a dìy. Aáwune kú a yòv a dzə̀ lúŋ nsùyrì, e làa yòʼ kfə̀n a sòv kitú. Áwune wíy a dzə moo kicí ke bìyìn wun woo NYÙY TÀR, kí téʼ, e rə̀ŋsìn. Á kù wíy a yiì a dzə̀ vinyo ve ru ví, é wíri wáa koʼór yír Nyùy, bìʼ kinyo ke wù yiìn.

⁴Áwune kfə̀n wíy bàʼrì virə́ʼ vév ve ví‑iì siìn é vifə̀m, e siìr fo. Virə́ʼ, a vé‑eè yiì ne laàr fo yàŋgùʼ. Á kfə̀n wíy naŋsín ŋkà se laʼ se vé‑eè laàrìn ne. Kifá kidzə̀m ke vé‑eè laàrìn ne fo yàŋgùʼ, á kfə̀n wíy naŋsín.

⁵Éè wìr vem, wíri wíy a wìy fo vitum, a shìy njiì won. Áwune wíy a lìm súm sén sé vifa ve yi, a lìm sé vitiír vé *vayin,

⁶aá kù wíy a yòŋ ven ji atàá cù NYÙY TÀR. Wìr dzə̀m wíy kiíy feyì ji vèn dzə̀ á vé lìm NYÙY TÀR. Vèn wíy yòv bùʼ woó vitum vímóʼ ví nyanyày, a vèn wíy a yu vijuŋ bìʼ bùʼ woo shooy.

⁷Fə̀m mo vèn dzəə̀n é mvə̀m nshoórmé, ké lèn ki, á yíi ghvəm ven, e shaàsìn. Fə̀m mo vé‑eè yiìn ne, vèn wáa woomé, vèn lo lèn, a yu vijuŋ, bìʼ kirə́ʼ ke NYÙY TÀR lo, e dzə̀ʼə̀r ven shó. Nyùy wíy səə̀vì ven, e dzə̀sì nsay ye vèn dzə́ sho, a vèn wíy a yu vijuŋ, e dù, e jòʼsì.

⁸Kí wíy a dzə bèy, bìʼ fo NYÙY TÀR suuy jii, «M koŋ kém ji á kú a yiì kinyo e wìr dzə̀m là kiloʼ. Rúrú, m bàn vishóŋ, e bàn jay woo jáy e kúmé. Wíri wíy lòo ghan e mǒ mbòv, é m laámé áwune, kù mo m yii yii vinyo vém tìítiy. M wíy gwàr *mensaŋ vèr áwune, me mè wíy a tiy fo, e dù, e jòʼsì.

⁹Wír veé vitum vímóʼ vií wíy kiíy rám wìr vém, a ghvəm áwune. Á kù wíy a ghvəm ŋgwàʼ se wìr vém virə́ʼ vidzə̀m e wírí mvəm. Rúrú, á wíy a kiíy rám wìr vém, a yen ji dzə̀ á wír, wír feyì, ve NYÙY TÀR səə̀vìn é dzəə sí dzəə sí.»

¹⁰M yíi a sheʼrí NYÙY TÀR é ŋàŋén, shilív shém shí yíi a wùʼsì Nyùy wom. Wù lùŋèr ne mo, e kwàŋrì vinyo vém, e bòyìr mo, wáa dzə mo wù màʼ a dzə̀ kikúm ke fíy ki e mǒ wùn, m wáa dzə moo lum jìn wo wù naŋsin wún, a dzə moo jín wo wù wayrin wún e vifá ve sùsù vi.

¹¹Kù mo tíŋ kifaa lo, wú fəə̀ fó nsay, a kuy, bo kù dzə̀ mo NYÙY TÀR woo Taà Ndzə wíy bòyìr wír və́, é vitúm vidzə̀m vi yén, a burí wun.