Read Lamnso Aysaya 62 Bible Online

Aysaya 62 - Lamnso bible

Aysaya 62

¹Bìʼ koŋ ye m kér fo wír veé Sione, m yòʼ yíi yàr fó a toŋ e Nyùy ji wù sə́ áwune. Bìʼ áwune vee wír veé Jerusalem, m kù yíi a nəə́ aáwuné kinyò, là meemè. M kù yíi a nəə́, e dù, e meé mo Nyùy wíy yiì, é vinyo vév vee réŋ ví fəə́sín. M kù yíi a tom, e meé mo Nyùy wíy lùŋèr áwune, é wíri yén, kù moo ji bán kikaʼày.

²Éè wìr veé Jerusalem, vitúm vi wíy yen mo vèn yov nsiì. Afon adzə̀me wíy yen vikuʼùy ve NYÙY TÀR foon e vèn. Á wíy a yòŋ ven lèn, a dzə̀ é yir ye fíyi ye NYÙY TÀR wíy shù ven shó.

³Vèn wíy a dzə wír NYÙY TǍR ntayi, kù moo ntáráʼ və wo wù boŋkìrì, e kù a dzə fo wun moo *síbaŋ ye wù léŋri.

⁴Wìr yòʼ kfə̀n wíy mvə̀ʼ shuu, e yòŋ ven ji «Ŋkàlaʼ ye á màʼàyìn ne.» Á yòʼ kfə̀n dzəə́ wìy a yòŋ woŋ wón ji «Vifə̀m.» Ké lèn ki, á wíy a yòŋ ven ji «Ŋkàlaʼ ye Nyùy koŋè», a yòŋ woŋ wón ji «Woŋ wo kér NYÙY TÀR.» Á wíy a yòŋ bèy, bìʼ fo NYÙY TÀR sí léŋri ven, kér woŋ wón, kù mo lùmèn keèrí wiíy wo wù wayin é lav.

⁵Sion, mo wánlè nsùm wáy wiíy e lav, wù wàa ker, kù dzə̀ sá mo wír véné wíy a ker ŋkàlaʼ yen. Mo wánlè nsùm kooy wiíy, wù wàa leŋrí, kù dzə̀ sá réŋréŋ mo NYÙY TÀR wíy a yu vijuŋ vén.

⁶NYÙY TÀR yoŋ jii: «Éè Jerusalem, m lèm ne vé ŋkiyi e věn kitu ke kày yeé ŋkàlaʼ. Áwune kù yíi a dzə fo e shùy, à vitsə́ʼə́, a fuŋ kinyo ke á yéné, a bó áwune yòʼ wíy sətí shuu.» Á bèy, ven vee vé ŋkiyi ve vèn kér fó a kuumé kíghàʼ wìr veé Isray e NYÙY TÀR, vèn wáa yen fó yàr lim ye vèn kér fó yiì.

⁷Vèn kú a ghiʼ NYÙY TÀR e bunrìi, e dù, e meé mo wù yíi yiì, é kitú ke nsay kidzə̀m ki wáa burí Jerusalem.

⁸NYÙY TÀR‑iì kan yír rə́ ye ghaʼtíné, liʼ jii, «Feyì feyì, m yòʼ dzəə́ wìy fo kilíŋ aàŋgàa vibàn véné, aá kuúy viyíkìr ve vèn gisin, e lìm ji á du, a yi, a no meluʼ me vèn‑eè yenen ŋgeʼ, e bóo lìm, e kam.

⁹Kù wíy a yi wír vén vifá ve yi ve vèn lìmèn, e kàv, a yi, a burí NYÙY TÀR, é wír ve á koy tútúʼu wáa no meluʼ me á kamen fó fo, a no e maàndzə yee NYÙY TǍR lav.»

¹⁰Wír veé Jerusalem, vèn fəə́ ŋkàlaʼ yen, e nàŋsín dzə́ə ye wír véné wáa kfən sho fo kwaʼ nsàm. Vèn náŋsín virə́ʼ ve ví birin é dzəə ví vidzə̀m, e tsə̀ʼ tíyí fó fo. Vèn navtì, á kòʼór cícíwàr, é vitúm vidzə̀m vi yén.

¹¹NYÙY TÀR tsə̀nsí ne ntum kitú ke nsay kidzə̀m. Yì dzə̀ ji á ku tiìsí e wír veé Sione á jii, «Vèn leéy, Nyùy won sí wiy ji wun luŋer ven. Rúrú, wù wiy, kér vilaámé vén. Wù wiy e wír vén ve wù bòyìrìn ne fo kwaʼ nsàmé.»

¹²Á bèy, á kù wíy a yòŋ áwune jii, «Wír wun woo NYÙY TÀR, Naaŋkàntì wìr ve NYÙY TÀR tinen.» Á wíy a yòŋ Jerusalem ji «Ŋkàlaʼ ye Nyùy kér shií shó», a yòŋ jii, «Ŋkàlaʼ ye Nyùy yòʼ yii laysìnè.»