Read Lamnso Aysaya 63 Bible Online

Aysaya 63 - Lamnso bible

Aysaya 63

¹Ŋgaà ŋkiy gháy jii, «Dzə̀ la wo m yén, a wù wiy fo Edom? Dzə̀ la wo wù wiy fo ŋkàlaʼ yee Bosra, a vikúm ví dzə̀ mensə́ mensə́? Dzə̀ la və̀sə wo wù wiy, a wù máʼ ndzə̀y se sí din vikuʼùy, wiy e vitaáví ve wiy ví?» Ŋgaà wo wù kì wiy və̀y bínér jii, «Dzə̀ mo wo m lo, e kwàŋrì vinyo, é ví fəə́sín é dzəə yee réŋ. M kér vitaáví ve dzə̀ m bòyìr ven.»

²Ŋgaà ŋkiy dzə́r shó jii, «Ndzə̀y sé si kiʼ mensə́ mensə́ bèn, a dzə̀ ka? Sí baŋ ka moo sé wìr wo wù nyeŋ tútúʼ melùʼ bèn?»

³Wù bìnèr jii, «M wiy a dzə̀ fo m kì nyeŋ vitúm, kù mo wìr nyèŋ tútúʼ melùʼ e bii, a m kù kì nyeŋ vèr mòʼón, a wìr yoʼ wìy ji wun sə́ mo. M kì nyeŋ áwune e dòʼshwiíy, mensə́ mev mè saámé, e shìm ndzə̀y sém.

⁴Kí dzə̀ jii, m lèm ne kishiíy ke m lo, e siìr ŋkfə́tir wìr vém, a sì ghán se m lo, e tin áwune fó vikwàn ve á reŋè.

⁵Mò‑oò mùm féyì ji m sà‑áà koóy wír wo wù sə́ mo á, yii bèy, wìr yòʼ‑oò lo fəə̀sín, fə̀m e mòʼón, kí jívír mo féyì. Á bèy, m nen kù tòn aŋgaà vém vibàn, a dzə̀ e vém vee vitaáví ví. Dòʼshwíiy wom‑eè bànrí mo, m tòn áwune.

⁶Mò‑oò shwìíy kilòŋ, e nyèŋrì vitúm vee aŋgaà vém vibàn. Rúrú, mò‑oò màʼ ŋgeʼ aáwuné kitu, vifií vév ví lày, kù moo ji á nò noón, m sə́ʼsí áwune, mensə́ mè leém, e nə̀ə́ e nsay.»

⁷M yíi a suŋnín kùm koŋ NYÙY TÀR ye wù kér fo wír vəə́, a yí yòʼ yii mayì, a remrí vinyo ve wù yii ve dzə̀ á wàa burí wun fo fo. M yíi a naàrì vinyo vìn, a shaà fo vinyò ve NYÙY TÀR yiìn e vèsən, nyanyày vinyò ve juŋ ve wù yiìn e wír veé Israyi réŋréŋ mo shammèndzə̀n və yii dzə́. M yíi a naàrì vinyo vìn, a shaà fo kòŋ ye wù yii koŋ wír və́ é ŋàŋ, tíy wùn áwune.

⁸Wúnwun‑eè ló a suúy jii, «Rúrú, wír veé Israyi dzə̀ wír vém. Wón vém féyì, a bó á yòʼ wíy boʼtí mo.» Á bèy, wù ku nèn lì áwune é wùn, a dzə Mfə̀ə́r wov.

⁹Vé‑eè lóo yen ŋgeʼ, a fə̀m dzə̀ rəné, wù kù a yen sa, e bóo lò, e tum nshìylav ye yì‑iì dzəə̀n e wun mentsə̀m, é yì fəə́r áwune fó fo. Kèʼ mo áwune‑eè kèʼèn, a dzə ji kitúm, wù kú a kòŋ áwune, a sham. Wù‑uù bòyìr áwune fo aŋgaà vév vibàné wo, kù mo wàn ghán, dórí, kitàr kí jàjàŋ.

¹⁰Yii bèy, áwune kú a tsəy kóy wùn à NYÙY TÀR, a tinsín Kiyoy kfə́ ke Ranén kí. Bìʼ bey, NYÙY TÀR nèn lò, e kfə̀n ji ŋgaà wov vibàn, wúnwun kitú kfə́ wáa ghiʼ áwune.

¹¹Á bèy, wír veé Israyi nèn kuùmé ghán sé mbìy si, ghán se NYÙY TÀR‑iì yii vinyo aáwuné mvəm, shaa fo Mooser. Áwune nén a ghay jii, «Ŋgaà wo wù‑uù tòʼòn dzə́ə é rìbà ndzə̀v, e tùmér vilìmbìy veé Isray sho bèé? Wìr wo wù‑uù tsənsin Kiyoy kfə́ ke Ranén kí, kí wáa dzə e wír veé Israyí mvəm bèé lèn?

¹²Wìr wo wù‑uù foon vitaáví e Mooser, wù wáa yiì viŋgaʼnìn ve vinyò bèé lèn? Wun wo wù‑uù toʼnin rìbà ndzə̀v mbìv sibaà, wíri túm shó, á kuúme yír rə́ e ŋgwàʼ sí ŋgwàʼ si bèé?»

¹³Wù‑uù danèr wíri, aá shaa e mvə̀m rìbà ndzə̀v kicaárín, kù moo nyambàràʼ ye yì léʼ e nsay siy, e laà yòʼ a bàyrìn.

¹⁴Kiyoy ke NYÙY TÀR kí‑iì yiì, wír veé Israyi ghán kijuŋ ji nyaáŋ nyaáŋ, kù moo nyám se sí səyin é kiwoóy, e nò mendzə́v, e neèm, a meèmè. NYÙY TÀR, á mo wò‑oò danèrìn wír vé ji weè weè, e bóo koʼór yír yé, é wíri wáa ghvəm wò.

¹⁵Éè NYÙY TÀR, mo à dzəə̀n é yuv, kú a shooshí vinyo vér ví. Ku lèéy vinyo vìn vi fo wò kirə̀ʼ ke ranén kí ke kí din vikuʼùy vé. Éè NYÙY TÀR, yiì ka lèn fo à kfə́n a ker shíi wor, a sə ver e vitaáví vé ve ghaʼán ví? À yòʼ dzəə́ din e vèr mo à yii shám wón vé.

¹⁶NYÙY TÀR, à dzə̀ Tàr wor. A fə̀m dzə̀ ji Abraham méŋ ver, Isray méŋ sá ver ji vèr yòʼ dzə̀ wír vee wun ram, éè NYÙY TÀR, bo à kù dzə̀ Tàr wor. À kù‑uù sì Mfə̀ə́r wor, e kèʼ fo yàŋgùʼ.

¹⁷Éè NYÙY TÀR, à màʼtì ji vèr bin ndzə̀m, e làa yòʼ a ghan e wò mbòv ji ka? À yiì ji melív mer mè kosin fo wò wùn, é vèr tén fó a ghvəm wò bìʼ ka? Ku kfə̀n é bàm, e sə̀ ver, vèr dzə̀ aŋgàa lìm vé. Ku sə̀ rám seé Isray se wò‑oò shoʼon ji wír vé si.

¹⁸Lav cù yè‑eè dzə̀ e wír vé vee jeéy víné kiwo fo shintàm shishàr, ké lèn ki, aŋgaà vér vibàné laàr ne lav cù yè yee shooy.[92]

¹⁹NYÙY TÀR, vèr kfə̀n ne ji wír ve á yòʼ‑oò ghàn ne a dzə e wò sar saʼ, e kfə̀n ji wír ve á yòʼ‑oò ghàn ne a yòŋ ji vé vee wír.