Read Lamnso Aysaya 64 Bible Online

Aysaya 64 - Lamnso bible

Aysaya 64

¹Éè NYÙY TÀR, la à kù si shùʼ rì yúv, e sə̀y é nsay, e lùŋèr ver a? Kii wò, ku sə̀y, áàgwane yén wò, a fàn, a yàʼ.

²Mo və́yí koó e vidaànè, wú wàa ghàŋèn, lóo shwi e sar mendzə̀v, mè tòʼ, bo dzə̀ réŋréŋ mo à ló səy, é vitum vi wáa yàʼ, a fàn wò. Ku wìy, e yiì, áàŋgaà vé vibàné kiíy nsàv ye yír yée dùnìn.

³NYÙY TÀR, wò‑oò ghàn sə̀y é nsay fo yàŋgùʼ, e yiì viŋgaʼnìn ve vinyò, vèr kóʼ shó koʼón. Wò‑oò sə̀y é ghan sin, agwane yén wò, a fàn, a yàʼ.

⁴Kèʼ fo ŋgwàrìn wòŋ, bó wìr yòʼ‑oò ghàn ne yù, a bó wìr yòʼ‑oò ghàn ne yèn Nyùy wo wù dzəə̀n moo wò, Nyùy, wo wù leey fo wír ve á yoy, tiir e wun wùné.

⁵À lo, à wàa sheʼrí wír ve á yii vinyo vee réŋ ví é shiliv she juŋ shi, wír ve á kuúme ntir sé, ghán e wò mbòv. Yii bèy, wò‑oò shwiiy kilòŋ vèsən, bìʼ fo vèr‑iì jayin e wò. Rúrú, vèr kù‑uù sí buʼtì vinyo, tónenè, e kèʼ fo yàŋgùʼ, bo dzə̀ vèr kfə̀n ghàn é le lèn, e bóo wìy lùŋ?[93]

⁶Vèr kfə̀n ne ji vé *kifàné adzə̀m, fə̀m vinyo ve juŋ ve vèr yiìn ví kù kóʼoy kòʼòyín, kóʼoy, kù moo kinsàr ke ndzə̀y ke mensə́ mè lorin ne. Vinyo vér ve bi ví yiì ne, vèr soóy moo vav se vici, vav se shwéri feer, du sho.

⁷NYÙY TÀR, wìr wo wù kfə̀n bunrì wò yòʼ dzə̀, a wo wù kfə̀n yéʼti e wò wùn ji à sə́ wun yòʼ dzə̀. Bìʼ bey, à bìn ne ndzə̀m e vèr, e màʼtì ver, á wáa rèŋ vikwàn vé vinyò ve bi ví.

⁸Yii bèy, NYÙY TÀR, kù dzə̀ wò wo à dzəə̀n Tàr wor. Vèr dzə̀ kér nsay mbóm, aà dzə̀ ŋgaà mbom. Kù bòm wò ver wir dzə̀m e wó yée.

⁹Éè NYÙY TÀR, lá à yòʼ shwìíy kilòŋ vèsən, e tònén. Lá à yòʼ wìy rə̀sí, a kuumé vinyo vér ve bi ví, a màʼ ŋgeʼ e vèr. Éè NYÙY TÀR, kú a kiíy ji ver adzə̀me dzə̀ wír vé.

¹⁰Ŋkà se laʼ se wò‑oò shoʼon, e lèm ji see jeéy ji wír vée wáa dzə sho, ké lèn ki, sí sí tíynin kisáŋ là wír moo wóʼ. Rúrú, Sion kfə̀n ne ji kirə́ʼ ké woʼ, wun woo Jerusalem dù ne e vifə̀m.

¹¹Á tòn ne lav yè ye ranén, yì shwí e dzə̀m, lav cù ye atàr vérí‑iì suyrì wò fo, lav, a yì‑iì njaʼkìr, din vikuʼùy vé. Vifá ve melív mer mè‑eè tíy sho vi bvə̀ʼə́y ne.

¹²Éè NYÙY TÀR, mo kí siìn ben, dzə̀ rú ji à yòʼ dzəə́ yìi sə ver a? À kù sí lo rú, e fìnèn fìnèn, e màʼ a dzə̀ ŋgeʼ ye yì wáa dzə̀r, a ghaʼ ver a?