Read Lamnso Aysaya 65 Bible Online

Aysaya 65 - Lamnso bible

Aysaya 65

¹NYÙY TÀR ku nèn a suúy jii: «Mò‑oò dzə̀ kibáʼtín féyì ji m sə́ wír vém, fə̀m mo áwune yòʼ‑oò ló ne màʼ jí ji m sə́ áwune. M kù‑uù ló a tàʼ ji m sə́ áwune, fə̀m mo áwune yòʼ‑oò ló a dzətí mo. Kitúm kìn ki yòʼ‑oò ló a toŋ e mò ji m sə́ áwune. Yii bèy, a m kù yoŋ kém jii, ‹M dzə̀ fen, a m dzə̀ kibáʼtín fó sə ven.›

²Fə̀m mo wír veé Israyi‑iì sə́ kóy vèr áwune, m kù‑uù rə́si shiy áwune ji m mán vinyo vév. Áwune kù yii a dzə̀ vinyo ve kisaŋ vi, kù tíy e kinyò a dzə̀ ke kí gheen áwune.

³Wír vìn adzə̀me dzə̀ ayìíkum. Á kù tínsin mo kishiíy kidzə̀m, cu anyùy,[94] ton kiláy é kiy anyùy.

⁴Áwune du, dzə́ e virə̀ʼ ve á dzəəmè wíri fó. Á du, á shìíy fó vitsə́ʼ vifur, e kù a taŋrí a dzə̀ aŋkfə. Áwune kfə́r kǔnnyàm, kfə̀n kfə́r nyám se koʼoyín símóʼ sí, nó nshèv.

⁵Áwune yii bèy, lo, á kfə̀n a nyàysì wír ámóʼó, a suuy jii, ‹Á yen fóo kùm mo, e lor mo. Lá à yòʼ kùm mo, à yoʼ ràn, m dzə̀ kém là shilóm.› Vinyo ve á yii vi tínsin mo, kù moo kindzə́ʼ ke kí ndzə́ʼ, nəə e wìr yuy. Áwune dzə̀ ji və́y wo wú baári ghán sidzə̀m, dzəmèr kindzə́ʼ.

⁶Vèn leéy, m wày ne kinyo ke m lo, e yiì aáwune, a kí sì kisáŋén. Kí dzə̀ jii, m yòʼ yíi kur tím, a bó m máʼ ŋgeʼ aáwuné kitu.

⁷M lo, e màʼ mo yii yéví dzəə̀n, e tatí yé atàr vév. Suuy mo woo NYÙY TÀR. M kù‑úù maʼ ŋgeʼ aáwuné kitu, bìʼ anyùy ve á cu aàgwan. Kù sì lám bey mo á té e mò fó, méŋ mo. M kù wíy màʼ ŋgeʼ aáwuné kitu, kù mo vinyo vév ve vé‑eè rə́si yii vi dzəə̀n.»

⁸NYÙY TÀR nèn kfə̀n a yòŋ jii, «M yòʼ‑óò laar áwune wír adzə̀m. Á lóo kam meluʼ fo tútúʼ, lóo màʼày kishaámé, wìr lo, wù kù a boòrì ji lá á yòʼ waà màʼày, mendzə́v memoʼ mè dzə̀ə́ a sho. Kù dzə̀ sá mo m yòʼ yíi laàr wír veé Isray adzə̀m, bìʼ aŋgàa lìm vém ve juŋ ve á dzəə̀n aáwuné mvəm.

⁹M wíy səə̀vì wír veé Isray ve dzəə̀n rám Juda, e fo áwune kidzəə́y, aá yov woŋ wóm woo agwan agwan. Áwune vee wír vém ntayi wíy yi fó ji vitsə́ʼ vév, aáwune vin vee aŋgaà vém lìme wáa dzə fo.

¹⁰Mboʼ Sharon wíy gheén e ye á wáa lèm anjiì vév fó, é Kiwoóy ké Akor ki gheén sá feyì e ke á wáa dànèr nyám sév fó ki, é wáa dzə vijuŋ ve wìr vém ve vé‑eè yár jíŋ yem.

¹¹«Yii bèy, kee kùm ven ve á shwèyìn NYÙY TÀR, e tèn fó a sùyrì mo e mǒ gwan wo ranén, báʼti a dzə̀ ŋkǎʼ nyùy woo Gad woo nyùy vishi ve juŋ vi, kù njiir meluʼ e mbìʼ sí ji me nyùy woo Meni wo wù siysì dzəʼə̀m wìr,

¹²m yíi yiì, é vèn kpú kpú mensəə. Kù yíi lò ven, e gvəʼə́r vitú vén, é bo á sheti. Kí kér fó wìy koóy bèy, bìʼ fo mò‑oò jàŋèn ven, vèn tén fóo ghay, a suŋnín e vèn, vèn tén fóo yuurí.»

¹³Á bèy, ke NYÙY TÀR woo Taà Ndzə suuy ki dzə̀ jii, «Wír vémé wíy a ker kifá ké a yi, yii bèy, a vèn wíy a dzə kén e jìŋ. Wír vémé wíy a ker kifá ké a no, yii bèy, a vèn wíy a kpu kilòŋ ke yumén kí. Wír vémé wíy a yu vijuŋ, yii bèy, a vèn wíy a dzə kén a dzə̀ é nshoórsí.

¹⁴Kishéʼrì ki wíy run e wír vémé shiliv, aá wáa yòv, yii bèy, tímé wíy ndzəʼ ven, é vèn wáa toŋnín. Vèn wíy a dìy, a jeetí, bìʼ nyár ye yí wíy a kèr tím yén.

¹⁵Wír ve m shoʼoné wíy lì yír yén ji lòn, a ròʼ aŋgaà vév vibàn shó. Mo woo NYÙY TÀR woo Taà Ndzə kù wíy yiì, é vèn kpú kpú mensəə. Yii bèy, ké aŋgàa lìm vém ve ruú, m wíy kuvsín yír yév, e fo ye səné.

¹⁶Á bèy, wìr dzə̀m wo wù wíy a lon kisəəvì é nsay Isray, wù kù wíy a kàn a dzə̀ yír Nyùy wo ru, é wìr wo wù yí kilìʼ, kú a lìʼ, a kàn a dzə̀ yír Nyùy wo ru. Kí wíy a dzə bèy, bìʼ fo m wíy neèr dòʼshwíiy wom, e làysìn vinyo ve bi veé fiirí.»

¹⁷NYÙY TÀR suuy jii: «M sí bóm yúv wo fíyi wùn à nsay ye fíy, a bó wìr yòʼ kfə̀n wíy a kuumé vinyo veé yuv wo mvəə́, kìn ji veé nsay ye mvə ví wáa wìy e wun vifii.

¹⁸Vèn ku nèn a sheʼrí, a yu vijuŋ ve kimbom ke m wíy bom. M wíy bom Jerusalem, é fóo wáa dzə kirə́ʼ ké kisheʼrì, é wír vee fóo wáa dzə vé kisheʼrìi.

¹⁹Mómò, m wíy a yu vijuŋ ve Jerusalem, a leéy áwune, a kòŋ, a bó wìr yòʼ kfə̀n dzəə́ wìy yu tóŋ, a yí kóʼ fo fo, kìn ji wìr wáa toŋ, a jeetí.

²⁰Wan wo bór yòʼ kfə̀n dzəə́ wìy a shèsìn, a bó ŋgàywìr yòʼ kfə̀n wíy a kpu, a bó wù shiíy ben, e kòŋrí. A wìr kpù kiyá wií, bo wù kù shèsìn shèsìn moo wán wo bór, wìr kpú, a bó wù yoʼ mày kiyá wií, bo koò lǒn Nyùy wun.

²¹Wíy lòo dzə e ghan fen, é wíri wáa bàʼrì láʼ sév, a dzə sho. Áwune wíy a lìm vitiír vé *vayin, a kfər báŋ se vitiír vin.

²²Áwune wíy bàʼrì lav sév, é la wìr wo sən yòʼ wìy a dzə sho. Á lim vifá, é la wìr wo sən yòʼ yì. Mo vicí ví shiiy viyá vinín, kù sì sá mo wír vémé wíy a shiíy. Áwune ve m shoʼoné wíy bonén, a yu vijuŋ ve vifa ve á keŋen.

²³Áwune yòʼ wíy a keŋ kéŋ, é yí wáa lày kisáŋ, a bó á yòʼ wíy a dzəə́ wón, é kifá ki wáa sə̀ʼ. Áwune wíy a dzə kitúm ke NYÙY TÀR səə̀vìn, e səə̀vì bèn wùn à rám yéví.

²⁴Á wíy a jì ji á wáa toŋ e mò, a m biímé ne, lóo bunrì, aá dzəə́ bunrì bùnrìn, a m yú ne.

²⁵Akoosàʼ wùn aànjìi wíy a yikír kirə́ʼ kimòʼón, é bvərə̀ʼ wáa yi viyíkìr a dzə̀ ve yí nyám si, a viyíkìr ve yò vi kù sí wìy a dzə nsay. Kifá ki yòʼ kfə̀n wíy a lemér kímóʼ kí e mǒ gwan wo ranén, a bó kímóʼ kí yòʼ kfə̀n wíy a yuyrí kímóʼ kí. Suuy mo woo NYÙY TÀR.»