Read Lamnso Aysaya 66 Bible Online

Aysaya 66 - Lamnso bible

Aysaya 66

¹NYÙY TÀR suuy jii: «Yúví dzə̀ kàvàʼ wom, nsay wáa dzə kibur ke m tiir wúu yém shó. A dzə̀ wìr bàʼrì lav ji yéem, a yìwun dzə̀ moó le? Kirə́ʼ kí dzə̀ shó ke dzə̀ m dzə̀ʼə̀m shó a?

²Bó yòʼ‑oò fèr mo vifá vìn vidzə̀m à? Rúrú, á mo vifá vìn vidzə̀m vi‑iì ghanen, e bó a dzə. Suuy mo woo NYÙY TÀR. «Á bèy, kfə́ə wìr wo m yíi a leéy, a yu vijuŋ dzə̀ wo wù li kitú kfə́ fó tèr, bórkir e mǒ si, yú jí yem, fan fó lì fo tèr.

³Yii bèy, ké wìr wo wù ŋwáy mo kí dzə̀ kfə́ jii, wù cu mo e mbòŋ, m kù a lì kém wun moo ŋgaà kinjuyrì. Wù cu mo e wàn njiì, m kù lèéy kém wun moo wír wo wù cu mo e jwi. Wù cu mo e viyíkìr vi, m lì kém wun moo wír wo wù cu mo e mensə́ me kǔnnyàm mè.[95] Ŋgaàŋ lóo tòn kiláy kee *frankinsen ji m wáa kuumé wun, m wàa yen kém woo shooy moo wír wo wù mbaa a dzə̀ anyùy. Rúrú, kfə́ə wìr vee béne ŋwày ne mo, e kù a yiì a dzə̀ vinyo ve ví gheen áwune. Á kù sí yú vijuŋ, a dzə̀ e vinyo ve kisaŋ ve m yòʼ tíy sho vi.

⁴Bìʼ bey, mo woo NYÙY TÀR yíi màʼ ŋgeʼ aáwuné kitu, e yiì, é kinyo ke áwune fan fànèn kí wáa dzə kíwun ke kí lo, e koóy áwune. M yíi màʼ ŋgeʼ aáwuné kitu, bìʼ fo mò‑oò jàŋèn áwune, á tén fóo ghay, a suŋnín aáwune, á tén fóo yuurí. Áwune ló fó fo, a bùʼtì a dzə̀ vinyo e mǒ si, a dù duùn fó mbìy, e kù toòmé a dzə̀ kinyo ke kisaŋ ki, liì, aá kì ji wù tínsin a mo.»

⁵Vèn yuúrí kinyo ke NYÙY TÀR suuy ki, ven ve á kér shií ji á yuúrí jí NYÙY TÀR, fan fó lì fo tèr. Wù suuy e vèn jii, «Afə́r vén veé Isray ámóʼó ban ven, méŋ ven, bìʼ fo vèn yoy, tiir a dzə̀ e mǒ wùn. Áwune té lám jii, ‹Nyùy din ri vikuʼùy və́, e bòyìr ven, é vèr yén mo vèn shéʼri.› Áwune té lám bey, a dzə̀ áwune ve m yíi yiì, aá wáa woomé.

⁶Vèn yuúrí, kiyor ki kóʼ fo ŋkàlaʼ Jerusalem. Kí kóʼ fo lav cù, a dzə̀ jí NYÙY TÀR, a wù sí maʼ ŋgeʼ aàŋgaà və́ vibàné kitu ji vilaʼày vév.»

⁷NYÙY TÀR wáa shaà fo mbìy, a suúy jii, «Ŋkàlaʼ rə̀n dzə̀ moo wiíy woo dzəə́, e bó a lum wán. Wiíy, wo wù dzəən wán lumèn, e bóo yu sòv wàn.

⁸Wìr dzə̀ shó wo wù‑uù ghanen ne yù, a kfə́ə kinyò kee ben ki koóy a? Wìr‑iì ghàn ne yèn kfə́ə kinyò kee bén a? Vé‑eè ghàn ne gwàr woŋ kishiíy kimòʼón a? A dzə̀ á sàsìn, e lì shintsə̀mén shé ghan, e fèr kitúm a? Yii bèy, á mo ké Sion ki dzəə̀n. Sion‑eè sàsìn, e kfə̀n ji kitúm kàŋ mòʼón, kù moo ji yù wiíy wán, e nèn kù rə̀ʼtí, e dzə̀ə́.

⁹A dzə̀ m mvə̀ʼ kidzəə́y ké wiíy, wù tìím bvəm, m kfə̀n ghàr wán é bvə̀m wo à? Suuy mo woo NYÙY TÀR. A dzə̀ mo wo m yii, é bo vikìy wáa dzəə́, m kfə̀n ghàn é le, e bóo sətí bvə́m wiíy fo wù dzəə́? Suuy mo woo Nyùy won.

¹⁰Á bèy, ven ve á koŋ ŋkàlaʼ Jerusalem, vèn wáa sheʼrí, é vèn áwune wáa yu vijuŋ. Ven adzə̀m ve vèn‑eè sov kitú, bìʼ ŋgeʼ ye yì‑iì nəə Jerusalem, vèn tátí áwune, é vèn áwune wáa sheʼrí lèn,

¹¹é vèn fiʼ nə̀ə́ e vikùʼùy ve NYÙY TÀR bùʼùn Jerusalem sho, réŋréŋ mo wàn yii nyóŋ vín kiyìy, yí yiì, wù kùr.»

¹²NYÙY TÀR suuy jii: «Rúrú, m yíi fo wír veé Isray vikuʼùy, é ví wáa leŋ moo ndzə́v ghán sidzə̀m. M yíi lì bùʼ wo vitúm vi kér nyanyày, e bùʼ áwune shó, é wù wáa dzə moo ndzə́v ye yí léŋ, fəə́ e meshavtí. Á bèy, é ven ve á koŋ Jerusaleme wáa yu sa vijuŋ, moo wán wo wù lóo nyoŋ vín, kiyìy kí kìkí, a nyòʼtì.

¹³M wíy a rəə̀r ven, réŋréŋ mo kiyìy kí yii rəər wán. Á wíy siìr Jerusalem fo, é vèn koóy rəsìn.»

¹⁴Á bèy, vèn wíy yen kinyo ke NYÙY TÀR yii kìn, é vèn wáa sheʼrí feyì, réŋréŋ mo viŋgà ví yú nsay, ví wàa bòʼrì. Wíri wíy yen ji NYÙY TÀR yii sə́ a wír ve á ghán e wun mbòv, yii bèy, a wù yii shwiiy kilòŋ wùn à wír ve á méŋ wune.

¹⁵Rúrú, NYÙY TÀR wíy a wìy e mvə̀m kinsəm, a və́yí kaárí wun, e tàr, a wìy moo ŋgaà rə̀r wo wù wiy e wun kitentén ke səŋ nyám se ŋkoʼ. Wù wíy a wìy ji wun maʼ ŋgeʼlàʼ e wír ve bií kitu, a màʼ ŋgeʼ, a dòʼshwíiy və baári moo və́y.

¹⁶Kí dzə̀ jii, NYÙY TÀR wíy màʼ ŋgeʼlàʼ kitú ke nsay kidzə̀m, a wíy a dzə və́y wùn à rə́r sí. Á bèy, é wír ve wù yuyriné wáa dzə e mfòn.

¹⁷NYÙY TÀR suuy jii, «Lòné dzə̀ wó wìr ve á daa ŋgoo, du e viboo ji á cu anyùy fo, lóo dù, á wàa taŋrí vitú vév, e kfə̀n a *kfəmrí. Du bèy, á wàa kfər kǔnnyàm wùn à mbàv sí, à vifá ve koʼoyín vímóʼ ví. Á wíy tatí áwune adzə̀m, e yuyrí.

¹⁸M kì lím wìr dzə̀m, a m kì kwaʼtì yév. M wíy fo sáʼ, é wìr dzə̀m wiy, e yèn mo, kìn wù súŋnin lám a dzə̀ vəneé. Áwune wíy wìy, aá yén vitaáví vém ve wiy ví,

¹⁹e nèn kìíy kfə́ə wìr wo dzəə̀n mo, dzə̀ fó kisəəm ke m wíy dìn, a dzə̀ ŋgeʼ ye ghaʼán. «Wír ámóʼó wíy bòykìr, é m tsə́nsí áwune é vitum, aá du é Tarshish, e dù e Put, e dù e Lud fo wír vee fóo maʼ vinte. M wíy tsənsí ámóʼó é Tubal, e tsənsí e Javan, e tsənsí sa e vitum ve ví dzəə̀n é ŋguùŋè rìbà ndzə̀v. Vitúm vìn vi yóʼ ne yù yír yém ye yí dunìnè, e bóo yen vikuʼùy vém. Vé ntum vìne wíy a dù vitúm vidzə̀m, a fìʼtì mo vikuʼùy vém ví dzəə̀n.

²⁰Áwune wíy a lì afə́r vén fó vitum, a wìykìr sho e věn wòŋ, moo cu ye á wiy sho ji á fó e NYÙY TÀR. Á wíy a wìy sho e vitu ve nyàm se ŋkoʼ, a wìy sho e vitentén ve yii səŋ nyám si. Á wíy toór ámóʼó toórín áàntaʼ, aámóʼ vee wíri kóʼ vimbèʼbìy vé nyàmŋkoʼ wùn à áàkameri. Á wíy a wìy aàfə́r vén víne é Jerusalem, e mǒ gwan wo ranén, réŋréŋ mo wír veé Israyi lo, á wàa beʼ vifá ve yi, a wìy sho e mǒ lav ji á cu mo shó. Á kù yii béʼ a dzə̀ é vifa ve á kfəmrin ne, ví wáa dzə là *kifàn.

²¹M wíy shoʼtí sa wír ámóʼó fo wír vìné mvəm, e lèm ji atàá cù, e lèm ámóʼó, aá wáa yiì lìm seé lav cù. Suuy mo woo NYÙY TÀR.

²²«Mo yúv wo fíy wùn à nsay ye fíy ye m lo, e bom, kù wíy a tiy fo, e dù, e jòʼsì, dzə̀ réŋréŋ mo ŋgwàʼ sén wùn à yír yéné wíy a tiy fo, e dù, e jòʼsì.

²³Wìr msòŋ e dzə̀m wíy a wìy, a sùyrì mo. Á wíy a wìy ghán sidzə̀m. Ŋwee woo shóo fəə́, aá wáa wìy, e kù a wìy kishiíy ké bam ke Nyùy kidzə̀m. Suuy mo woo NYÙY TÀR.

²⁴Wír ve á wìyìn, e sùyrì moó wíy lòo fəə ŋkàlaʼ, aá yén dzə́n sé wìr ve vé‑eè rə́si tsə́y kóy vèr áwune, a sí néŋnin, shwí, a və́y wo wú ton áwuneé yòʼ wíy ndzəmén, a bó dzə́r se sí kfə́r áwune sí yòʼ wíy kpukír. Wìr dzə̀m wo wù wíy yen, wíy a nyaŋsí.»