Read Lamnso Aysaya 7 Bible Online

Aysaya 7 - Lamnso bible

Aysaya 7

¹Ghán símóʼ sí‑iì dù a dzə, a Ahas woo wan Jotam sáʼ ji fon woó Juda, a Jotam‑eè dzə̀ wan Ussiya. Wáa dzə e ghan see shooy, a Resin sáʼ ji fon woó Siiria[10], a Peka woo wan Remalia sáʼ ji fon woó Isray. Afon vee abaà víne‑eè wàm shuu sév sé rər ji á kóʼ, e tòn a Jerusalem. Yii bèy, á kóʼ, e làa yòʼ yu fóo tòn ŋkàlaʼ yee shooy.

²Fòn Ahas, wun wo dzəə̀n rám Fòn Davir‑iì yù ji kitúm kee Isray ki suùsín a ne wùn à kee Siiria ki, tímé kpú fo wùn à wír vəə́ bvə̀m, á wáa yàʼ, kù mo kar shwér vicí é kòv.

³Á bèy, NYÙY TÀR nèn sùúy e Aysaya jii, «Lì Shear‑Jashuv[11] woo wan wò, é vèn wun du, é vèn à Fòn Ahas tárnín. Vèn ku dù, e yèn wun fo ndzə́v ye liiné seeyin. Ndzə́v, aá lí a dzə̀ fó kisə̀m ké kùy ki, e dzəə ye yì du fo vé ndzə̀y ye baáné yii səv ndzə̀y, tsə́y, saŋè.

⁴Vèn yéné, á tiìsí shó ji mo woo Nyùy suuy a jii, ‹Ahas, à lóo yu kinyo, à wàa kwàʼtì kijuujùŋ. Dzə̀ʼə̀m ji nyaáŋ, e làa yòʼ a fàn kifá. Lá wúné yòʼ seèm wò, bìʼ dòʼshwiíy wo wù kív Fòn Resin woó Siiria wùn à shuu və́ rərí, e bóo lì Peka woo wan Remalia. Áwune dzə̀ kév moo vikótír vé meŋkàʼ, a ví kù ndzə́ʼ ndzəʼə́n.

⁵Dzə̀ rú, fòn woó Siiria suùsín ne wùn wan Remalia, wun woo fon wìr veé Isray, e bà menàŋ e wò bàm, e tàŋ jii,

⁶áwune yíi ghiʼ a ven vee wír veé Juda e rə́r sí, maʼ kimbemèr e wírí nsàn, aá faasi sáʼ, e nèn kòʼór a wan Tabeel[12] ji fon ji wù wáa saʼ ven.

⁷Yii bèy, mo woo NYÙY TÀR woo Taà Ndzə suuy jii: « ‹Antaŋ ve afon vìne baané yòʼ wíy fəəsín. Menàŋ me áwune baan mè wíy lày kisáŋ.

⁸Vitaáví vé wìr veé Siiria vi kù dzə̀ ŋkàlaʼ yev yee Damaskus, a vé Damaskus vi kù dzə̀ cáʼ ji Resin woo shifon shév. Fo ké wír veé Isray ki, kèʼ fo lèn, e wìy dù, e bàʼ kiyá nshòv sitàn e mntuùfú, aá táʼár áwune é dzəə ye bó yòʼ dzə̀ á kfə̀n wìy a dzə ji kitúm.

⁹Vitaáví vé wìr veé Isray vi kù dzə̀ ŋkàlaʼ yev yee Samaria, a vé Samaria vi kù dzə̀ cáʼ shifon shév shee wan Remalia. A ven vee wír vee rám Daviri dzə̀ làa yòʼ a yòy, a tiír a dzə̀ e mǒ wùn, ké ru kí, bo kitúm kén kí yòʼ wíy tiím.› »

¹⁰NYÙY TÀR kfən lò, e tùm Aysaya, wù dù, e sùúy e Fòn Ahas jii,

¹¹«A dzə̀ fòn kù lòn NYÙY TÀR woo Nyùy və ji wù fó á kisəəm ké kinyò ke wù‑uù kàʼàn wun sho. A dzə̀ fòn wàa lon kisəəm, a fə̀m dzə̀ kee ka, kìn dzə̀ kifá keé loònsay, kìn keé ntoò yùv.»

¹²Fòn Ahas bìnèr jii, «Bó yòʼ dzə̀ féyì m wàa lon NYÙY TÀR ji wù din kisəəm, bìʼ fo bó yòʼ dzə̀ m wàa taasín wun.»

¹³Á bèy, Aysaya bún fon wùn à wón ntoʼo jii, «Feyì à, áwune vee rám Davir, á wàá yuúrí. Áwune sà tànèr wíri, á dór, la kí yòʼ a jivír áwune á? Á sà yíi kfən, a tànèr sa Nyùy wom, a rəʼə́y wun a?

¹⁴Mo á tenen ne fóo lon kisəəm fo NYÙY TÀR, bo wúnwun woo NYÙY TÀR lo, e dìn a kisəəm aáwune. Á yuúrí á kijuŋ, wánlè ŋgòn woo shó wíy tiím a bvəm, e dzəə́ wán lumèn, dzəə, é wù shu á yír ji Immanuel[13].

¹⁵Wan və̀n wíy kuy, lóo kiíy mo dzə̀ wù tèn kinyo ke bi kí, e shòʼ a dzə̀ ke juŋ ki, a sì ghán se wù wíy a yi a dzə̀ nyèbàm wùn à vilu vi.

¹⁶Kí dzə̀ á jii, wan və̀n wíy lòo jì ji wun kiíy mo dzə̀ wù tèn kinyo ke bi kí, e shòʼ ke juŋ ki, a bó wíri yòʼ dzə̀ə́ e Siiria wùn á Isray anín, a fóo kfə́n á ne ji vifə̀m. Kù dzə̀ á vitúm ve afòn vee abaà ve fòn fan e ŋàŋ vin.

¹⁷NYÙY TÀR wíy tsənsí a fon woó Assiriya, é wù maʼ á ŋgeʼ ye tavín e wùn à wír vəə́ kitu, e bóo lì wón ntoʼ adzə̀m wùn à wón atàr və́ vee aŋkfəə. Ŋgeʼ sìn si wíy dzə̀r, e shaà se áwune‑eè yenen á ne, e kèʼ mo Isray wùn Juda‑aà jàvsìn, e kfə̀n ji vitúm jeéy jeéy.

¹⁸«Nyàr, á yuúrí á kijuŋ. Wíy lòo dzə e ghan fóo fèy, é NYÙY TÀR toóy vé rər veé Ejiv, aá wáa wìy, a kò a moo merə́rəʼ me mè loòn fó ŋguùŋè ndzə̀v yee Naay. Wù kù wíy toóy saa vé rər veé Assiriya, aá wáa wìy, a kò a moo yúu.

¹⁹Á wíy wìy, e sə a woŋ səə́n e dzə̀m moo yúu se sí gbuùn é wòŋ, e sə viwoóy ve ví kevrin səə́n, e sə vitú ve vilála, e sə kwáʼ woo fo vikwiíy vé njoŋ vi koom e dzə̀m, à kirə́ʼ kidzə̀m kee fo á lem nyám ki.

²⁰«Wíy lòo dzə e ghan fóo fèy, é NYÙY TÀR li á fon woó Assiriya wo wù dzə́ e ghaa ndzəv yee Yufret fo mbìv yee fó ndzən, e wìy sho, é wù kwaay kitú ke Fòn, à ké wìr vəə́, e kwaày wún, à kighev ki ji sì á akwàn və́.

²¹«Wíy a dzə e ghan see shooy, a lùŋfófo kfəə mòʼón mòʼón kù sì á wan nàʼ e mòʼón wùn aànjìi abaà cáʼcáʼ.

²²Yii bèy, aá kù wíy a ker a vín nàʼ nyanyày, a fəə́r nyèbàm fo fo. Viyíkìr ve wìr dzə̀m wo wù berin e fòn wùn à wír vəə́ nsay vi kù sí wìy a dzə a nyèbàm wùn à vilu vi.

²³«Virə́ʼ ve Fòn yén vìn ji súm se vitiír vé *vayin vi dzəə̀n shó nyanyày, súm se dzə̀ á fiìnè *ashekel ansə̀kì ansə̀kì, wíy lòo dzə e ghan fóo fèy, é wáa kuy a vimbìn wùn à vitiír vé njoŋ vi fó.

²⁴Wìr kù sí wìy a dù fo, a dzə̀ á e mvən wùn à kinte ki é kiwo, a dù sho bèy, a dzə̀ bìʼ nyám se sí ghán e mvə̀m kwaʼ, a kimbìn wùn à vitiír vé njoŋ vi sə́ ne a fó e dzə̀m.

²⁵Agwan adzə̀m ve á lim vifá fo lène dzə̀, a wìr yòʼ kfə̀n wíy a bàv a fo, aá léʼ a dzə̀ á kimbìn wùn à vitiír vé njoŋ ve ví sùmèn ne fó vi. Virə́ʼ vee shooy vidzə̀m vi wíy kfən a ji kwáʼ nyàm, é nàʼ wùn aànjìi wáa tàʼ a yí fo fo, a nyèŋ fó e wuú.»