Read Lamnso Aysaya 9 Bible Online

Aysaya 9 - Lamnso bible

Aysaya 9

¹Yii bèy, ndzə ye yì sə́n ji cùm, beéme rə̀n yòʼ dzəə́ wìy sùm wír ve vé‑eè dzəə̀n é mvə̀m ŋgeʼ. Nyùy kù‑uù sèn ne woŋ wo dzəə̀n wó rám Sebulon wùn à wó rám Navtalìi. Yii bèy, e ghan se sí wiyì, wù wíy bùʼ áwune e vikuʼùy ví, áwune ve á dzəə̀n é mbìv Galeli, e ndzə̀n ndzə̀v yee Jordan, e nsay ye yì taʼamen, e dù, e mèé e rìbà ndzə̀v, aá dzə́ fo wùn à vitum ve ví yòʼ kiìn Nyùy vi.

²Kí wíy a dzə jii: Wír ve vé‑eè dzə́ e ndzə vitsə̀ʼə́ yèn ne rán ye ghaʼáné. Wír ve vé‑eè dzə́ e wòŋ, a wú sə́n ji cùm, shùy tò ne áwune.

³NYÙY TÀR, à dzə̀sì ne rám wìr vé, yí kú a kùʼ kùʼùn, e yiì, áwune wáa yu vijuŋ, a shaà mo vé‑eè yú fo mbìy. Á shéʼri wò, réŋréŋ mo wìr yii káv vifá fo sum, wù wàa sheʼrí. Á yú vijuŋ, réŋréŋ mo vé rərí faasì vifá fo shùu rər, á wàa jàv, a sàvnìn.

⁴NYÙY TÀR, áwune shéʼri wò, bìʼ fo à beʼen ne kimbùŋ ke vé‑eè yúy áwune shó, e bèʼ mbàŋ ye vé‑eè dzəv áwune shó, e faàsì kibur ke vé‑eè nyavrì aáwune shó. À fə̀ə́r ne áwune fó ŋgeʼ, kù mo wò‑oò fəərin áwune fo wír veé Midiané wo.

⁵Á bèy, á kù wíy tòn alábáʼ ve vé rərí nyeŋ virə́ʼ shó e shùu rər, e tòn ndzə̀y sév se mensə́ mè shemen shó. Vifá vìn vidzə̀m vi kù yíi kfən ji vidaànè ve və̀y, e shwi, e mày.

⁶Kí dzə̀ jii, vèsən kòóy ne wán. Á fò ne vèsən wán lumèn. Wù wíy a saʼ vifon. Á wíy a yòŋ wun jii, Ŋgaà Ntir wo ghaʼán, Nyùy wo kuʼùn, Tàr wo wù gòʼòn kàŋ mòʼón, Wan Fòn woo Ŋgaà Nyaáŋ.

⁷Sáʼ rəə́ kù wíy a kuy, a dù duùn fó mbìy, a kitúm kfə́ kí kù wíy a neŋ e mvə̀m vikùʼùy ji dèʼ. Wù wíy a saʼ ji njìlaʼ Fòn Davir, e kù a tiy a dzə̀ é kinyò kee réŋ kí, a saʼ vifon və́ tìítiy, là kiloʼ, a bó sáʼ rəə́ yòʼ wíy mày. NYÙY TÀR woo Taà Mànjòŋ kù wíy yiì kinyo kìn bìʼ shíi və.

⁸NYÙY TÀR tsə̀nsí ne ntum ji á kanti á wír vee rám Jakov, e naàrì ŋgeʼlàʼ ye yì kù kér fóo gbù aáwune vee wír veé Israyí kitu.

⁹Yì gbu, é wíri nèn kìíy kinyo ke wù‑uù rə́si yoŋ aáwune. Áwune adzə̀m ve á dzə́ e rám Efrayimé nsay wùn ǎ ŋkàlaʼ yee Samaria. Dzə̀ áwune ve á kóʼor wún, yén ji moo áwune yòʼ dzə̀, sévti jii,

¹⁰«Mo aŋgàa vibàn vérí fə̀m kètìn lav sér, aá bóm a dzə̀ é nsay ye tsəmén, bo vèr lo lèn, e bom a dzə̀ e tíy ye á bonen, e nàvtì, yí féméne. Vé‑eè gwàtì vitóm ve lav vee kicí ké *sikamor vi, a vèr yíi siìr lèn a dzə̀ vé kici ké *sidar fo.»[16]

¹¹Bìʼ bèy, NYÙY TÀR tàvír ne aŋgàa vibǎn Fòn Resin, á wáa ghiʼ lèn wír veé Isray.[17] Wù bàyír ne aŋgàa vibǎn wìr veé Isray, á wáa lùm ji bo á kì fùnèn áwune.

¹²Veé Siiriàa wáa wìy fo mbìv ye shùy yii tó fo fo, veé Filistiàa wáa wìy fo mbìv ye shùy yii nəə sho. Áwune tátí kitúm kee Isray, e sə̀ʼsí kidzə̀m. Fə̀m mo ŋgeʼ sìn sidzə̀m si siìn e wír veé Israyí kitu, NYÙY TÀR kù dzəə́ shwiiy kilòŋ wùn áwune, a wù dzə̀ kibáʼtín ji wun lo, e shaà fo mbìy, a dzə̀sì ŋgeʼlàʼ aáwuné kitu.

¹³Bó wír vìne yoʼ màʼtì yii yév ye bií, e fíʼ a jùmrì ŋgaà wo wù maʼ ŋgeʼ aáwuné kitu. Áwune yòʼ fə̀m mum ji bo á kì yúnin NYÙY TÀR, wun woo Taà Mànjòŋ.

¹⁴Á bèy, NYÙY TÀR wíy laàr vilìmbìy veé Isray kishiíy kimòʼón. Wù wíy laàr ve á tíy ji kitú, e laàr ve á dzəə̀n kév ji kún. Wù wíy laàr ve á dzəə̀n moo viyáŋ ve ví tíynin e kitu ke ten, e laàr ve á dzəə̀n moo ŋkiʼ wo wù teʼ e nsə̀ə́ndzəv.

¹⁵Wír ve á dzəə̀n moo kitú vìne dzə̀ ŋgày sé wìr wùn à kfə́m sé wìr si, a ve á dzəə̀n moo kúné dzə̀ aŋgàa ntum ve á yéʼey kév wíri a dzə̀ kimboʼtì.

¹⁶Vilìmbìy ve ví leey fo Isray vi dìn ne wíri a dzə̀ dzə́ə yee kintéŋ, áwune júmrí, e fəə̀ fo Nyùy mbòv.

¹⁷Bìʼ bey, NYÙY TÀR yòʼ yíi bavtí wón vév vee vilum, a bó wù yòʼ yíi rər mendzən me wón aŋkfə, a bó wù yòʼ fə̀m yíi rər me vikǐy ŋkfə vév. Dzə̀ jii, wìr dzə̀m kù sí ŋwáy yéʼéy NYÙY TÀR ŋwáyín, kù yú kinyo ji vinyo ve buʼtìn ví, suuy vinyo a dzə̀ vé kisáŋ vi. Fə̀m mo ŋgeʼ sìn sidzə̀m si siìn e wír veé Israyí kitu, NYÙY TÀR kù dzəə́ shwiiy kilòŋ wùn áwune, a wù dzə̀ kibáʼtín ji wun lo, e shaà fo mbìy, a dzə̀sì ŋgeʼlàʼ aáwuné kitu.

¹⁸Rúrú, liì kisaŋ wo wíri yii kù baári moo və́y. Və́y, a wú baári, ton vimbìn wùn à vitiír vé njoŋ vi, ton vinshaàrì wùn à kóv sí, a sí rə́ŋsín. Wú ton, a kindzə́ʼ ki sə́ virə́ʼ, dzəm, kóʼ e yuv.

¹⁹NYÙY TÀR woo Taà Mànjòŋ sí shwiiy kilòŋ é ŋàŋ, a ŋgeʼ ye wù maʼ e wòŋ, sí ton kitúm e njà və̀y. Və́y, a wú laar wíri, kù mo á màʼ áwune shó ji vidaànè, a bó wìr yòʼ kfə̀n yú fóo sə wír woo wun kfəə.

²⁰Áwune lo, wìr wàa leʼnín, a koʼ, a səy ji wun faasi kifá kée yi, yí, a bvə́me yòʼ kúrí, a jìŋ kù yúy yuyín. Kí maysì foyì, wìr wàa kfər wón və́.

²¹Wír veé Manassèe kù sí funèn afə́r vév vee rám Efrayim. Áwune lo, á suùsín, a ghiʼ afə́r vév vee rám Juda. Fə̀m mo ŋgeʼ sìn sidzə̀m si siìn e wír veé Israyí kitu, NYÙY TÀR kù dzəə́ shwiiy kilòŋ wùn áwune, a wù dzə̀ kibáʼtín ji wun lo, e shaà fo mbìy, a dzə̀sì ŋgeʼlàʼ aáwuné kitu.