Read Lamnso Cù 1 Bible Online

Cù 1 - Lamnso bible

Cù 1

¹NYÙY TÀR súŋnín fó *kibàn ké ntàsín, e yòŋ Mooser, e sùúy sho jii,

²«Ntò se vinyò se à yíi dù, e yòŋ e wír veé Israyi ji á wáa jùmrì si sìne. Wìr lóo wìy ji wun cu NYÙY TÀR, wù kù a ker nàʼ, kìn bvə́y fo mvə̀m ŋgoo yee shó.

³«A cu rəə́ dzə̀ ye tonèné[1], ye á yii ton a dzə̀ nàʼ, bo wù táy nyám yee lumèn, yee là nsem fo ŋgoo nàʼ, e wìy sho e shuù wo wú nəə e kibàn ké ntàsín ji NYÙY TÀR ku biìmé a cu rə́.

⁴Wù yíi neèr kiwó e kitu wo, é NYÙY TÀR nèn biìmé cu rə́ ji ntàŋrí, e bóo lò, e man ajay və́.

⁵Ŋgaàŋ yii bèy, é wù nèn seè nyám yee lumèn rə̀n e shùu kibàn ké ntàsín. Wù seé, áàtàá cù, áwune vee wón Aarone nèn lì mensə́, e nàn e NYÙY TǍR si, e bóo dù, e waŋ e wǔn virəv vé kiy cù wo wú dzəə̀n é shùu kibàn.

⁶Á wáŋé, é ŋgaà cù nèn yùv nyam cù rə̀n, e shètì e vintin vintin,

⁷áàtàá cù, áwune vee wón Aarone táŋrí meŋkaʼ e kiy cù, e sə̀ʼ və́y,

⁸e nèn sìysì, e neèr vintín ve nyàm e kitu ke meŋkàʼ, e neèr sa kitú wùn à fóm si fó.

⁹Ké vito wùn à vikoy vi kí dzə̀, a ŋgaà cù kù tombìy sù e mendzə́v mè. Á bèy, é taà cù nèn tòn kifá kidzə̀m e kiy cù ji cu ye tonèné, cu ye və́yí bin fo fo, a kirəm kfə́ kí boŋ NYÙY TÀR.

¹⁰«A cu wìr ye tonèné dzə̀ ye á yii ton a dzə̀ njiì, kìn bvəy loŋ, bo ŋgaàŋ kù taʼ a dzə̀ yee lumèn, yee là nsem,

¹¹e wìy sho e ghaa kiy cù, e mbìv ye yì kiʼ kuy, e see fo, e NYÙY TǍR si. Wù seé, é wón Aaron vee vitó və́, vee atàá cùu nèn wàŋ mensə́ e wǔn kiy cù, virə́v vidzə̀m,

¹²é ŋgaà cù sheti nyám e vintin vintin, é taà cù siysi, e neèr e kitu ke meŋkàʼ, e neèr sa kitú wùn à fóm si, e wày və́y shó.

¹³Ké vito wùn à vikoy vi kí dzə̀, a ŋgaà cù kù tombìy sù e mendzə́v mè. Á bèy, é taà cù nèn tòn kifá kidzə̀m e kiy cù. Dzə̀ cu ye tonèné, cu ye və́yí bin fo fo, a kirəm kfə́ kí boŋ NYÙY TÀR.

¹⁴«A cu wìr ye tonèné, ye wù fó e NYÙY TÀRí dzə̀ shinə́n,[2] bo wù wiy a dzə̀ e kibìŋ kí, kìn e kibuù ki.

¹⁵Wù wiy sho, é taà cù li, e dù sho e ghaa kiy cù, e tòy kilòŋ fó fo, e màʼ e kiy, e lì shinə́n, e jiír mensə́ mvə é ghaa kiy cù.

¹⁶Wù jiir, e lì kidíʼ wùn à fəə si, e màʼ e ghaa kiy cù e kirə̀ʼ ké kibvə, e mbìv ye yì kiʼ fo shùy yii tó,

¹⁷e nèn ghar shinə́n fó vàv si, e sàr, yii bèy, e làa yòʼ jàvsìn. Wù sar bèy, é wù nèn neèr e kitu ke meŋkàʼ me mè shwí e kiy cù. Dzə̀ cu ye tonèné, cu ye və́yí bin fo fo, a kirəm kfə́ kí boŋ NYÙY TÀR.