Read Lamnso Cù 15 Bible Online

Cù 15 - Lamnso bible

Cù 15

¹NYÙY TÀR yòŋ e Mooser wùn Aaron jii,

²«Suúy e wír veé Israyi jii, a lùmèn lò a dzə, jwíyí lo, a fəə fo wun wǔn vilum, bo dzə̀ *kifàn.

³Nsər see kùm kifàn kfə́ sí dzə̀ jii, kìn jwíyí dzəə́ fəə́ fo ŋgaàŋ wǔn vilum, kìn yí fìn fó, bo wù kù dzə̀ e kifàn kí wùn.

⁴«Kikún ke ŋgaàŋ neèmèn shó ki kér kifàn, a kifá kidzə̀m ke wù dzə̀ʼə̀mèn shó ki lì ne kifàn.

⁵Wìr wo wù kùmèn kikún ké ŋgaàŋ yíi sù ndzə̀y sə́, e sù wún, e kù a ker kifàn é wùn, e dù, e meé e ŋkuùr.

⁶Wìr wo wù dzə̀ʼə̀mèn é kifa ke ŋgaàŋ kì dzə̀ʼə̀mèn shó, yíi sù ndzə̀y sə́, e sù wún, e kù a dzə e kifàn kí wùn, e dù, e meé e ŋkuùr.

⁷«Wìr wo wù kùmèn ŋgaà kifàn woo shooy, yíi sù ndzə̀y sə́, e sù wún, e kù a dzə e kifàn kí wùn, e dù, e meé e ŋkuùr.

⁸«Ŋgaà kifàn cú mentíy e wìr wo wù yòʼ kér kifǎn wùn, bo wìr woo shooy kù su ndzə̀y sə́, e sù wún, e kù a dzə e kifàn kí wùn, e dù, e meé e ŋkuùr.

⁹«Kidzəʼmè ke ŋgaà kifàn kì dzə̀ʼə̀mèn shó ki yíi a ker kifàn.

¹⁰Wìr kum kifá ke ŋgaàŋ kì dzə́ sho, bo wù yíi a dzə e kifàn kí wùn, e dù, e meé e ŋkuùr. Wìr beʼey kifá kee shooy, bo wù yíi sù ndzə̀y sə́, e sù wún, e kù a dzə e kifàn kí wùn, e dù, e meé e ŋkuùr.

¹¹«Ŋgaà kifàn kum wír e wóo là su, bo ŋgaà wo á kùmèn yíi sù ndzə̀y sə́, e sù wún, e kù a dzə e kifàn kí wùn, e dù, e meé e ŋkuùr.

¹²«Ŋgaà kifàn kum kifá ke mbóm kí, bo á bvə́ʼti kíwun. Wáa dzə kifá kee fèr e kicí kí, á sù é mendzə̀v.

¹³«Wáa dzə, a wìr wo jwíyí kì fəə́ fo wun wùn bónén ne fo wun yàsí, wù dzə̀ʼtì kishiíy saàmbà, e kfə̀n sù ndzə̀y sə́ wùn à wún vəə́ é ndzəv ye yí léŋé, e nèn ràn.

¹⁴Kishiíy kí mee ji waamé, wù tàʼ vibìŋ vibaà, kìn wón vibuù abaà, e dù sho e NYÙY TǍR si e shùu *kibàn ké ntàsín, e fò e taà cù.

¹⁵Taà cù yíi yiì cu ajay e shímóʼ shí, e yiì cu ye tonèné e shímóʼ shí, e nèn kfəmrí wun e NYÙY TǍR si, bìʼ yàsí və.

¹⁶«A lùmèn lòo dzə, shindzə́v shé lùmèn shi fəə́ fo wun wùn, bo wù su wún e dzə̀m e mendzə́v mè, a dzə e kifàn kí wùn, e dù, e meé e ŋkuùr.

¹⁷Kifá kee ndzə̀y kidzə̀m, à kee júv ki kidzə̀m ke shindzə́v shé lùmèn shi duùn shó, bo á su, é kifàn kí kú a dzə sho, e dù, e meé e ŋkuùr.

¹⁸A lùmèn shìíy e wiíy, shindzə́v shí fəə́, bo wùn wiíy su wún, a dzə e kifàn kí wùn, e dù, e meé e ŋkuùr.

¹⁹«Wiíy yén ghán sə́ é ghan see shó, bo wù kér kifàn kishiíy saàmbà. Wìr kum wun, bo wù li kifàn, e meé e ŋkuùr.

²⁰«Wù yén ghán sə́ bey, e neèm e kifa, kìn wù dzə̀ʼə̀m e kifa, bo kifá kee shooy ki li kifàn.

²¹Wìr kum kikún kfə́, bo ŋgaàŋ yíi sù ndzə̀y sə́ é mendzə̀v, e sù wún, a dzə e kifàn kí wùn, e dù, e meé e ŋkuùr.

²²Wìr kum kifá ke wù dzə̀ʼə̀mèn shó, kìn dzə̀ kee ka, bo wù yíi sù ndzə̀y sə́, e sù wún é mendzə̀v, a dzə e kifàn kí wùn, e dù, e meé e ŋkuùr.

²³A dzə̀ kikún, kìn dzə̀ kifá kee ka ke wù dzə̀ʼə̀mèn shó, bo wìr wo wù kùmèn kù li kifàn, e meé e ŋkuùr.

²⁴«Lùmèn shiíy e wun woo wiíy, kí koóy ji wù lo, a yén ghán sə́, bo lùmèn woo shooy yíi a dzə e kifàn kí wùn kishiíy saàmbà. Kikún ke ŋgaàŋ néŋ sho ki yíi a ker kifàn.

²⁵«A wiíy lò, a səy, a bó yòʼ dzə̀ ghán se wù yii yén ghán sə́, kìn dzə̀ ji wù yèn, vishiíy ví dúnén, bo wù dzə̀ é kifàn kí wùn e mvə̀m ghàn fóo fèy. Wù kù yíi a dzə e kifàn kí wùn moó ghan se wù yii yén ghán sə́ bey.

²⁶Kikún ke wù néŋ sho e ghan fóo fèy ki kù kér kifàn, réŋréŋ mo kí yii dzə́ e ghan se wù dzəə̀n e wun ghan. Kifá ke wù dzə̀ʼə̀mèn shó ki kù yíi a ker sa kifàn.

²⁷Wìr kum kifá fo vifa fèn, bo wù yíi a dzə e kifàn kí wùn. Wù yíi sù ndzə̀y sə́, e sù wún, e kù a dzə e kifàn kí wùn, e dù, e meé e ŋkuùr.

²⁸«Yii bèy, a sə́y ye wù sə́yíi tìím, bo wù dzəʼə̀m kishiíy saàmbà, e bóo ran.

²⁹Lóo dzə e kishiíy kee waamé, wù tàʼ vibìŋ vibaà, kìn wón vibuù abaà, e dù, e yèn taà cù sho, e shùu kibàn ké ntàsín.

³⁰Taà cù yíi yiì cu ajay e shímóʼ shí, e yiì cu ye tonèné e shímóʼ shí, e nèn kfəmrí wun e NYÙY TǍR si, bìʼ kifàn ke kí dzəə̀n e wun wùn, bìʼ sə́y ye wù kì sə́yí.

³¹«Á mo NYÙY TÀR yòŋèn e Mooser ji á tír á wír veé Isray fo á li kifàn, e bìvír kibàn kfə́ ké ntàsín ke kí dzəə̀n aáwuné mvəm.»

³²Á nsər see bìʼ *kifàn kee wìr wùn, à see bìʼ lumèn wo jwíyí fəə́ fo wun wǔn vilum, à sé shindzə̀v she shí fəə́ fo fo shi.

³³Á nsər see bìʼ wiíy wo wù yenen ghán sə́, à see bìʼ lumèn, kìn wiíy wo kifá ki loòn, a fəə fo ŋgaàŋ wùn, à sé lumèn wo wù shiiyin e wiíy wo wù dzəə̀n e kifàn kí wùn.