Read Lamnso Cù 16 Bible Online

Cù 16 - Lamnso bible

Cù 16

¹Yì‑iì dzə̀ é ghan se wón Aaron vee abàá‑aà kpukin,[18] áwune ve vé‑eè koʼtin e NYÙY TǍR si, e və́y kisaŋe, NYÙY TÀR yòŋ Mooser,

²e sùúy sho jii, «Yòŋ e fər wò Aaron ji lá wù yòʼ a soorí a raŋ fó fó, a wìy e kirə̀ʼ ke dzəə̀n kee jeéy kí féyì, fo ŋkùv mensàŋ dzəə̀n. A wù mùm, bo wù kpú, bìʼ fo m yii dzə́ fo, e mvə̀m mbàʼ, e kitu ke ŋkùv mensàŋ.

³Dzəə̀ ye a dzə̀ wù nə̀ə́ fó kù dzə̀, a wù yií ne cu ajay e wàn nàʼ, e yiì ye tonèné e kiyáʼ ki.

⁴«A kí yíi a dzə jii, Aaron yíi màʼ ndzə̀y sé taà cù see jeéy sí, see kikúm ke da ke fəvír kí, sə̀là wo tsəm, e kur kinsiŋ e wun wùn, e kur tán ye ndzəméné.

⁵Wù kúrí, é wù nèn sə̀ vibév vibaà fo wír veé Israyi ji vé cù ajay, e sə̀ kiyáʼ ji cu ye tonèné.

⁶«Aaron kù yíi yiì cu rə́ ajay e nàʼ woo lumèn, e fíʼ man ajay və́, à vé kfəə rəə́,

⁷e nèn lì vibév vee vibaà viy, e koʼtí sho e NYÙY TǍR si, e shùu *kibàn ké ntàsín,

⁸e shweŋ, e yen ji kibév ke kí du e NYÙY TÀR kí sà dzə̀ kiné kí, a ke kí du e Asasel ki dzə̀ kiné kí á.

⁹Wù yíi lì kibév ke kí fəəsin ji ké NYÙY TÀR, e yiì cu ajay sho.

¹⁰Kibév ke kí fəəsin ji ké Asasel[19], aá wiy shó e NYÙY TǍR si kitin, e bóo yìi jùm ji kí beʼey á ajay wíri, a dù sho e kwaʼ e Asasel.

¹¹«Aaron yíi wìy e nàʼ woo lumèn ji cu rə́ ajay, e man ajay və́ shó, à vé kfəə rəə́. Wù seé ji cu rə́ ajay,

¹²é wù li káy se və̀y fó *kiy cù kilay e NYÙY TǍR si e kikaŋ ke və̀y kirúnén, e ŋèʼ sa kiláy ke kpuún kí, ke kí rəʼtìnè, viwó vibaà, e soo raŋ, e nəə́ sho e kirə̀ʼ ke dzəə̀n kee jeéy kí féyì.

¹³Wù yíi way kiláy é və̀y e NYÙY TǍR si ji kindzə́ʼ kfə́ kí wáa koʼ, a sətí kirə́ʼ ké kiman ke kí dzəə̀n é nsər ŋkùv mensàŋ fo wù yén fó, e kpù.

¹⁴Aaron yíi sə̀ʼ mensə́ me nàʼ və̀y memoʼ mè e wàn kiwo, e waŋ e nsər ŋkùv mensàŋ a dzə̀ fó mbìy, e nèn waŋ kàŋ saàmbà, e wǔn ŋkùv fo sar.

¹⁵«Wù fəə́, é wù nèn seè kibév ke cù ajay wíri, e lì mensə́, e nəə́ sho e kirə̀ʼ kee jeéy kí féyì, e yiì sho mo wù kì yiìn e mensə́ me nàʼ mè, e waŋrí e nsər ŋkùv mensàŋ fo yuv, e kfə̀n waŋrí e wǔn ŋkùv mensàŋ fo mbìy.

¹⁶Á mo wù yíi *kfəmrí kirə́ʼ kee jeéy kí féyì bèn, bìʼ *kifàn ké wìr veé Isray wùn aàjay véví, à vinyo vév ve bi ví vidzə̀m. Wù kù yíi yiì sa bèy e kibàn ké ntàsín kí kidzə̀m, ke kí tíy aáwuné mvəm, áwune ve á lo, á lì kifàn.

¹⁷Yii bèy, bó yòʼ dzə̀ wìr wìy a dzə e kibàn ké ntàsín fey, a Aaron yii lim rə́ e kirə̀ʼ kee jeéy kí féyì, e meé mo wù yíi màysì, e fəə. A kí dzə̀ jii, wù yíi man ajay və́, e man ajay kfəə rə́, à vé màŋgòŋ woó Israyi.

¹⁸Wù fəə́, é wù nèn dù, e kfə̀mrí kíy cù woo wó cù ye tonèné, wo wú dzəə̀n e NYÙY TǍR si. Wù yíi lì mensə́ me nàʼ və̀y memoʼ mè wùn à me kibev kìy mè, e yoʼ loŋ se kiy cù sho sidzə̀m.

¹⁹Wù yíi waŋrí mensə́ memoʼ mè sho kàŋ saàmbà e wàn kiwo və, e kfəmrí kíy cù, é wú rán fó kifàn ke wír veé Israyi wìyìn shó, e kfə̀n ji kifá ke siìn ji ké Nyùy.

²⁰«Lóo dzə, a Aaron máysí ne, e *kfə̀mrí kirə́ʼ ke dzəə̀n kee jeéy kí féyì, e kfə̀mrí *kibàn ké ntàsín, à kíy cùu, é wù nèn wìy e kibév ke tin ki e NYÙY TǍR si.

²¹Wù wiyì, é wù neer wó rə́ é kitu wo, e tuùné vinyo ve wìr veé Isray ve bi ví vidzə̀m wùn aàjay véví, à liì kisaŋ wov e dzə̀m. Wù yii bèy, bo wù siìr ne vinyo vìn e kibév kí kitu, é wìr wo wù kì yíi jùm nèn tsəə̀né, e dù sho e kwaʼ.

²²Wù dú jumè, é kibév ki beʼey vinyo ve wíri ve bi ví, e dù sho e tím kwaʼ.

²³«Ké lèn ki, é Aaron ku nèn nə̀ə́ e kibàn ké ntàsín, e shòʼtí ndzə̀y sé taà cù see jeéy sí se wù kì màʼàn, e bóo nəə́ e kirə̀ʼ ke dzəə̀n kee jeéy kí féyì, e lèm e kibàn fey.

²⁴Wù lemè, é wù nèn dù, e sù wún é kirə̀ʼ kee jeéy kímóʼ kí, e màʼ lèn ndzə̀y sə́ see siy, e nèn dù, e yiì cu rə́ ye tonèné, e yiì sa yé wíri, e màn ajay və́, à vé wírií.

²⁵Ké fom se cù ajay, wù kù yíi tòn sa e kiy cù.

²⁶«Ké wìr wo wù kì tsəənen kibév, kí dú e Asasel, a dzə̀ wù kù sù ndzə̀y sə́, e sù wún və́, e bóo nəə́ e kibeèy.

²⁷Ké nàʼ wùn à kibév ke á yiìn cu ajay sho, e lì mensə́, e wìy sho e kirə̀ʼ kee jeéy kí ji ntàŋrí wo á mán ajay sho, á yíi bèʼèy, e fəə kibeey shó, e tòn júv wùn à jav, à bvə́me.

²⁸Ŋgaà wo wù tònèn kù yíi sù ndzə̀y sə́, e sù sa wún və́, e bóo kfən e kibeèy.

²⁹«Nsər ye yì kù wíy a tiy ghán sidzə̀m nén a dzə jii, wíy lòo dzə e kishiíy ke kí meen ji ghvə̀m fo ŋwee wo wú meen ji saàmbà,[20] é vèn nəʼsi vitú vén, e lèm kishiíy kee shooy ji ké bam, kìn dzə̀ ven vee wón nsay, kìn viŋgwìy ve ví dzə́ e věn mvəm.

³⁰Dzə̀ kishiíy ke á wíy taŋrí ven, e man ajay vén, e sù ven fo věn ajay, é vèn wáa dzə aránén e NYÙY TǍR si.

³¹Kù wíy a dzə kishiíy ké meèmè kee jeéy kí fo vèn, ke vèn wáa dzə, a ten vifá veé shií. Kù wíy a dzə nsər ye vèn wíy a lèm, e dù, e jòʼsì.

³²Taà cù wo á yoʼon, e lèm ji njìlaʼ tàr wov, wù wáa dzə taà cù wo kuʼùn, wíy a man ajay wíri, a wù máʼ ne ndzə̀y sé taà cù see jeéy sí.

³³Wù wíy kfəmrí kirə́ʼ ke dzəə̀n kee jeéy kí féyì, e màysì *kibàn ké ntàsín e kfəmrí, e kfəmrí kíy cù, e man sa ajay atàá cù wùn à vé wìr dzə̀m woó kintatì.

³⁴Sì nsər bèy fo wír veé Israyi, e wìy dù, e mày. Á kù wíy a taŋrí wír veé Isray kàŋ mòʼón e kitu ke kiya, a man ajay vév.» Á bèy, Mooser ku nèn yiì mo NYÙY TÀR‑iì naàrìn e wun.