Read Lamnso Cù 19 Bible Online

Cù 19 - Lamnso bible

Cù 19

¹NYÙY TÀR yòŋ e Mooser

²ji wù suúy á e wìr dzə̀m woó Isray jii, «Vèn wáa dzə aránén, bìʼ fo mo woo NYÙY TÀR woo Nyùy won dzəə̀n e ránén.

³Wìr mòʼón mòʼón fo vèn wáa ghvəm yè wov wùn tàr wov, a lèm kishiíy kém ké bam. Dzə̀ mo NYÙY TÀR woo Nyùy won.

⁴«Lá vèn yòʼ bìn ndzə̀m e mò, e fèr mebvə̀m e kisha ki ji anyùy vén, a ghvəm. Dzə̀ mo NYÙY TÀR woo Nyùy won.

⁵«Wìr seé nyam cù kikòŋnìn ji wun cu mo shó, wù yiì mo yí dzəə̀n, é m nèn səə̀sí cu yee shooy e ŋgaàŋ yir.

⁶Á kù wíy yi a dzə̀ é kishiíy ke á yiìn cu, kìn e ke kí batin kí. Kifá ki bér, lóo dzə e kishiíy kee taár, á tòn é və̀y, é kí shwí.

⁷Á yí kifá fo fo e kishiíy kee taár, bo sì lor, bo bó m yòʼ kfə̀n biíme cu yee shooy.

⁸A wìr wo wù yiin lì ne njò, bìʼ fo wù liìn kifá ke kí dzəə̀n jeéy ji ké NYÙY TÀR fó tèr, aá kù fəər wun fo wír vémé mvəm.

⁹«Vèn lóo kav vifá fo sum, lá vèn yòʼ a dìy ji á ku sìy súm siyín e dzə̀m, e meé e ŋguùŋè, kìn dzə̀ ji á kfə́nrí wuú, e sìyrí.

¹⁰Lá vèn yòʼ kù a dìy ji á síyrí á súm vitiír vé *vayin siyrín, kìn ji vèn wáa boŋrí báŋ se sí gbu. Vèn lem vee shooy vi ji vé aghéʼncey wùn à ji vé viŋgwìy. Dzə̀ mo NYÙY TÀR woo Nyùy won.

¹¹«Lá wìr shòŋ, lá wìr yòʼ lòʼ wír, lá wìr yòʼ bòʼtí wír.

¹²Lá wìr yòʼ yiì kilìʼ, e kàn yír yém kisáŋ. A wù yiì bèy, bo wù lì ne yír yém fó tèr. Dzə̀ mo NYÙY TÀR woo Nyùy won.

¹³«Lá wìr yòʼ kùvrì wùmòʼ. Lá wù yòʼ faàsì kifá ke wìr. Wìr lim kilàʼ, ŋgaà làʼ kù làʼ ŋgaà lìm e si kishiíy, e làa yòʼ màʼtì é yì sə́n.

¹⁴Lá wìr yòʼ kuù kindzə̀mer, kìn ji wìr yii kisəə́y ji mfìr bayrin shó. Á bèy, vèn wáa ghvəm mo é mbòómbòŋ. Dzə̀ mo NYÙY TÀR.

¹⁵«Lá wìr yòʼ a tinén nsaʼ, a loʼ kiloʼ. Lá vèn yòʼ a bìn nsaʼ, a fo e ghéʼncey, kìn dzə̀ mó a bìn nsaʼ, a fàn sí ŋgaà mbàm. Á bèy, vèn kú a tinén nsaʼ se afə́r vén, a ker suuyrú.

¹⁶Lá wìr yòʼ a ghan, a kùnsìn wíri, kìn ji wù tiím vinjen ji fə̀r nəə́ é ŋgeʼ. Dzə̀ mo NYÙY TÀR.

¹⁷«Lá wìr yòʼ a ker fə́r və é shiliv. Wìr ku sìysì kinyo ke wùn fər və kérí síysin fó jay kinyo bìʼ ŋgaàŋ.[22]

¹⁸Lá wìr yòʼ a siìr ŋkfə́tír. Lá wìr yòʼ a màʼ ŋkfəə́mé e fər və́ kitu. Wìr wáa kòŋ fə́r və mo wù koŋ kitú kfə́. Dzə̀ mo NYÙY TÀR.

¹⁹«Vèn wáa yunín nsər sém sí. Lá vèn yòʼ màʼtì, é nyàm ye sən wáa koo ye sən. Lá vèn yòʼ wày kfə́ə ŋgoòy jeéy jeéy súm e mòʼón. Lá wìr yòʼ a màʼ ndzə̀y se á baan, e shwìr alàv.

²⁰«A wiíy woo kwàn lò a dzə, aá fó ne e wìr, yii bèy, aá yóʼ ne tìn, kí koóy ji lùmèn wùmòʼ li, e shìíy sho, bo á yíi fo áwune ŋgeʼlàʼ,[23] e làa yòʼ yuyrí, bìʼ fo wù yòʼ‑oò ló ne bòy fo vikwàn.

²¹Á bèy, é lùmèn woo shooy wiy e kiyáʼ ki, e yèn NYÙY TÀR shó e shùu *kibàn ké ntàsín ji cu rə́ làʼnjò.

²²Wù wiy sho, bo taà cù yíi lì kiyáʼ ke cù njò kin, e cù NYÙY TÀR shó, e taŋrí ŋgaàŋ, e man jay və, é NYÙY TÀR laysin jay woo shooy.

²³«Vèn nəə e nsay Kanan, biy kfəə́ se vici se á yii yí báŋ si, ví keʼ koóm, lá vèn yòʼ mùm, e yì, a bó viyá vi shaá vitaár. Vèn ku lì ji dzə̀ á vifá ve ví kér nsər.

²⁴Lóo dzə e kiya ke kí meen ji kweè, vèn bàʼtí báŋ sidzə̀m ji nshwǐ NYÙY TÀR, e fò ji cu ye á suyrì wun sho.

²⁵Kiyá ki lóo mee ji tàn, bo a dzə̀ lèn vèn wàa yi. A vèn lò, a yiì vinyo vìn vidzə̀m, bo vicí ví yíi a koóm, a jàmtìn jàmtìn. Dzə̀ mo NYÙY TÀR woo Nyùy won.

²⁶«Lá vèn yòʼ wìy yì nyám e mensə́ mè sho. Lá vèn yòʼ wìy a shweŋ fú, kìn dzə̀ ji á wáa bay sə́m.

²⁷Lá vèn yòʼ wìy a kèŋrì búbúʼ sí. Lá vèn yòʼ a fàr sa kighev.

²⁸Lá vèn yòʼ wìy a shunrí wún bìʼ aŋkfə, kìn dzə̀ mó a yiì nsáŋtí. Dzə̀ mo NYÙY TÀR.[24]

²⁹«Lá vèn yòʼ fò wón vén ji asàkì veé lav se anyùy,[25] é kí wáa shoór áwune. A vèn yiì bèy, bo vèn wíy lò, a beè anyùy kisaŋe, e yiì, é nsay bír, e kfə̀n ji ye yìi kisaŋe.

³⁰Vèn kù wíy a lèm kishiíy kém ké bam, a ghvəm kibàn kém ké ntàsín. Dzə̀ mo NYÙY TÀR.

³¹«Lá vèn yòʼ a dù, a beè vé fùú, kìn ve á ká aŋkfə. A vèn wìy a yiì bèy, bo vèn wíy bivír vitú vén, e kfən ji vé *kifàné. Dzə̀ mo NYÙY TÀR woo Nyùy won.

³²«Vèn wáa ghvəm ŋgày sén sé wìr, a gvəʼtí, a ghvəm mo woo NYÙY TÀR é mbòómbòŋ. Dzə̀ mo woo NYÙY TÀR.

³³«A kiŋgwìy ki dzə́ e věn nsay, lá vèn yòʼ a nə̀ʼsì wun. Lá vèn yòʼ a jay kinyo sho.

³⁴Vèn wáa ker kiŋgwìy ki moo wan nsay, a kòŋ wun mo vèn koŋ vitú vén. Vèn wáa kuumé ji vèn‑eè dzə̀ sáa viŋgwìy e wòŋ Ejiv. Dzə̀ mo NYÙY TÀR woo Nyùy won.

³⁵«Lá vèn yòʼ wìy a fìʼ kifá, a loʼ, kìn dzə̀ fó vidà, kìn fó vidzəə̀sì, kìn dzə̀ fó vikùʼùy.

³⁶Vèn ku kìv mfìʼ si réŋréŋ, kìn dzə̀ sé vidzəə̀sì, kìn dzə̀ sé vifa vímóʼ ví. Dzə̀ mo NYÙY TÀR woo Nyùy won, wo wù‑uù fəərin ven fó wòŋ Ejiv.

³⁷Vèn kú a yunín nsər sém sí sidzə̀m, à ntir sém sí, a yiì vidzə̀m. Dzə̀ mo NYÙY TÀR.»