Read Lamnso Cù 22 Bible Online

Cù 22 - Lamnso bible

Cù 22

¹NYÙY TÀR yòŋ e Mooser jii,

²«Yòŋ e Aaron wùn à wóné jii, á wáa kìm a vitú vév fó vifa vee jeéy ve wír veé Israyi wiy, cu mo shó. Áwune wáa yen fóo shoór yír yém, mo wo m dzəə̀n e ránén. Dzə̀ mo NYÙY TÀR.

³Yòŋ aáwune jii, a wìr fo věn mvə̀m ràm kùm kifá fo vifa ve cù ve wír veé Israyi wìyìn, e cù mo shó, a wù kér *kifàn, bo á kù sí tsəʼ wun fo wù wiy a koʼtí e mǒ si. Á nsər mo ŋgwàʼ sén sí wíy a dzə. Dzə̀ mo NYÙY TÀR.

⁴«Wìr fo Aaron ram wáa dzə, a wù kér yàsí woó jùv wùn, kìn fəə̀ kifá fo ŋgaàŋ wǔn vilum, lá wù yòʼ yì kifá fo vifa vee jeéy vin, e meé mo á yíi *kfəmrí wun. Taà cù kum kifá ke kifàn kí moo dzə́n wìr, kìn fəə̀ shindzə́v shé lùmèn fo ŋgaàŋ wùn, bo wù kù sì e kifàn kí wùn.

⁵Kìn dzə̀ ji wù kùm a dzə̀ nyám ye koʼoyín ye a dzə̀ yì yiì, vèn wàa ker kifàn, kìn wù kùm a dzə̀ wír wo wù kér kifàn, a fə̀m dzə̀ kfə́ə kiné kí,

⁶bo wù kù yíi a dzə e kifàn kí wùn, e dù, e meé e ŋkuùr. A bó yòʼ dzə̀ wù yì kifá fo vifa ve á cuùn Nyùy sho vìn, e meé mo wù yíi sù wún é mendzə̀v.

⁷Shùy nəə, bo wù ràn ne, bo a dzə̀ wù yì lèn vifá ve yi ve cù vìn, bìʼ fo dzəə̀n vidzə̀ vév.

⁸«Ké taà cù ki kfə́n a dzə sa, a wù yòʼ kér fó a yi nyám ye yì kpuun kpuún, kìn ye yuyrin nyám ye bi, fó lor kitú kfə́. Dzə̀ mo NYÙY TÀR.

⁹Kù dzə̀ jii, atàá cù adzə̀me wáa yiì vinyo ve m suuyin vin. Là bey, bo á yíi lì njò, e kpukír mo á leeyin nsər sém ntéŋ. Dzə̀ mo NYÙY TÀR wo m kù yii, bo áwune wáa dzə aránén ji wír vém.

¹⁰«A dzə̀ wír, a wù yoʼ fəə̀ fó kfəə atàá cù, lá wù yòʼ yì vifá ve cù vìn. A dzə̀ ŋgaà kiŋgàn taà cù, kìn wir lìm wo wù lim fo taà cù, lá wù yòʼ yì sá vifá ve á cuùn Nyùy sho vìn.

¹¹Taà cù wáa dzə a wù yún ne kwàn yúnén, bo a dzə̀ wú yì vifá vìn. Kwàné lóo dzə wo á dzəən é lav, bo wú sí kér ghay wóo yi vifá vìn.

¹²A wan taà cù kòóy lúm, a dzə̀ wír woó ram ye səné, bo yòʼ dzə̀ wán woo shooy wù kfə̀n yì vifá ve á cuùn Nyùy sho vìn.

¹³Yii bèy, a wan taà cù lò a dzə, a sì wiiy ŋkfə, kìn wo wùn lum jàvsìn ne, a wù dzə̀ là wán, wù lo, e kfə̀n é bàm e tàr wóv lav, a dzə moó ghan se wù‑uù dzə̀ə́ wánlè ŋgòn, bo a dzə̀ wù yì vifá ve yi ve tàr wov. A bó yòʼ dzə̀ tókíshwáŋ yì.

¹⁴«A wìr woo və̀y yì vifá ve yi vee jeéy vin là kiíy, bo wù kù taʼ vímóʼ ví réŋréŋ bey, e siìr e taà cù, e kfə̀n lì kirə́ʼ kimòʼón fo ke á jàvìn virə́ʼ vitàn ki, e dzə̀sì sho.

¹⁵Lá atàá cùu yòʼ wìy keèrí vifá ve cù fo tèr, ve wír veé Israyi fó e NYÙY TÀR,

¹⁶fó yiì, áàtókíshwáŋe wáa yi. A taà cù lò, a yiì bèy, bo wíri yíi lì lòn wo dzə̀ á làʼ, e bóo bòy. Dzə̀ mo NYÙY TÀR wo m kù yii, bo áwune wáa dzə aránén ji wír vém.»

¹⁷NYÙY TÀR kfən yòŋ Mooser, e sùúy sho ji

¹⁸wù fó á ntò se vinyò símóʼ sí e Aaron wùn à wóné, à wìr woó Isray e dzə̀m. Kù dzə̀ á vinyo ve ví kum wír veé Isray, kfə̀n kum viŋgwìy ve ví dzəə̀n aáwuné mvəm. A sí dzə̀ jii, wìr wiy e cu ye tonèné ji wun cu NYÙY TÀR shó, kìn wù rúnsi a dzə̀ ŋkàʼmé, kìn wù yii cu a dzə̀ yé kimbòŋwùn,

¹⁹bo wù kù wiy a dzə̀ e nyàm yee lumèn, yee là nsem, ye yì loòn fó ŋgoo nàʼ, kìn fó ŋgoo njiì, kìn fó ŋgoo se bvəy loŋ, é bo Nyùy biímé cu rə́.

²⁰Lá wìr yòʼ wìy yiì cu e nyàm ye yì kér nsem, fo NYÙY TÀR tén cu rə́.

²¹A wìr lò, a cù NYÙY TÀR a dzə̀ e cu kikòŋnìne ji wun rúnsí ŋkàʼmé, kìn ji wun yii cu a dzə̀ yé kimbòŋwùn, wù kù tày nyám a dzə̀ fó ŋgoo nàʼ, kìn fó ŋgoo bvəy. A nyàm rə̀n kù kér fó a dzə là nsem, é bo Nyùy biímé cu rə́.

²²Lá wìr yòʼ lì nyám yee mfìr, kìn yee ŋkivkìr, kìn yee ndzə́m, kìn ye yì kér kinto, kìn ye yì kér kinjùr, kìn ye vintàŋ, e wìy sho e NYÙY TǍR si. Bó yòʼ dzə̀ vèn yiì cu ye tonèné e nyàm yee ben.

²³A dzə̀ nàʼ, kìn njiì wo dzəə̀n ntèŋ, bo a dzə̀ á yiì cu kimbòŋwùn shó. Yii bèy, wáa dzə cu yee yé ŋkàʼmé, bo yòʼ dzə̀ Nyùy sə̀.

²⁴A dzə̀ nyám, a yì kér njò e wun baŋ si, kìn á sòŋ sòŋèn, kìn yì keèrí a dzə̀ kileémé, lá á yòʼ cù NYÙY TÀR shó. Bó yòʼ dzə̀ á yiì bey, e věn nsay.

²⁵A bó yòʼ dzə̀ vèn sə̀ nyám yee ben fo kiŋgwìy ki, e cù Nyùy sho. Mo yì kér nsem, bo bó yòʼ dzə̀ Nyùy səə̀sí.

²⁶NYÙY TÀR shaà fo mbìy, a yòŋ e Mooser jii,

²⁷«Nyàm dzəə wán, kìn dzə̀ nàʼ, kìn dzə̀ njiì, kìn dzə̀ bvəy loŋ, bo wàn dzəʼtì kishiíy saàmbà wùn à kiyìy kí. Wàn mee kishiíy waamé, bo dzə̀ á lì lèn, e cù NYÙY TÀR shó ji cu ye və́yí bin fo fo.

²⁸Yii bèy, lá á yòʼ seè kiyìy ké nyàm wùn wàn é kishiíy kee shó, kìn dzə̀ nàʼ, kìn bvə́y.

²⁹«Wìr lo, a yiì cu ji wun beerì NYÙY TÀR, wù yiì mo kí dzəə̀n, é NYÙY TÀR səə́sí wun.

³⁰Á kù wíy a kfər a dzə̀ é kishiíy fó, e làa yòʼ lèm kifá fo fo, é kí meé kijàvndzə. Dzə̀ mo NYÙY TÀR.

³¹«Kù dzə̀ jii, vèn kú a yunín nsər sém, a yiì mo sí dzəə̀n. Dzə̀ mo NYÙY TÀR.

³²Lá vèn yòʼ shòór yír yém, mo wo m dzəə̀n e ránén. Wìr dzə̀m woó Isray ku wìy a ghvəm mo ji m dzə̀ á e ránén. Dzə̀ mo NYÙY TÀR wo wù kù yii, é bo vèn wáa dzə aránén ji wír vém.

³³Yì‑iì fə̀ə́r mo ven fó wòŋ Ejiv ji m wáa dzə Nyùy won. Dzə̀ mo NYÙY TÀR.»