Read Lamnso Cù 25 Bible Online

Cù 25 - Lamnso bible

Cù 25

¹Yì‑iì dzə̀ é ghan se Mooser‑iì dzəə̀n é Gwan Sinay, NYÙY TÀR yòŋ wun,

²e fò sáʼ ye wù tiísí e wír veé Israyi, a yí dzə̀ jii, «Vèn wíy nəə e nsay ye m fó e vèn, kiyá ki lóo meé ji saàmbà, vèn màʼtì nsay, é yì meeme, é wáa dzə ghvə́m ye á ghvə́m NYÙY TÀR.

³Vèn wíy a lìm súm kiyá ntuùfú, a way vifá, a naŋsín vitiír vé *vayin, a kav vifá fo sum.

⁴Yii bèy, kiyá ki lóo meé ji saàmbà, vèn wàa kwiír súm sí, é sí wáa bonén, a meèmè. Dzə̀ kiyá ke NYÙY TÀR ké bam. Lá wìr wày kifá e sum. Lá wìr yòʼ nàŋsín vitiír vé vayin ve vèn limè.

⁵Vifá ve ví wíy a fəə fəə́n e wúné, lá ŋgaà sùm yòʼ dù ji wun ku kàv fo wun sum. Lá wù yòʼ kòy sa báŋ se vitiír vé vayin ve ví fəən e wúné mo á màʼtìn là náŋsín. Dzə̀ kiyá ke á maʼtì nsay, é yì bónén, e kfə̀nsí kijuŋ.

⁶Fə̀m mo á wíy kwiír súm sí, e làa yòʼ lìm e kiya fèn, nsay kù wíy a fəə́r viyíkìr ve a dzə̀ vèn wàa yi vèn aàkwàn vén vee vilume, à vee vikìyí, à wír ve á lim fo vèné, à viŋgwìy ve ví dzə́ vèn áwune ví.

⁷Kù dzə̀ sá mo súm sin si wíy a fəə́r viyíkìr ve nyàm sén, à vé nyàm seé kwaʼ se sí dzəə̀n e věn nsay si.

⁸«Vèn wíy a taŋ viyá saàmbà kàŋ saàmbà, é wáa dzə kiyá nshòv bvə̀ʼə̀ e mkweè.

⁹Kiyá ki kúmerì, lóo dzə e ŋwee woo saàmbà, e kishiíy ke kí meen ji ghvə̀m, ke dzəə̀n Kishiíy ké Kiman,[34] aá túm wíri, aá tóŋ sóŋ, é yí ghánén nsay yen e dzə̀m.

¹⁰Á kù tóŋ bèy ji á shòʼ ne a kiyá ke kí meen ji mtàn kìn jeéy, e fo sáʼ ji wìr dzə̀m woó wòŋ sí kfə́n a e ghày wo yì‑iì dzəə̀n və́. Wíy a dzə *Kiyá ke Nsiìr Vifa, a nsay wíy a kfən e wìr wo wù‑uù fiìnèn, kìn e kfə́ə rəə́, é kwàné fəə́, a kfən e wír vəə́.

¹¹Vèn kù wíy a lèm kiyá kee mtàn kìn ji Ké Nsiìr Vifa. Lá vèn yòʼ wày vifá e věn sum sí é kiya foo fèy. Lá ŋgaà sùm yòʼ kàv vifá ve ví fəən fəə́n e wun sum. Lá wù yòʼ kòy sa báŋ se vitiír vé vayin ve ví fəən e wúné mo à màʼtìn là náŋsín.

¹²Kiyá kìn ki wíy a dzə kee jeéy kí fo vèn, ke wír adzə̀me kù wíy a yi vifá ve ví wíy a fəə fəə́n fó nsay.

¹³«Wíy lóo dzə e kiya kee shó, kirə́ʼ kidzə̀m ke vé‑eè fiìnèn, á kù siìr e ŋgaà kirə̀ʼ.

¹⁴Kí nén a dzə jii, wìr lóo fiìnè kirə́ʼ e fər və, kìn wù yún yunén, lá kinshwìv ki yòʼ a dzə fo mvəm.

¹⁵Á kù wíy a sìysì káv a dzə̀ mo viyá vi dzəə́ bérí fo Kiya ke Nsiìr Vifa, à mo a dzə̀ vifá ve yi vi fəə̀ fó fo.

¹⁶A lò a dzə, a viyá vi dzəə́ bér vinín, bo kávi kúyí, ví wáa ber vishàr, bo kávi sə́yí, bìʼ fo á yún a dzə̀ vifá ve dzə̀ súmé fə̀ə́r.

¹⁷Lá wìr Isray yòʼ bòʼ wùmòʼ woo wír. Vèn kú a dzə, a fàn a dzə̀ NYÙY TÀR woo Nyùy won. Dzə̀ mo NYÙY TÀR woo Nyùy won.

¹⁸«Kí nén a dzə jii, vèn yú sáʼ yémé, a jùmrì ntò sém sé vinyò si, a yiì mo sí dzəə̀n, é vèn yiì a dzə e nsay akiŋsìn.

¹⁹Vèn wíy a dzə fo là kindzə́m, é nsay wáa fəə́r vifá ve yi, é vèn wáa yi, a kur, é ví wáa tsəə̀tìn.

²⁰«Yii bèy, a tàm wìr lò, a moònìn ji á sà wíy a yi ka é saàmbà kiya, a bó á yòʼ wáy kifá, a bó á yòʼ káví a?

²¹Vèn kiíy jii, m kù wíy a waŋ kisəəvì kém é nsay mo kiyá ki meen ji ntuùfú, é nsay fíʼ a fəə́r vifá ve yi ve ví wáa dzə vigheénín ve a dzə̀ ví lì viyá vitaár.

²²Vèn wíy a way vifá e kiya ke kí meen ji waamé, aá kù dzəə́ yí ve vé‑eè kavin é kiya kee ntuùfú, a ví kù wíy a dzə nyanyày, e meé mo á wíy a kav ve á wayin.

²³«Lá vèn yòʼ wìy a fiìnè nsay ŋkuuŋkùŋ, bìʼ fo yòʼ kér ven. Kér mo, a vèn dzə̀ viŋgwìy mo m lèmèn ji vèn wáa dzə sho.

²⁴Á fiinè kirə́ʼ, a fə̀m dzə̀ feé e věn nsay, á kfə̀n wìy tìn é bàm.

²⁵«A fər wìr lò, a dzə e kitàn, e fiìnè kirə́ʼ kfə́ kímóʼ kí, bo a dzə̀ wir kfəə woo fó mentsə̀m, wù tìn.

²⁶Wìr wáa dzə là ŋgaà tin, e yiì lò, e kùʼ, e kòóy dzə́ə yée tin sho,

²⁷bo á biʼ káv viya ve ŋgaà yun‑eè lìmèn, e kèʼ mo wù‑uù yunen, aá fə́tí ŋgaà wo vé‑eè fiìnèn shó, é kirə́ʼ kí kfə́n e ŋgaà kirə̀ʼ.

²⁸Yii bèy, ŋgaà fiìnè wáa dzə, a bó wù yòʼ kér mbàm sée tin kirə́ʼ shó e bàm, bo kí kù goʼ e ŋgaà yun, e meé e Kiya ke Nsiìr Vifa. Lóo dzə e kiya foo fèy, aá maʼti kirə́ʼ kee shooy, é kí kfə́n e ŋgaà kirə̀ʼ.

²⁹«A wìr lò, e fiìnè lav kishìíy, a yì dzə̀ é mvə̀m kày yeé ŋkàlaʼ, bo wù kér ghay kiyá kifur wóo tin, e kèʼ fo kishiíy ke wù‑uù fiìnèn.

³⁰A yì dzə̀ là tín e bǎm kiya, bo ŋgaà fiìnè yòʼ dzəə́ wìy a ker ghay wóo tin sho. Bo lav kù sì ye ŋgaà yun wùn à rám rəə́ ŋkuuŋkùŋ. Bó yòʼ dzə̀ á dzəə siìr e Kiya ke Nsiìr Vifa.

³¹Yii bèy, a dzə̀ lav e ntèʼ yee là kay ye yí kaarin, bo lav yee shooy dzə̀ moo kifá keé kwaʼ bèy. A dzə̀ á tìn. A kí fə̀m bùŋ fó bèy, á kù wìy siìr e Kiya ke Nsiìr Vifa.

³²«A ké wìr veé ram Levi ki dzə̀ kfə́ jii, áwune kù wíy a ker ghay ghán sidzə̀m wó a tin lav sév é ŋkà se laʼ se vé‑eè foon aáwune.

³³Kí wáa dzə jii, a wìr woó ram Levi dzə̀, e làa yòʼ tin lav ye wù‑uù fiìnèn é mvə̀m ŋkàlaʼ fo dzəə̀n vitsə́ʼ vév, bo á kù wíy siìr e wun e Kiya ke Nsiìr Vifa, bìʼ fo lav se sí dzəə̀n e wír veé ram Levìí ŋkà se laʼ si dzə̀ vitsə́ʼ vév e wír veé Israyí mvəm.

³⁴Yii bèy, fo ké kwaʼ sév sí, seé ghaŋ se ŋkàlaʼ, a dzə̀ la á yòʼ fiìnè, bìʼ fo dzəə̀n vitsə́ʼ vee ŋkuuŋkùŋ.

³⁵«A wìr Isray wùmòʼ lò, a dzə e kitàn, ye bó yòʼ dzə̀ wù sə̀ kitú kfə́, bo wò wo à dzəə̀n fó ghaŋ yíi a tom wun, a geʼ sho mo kì dzə̀ à lèéy fo kiŋgwìy ki, kìn beèshaà, é wù nèn yù fó a dzə e věn mvəm.

³⁶Lá wìr yòʼ a sə séʼ fo ŋgaàŋ, kìn vidzəsì. Vèn wáa dzə, a fàn Nyùy won, é ghéʼncey fiʼ yù fó a dzə e věn mvəm.

³⁷Lá wìr yòʼ foòr wun mbàm, e wày séʼ, kìn ji wù fiine vifá ve yi sho e kilùm.

³⁸Dzə̀ mo NYÙY TÀR woo Nyùy won wo wù‑uù fəərin ven fó vikwàn fó wòŋ Ejiv, ji m fó woŋ Kanan e vèn, a dzə ji Nyùy won.

³⁹«A wìr won lò, a dzə e kitàn, e fiìnè kitú kfə́ e wò, lá à yòʼ lì ji wù wáa lìm moo kwàn.

⁴⁰Yii bèy, ku lì, é wù wáa dzə vèn wun moo ŋgaà kilàʼ, kìn moo beèshaà. Wù kú a lìm vèn wun bèy, e meé mo Kiyá ke Nsiìr Vifa ki wíy wìy.

⁴¹Lóo dzə e ghan fóo fèy, é wùn à wón vəə́ nèn lò, e kfə̀n é bàm aáwuné kfəə, e nə̀ə́ aàtàr véví keŋ.

⁴²Bìʼ fo kér mo wír veé Isray mo mò‑oò fəərin fó wòŋ Ejiv, a bó yòʼ dzə̀ á fiìnè áwune ji akwàn.

⁴³Lá wìr yòʼ lì wír fo áwune, a nə̀ʼsì moo kwàn. Á bèy, vèn kú a dzə, a fàn Nyùy won.

⁴⁴A dzə̀ ji vèn wáa ker akwàn vee vilum wùn à vee vikìyí, vèn wàa yun fo vitúm ve ví kaarin ven ví.

⁴⁵A kfə̀n dzə̀ sá vèn wàa yun vitúm ve ví dzə́ e věn mvəm. A dzə̀ vèn wàa yun wón ve áwune dzəən é věn nsay, aáwune nèn a dzə wír vén kibàm.

⁴⁶A kfə̀n dzə̀ vèn wìy a tumér áwune e wón véné ji vitsə́ʼ vév ŋkuuŋkùŋ, aá kú a ker ji akwàn, e wìy dù, e mày. Yii bèy, fo ké afə̀r vén vee wón Isray ki, lá wìr yòʼ a nə̀ʼsì wùmòʼ.

⁴⁷«A wìr kitum wo vèn áwune dzə́, kìn dzə̀ beèshaà, wù lo, a ker mbàm, fər won wùmòʼ wáa tàn kitan, e fiìnè kitú kfə́ shó ji kwàn, kìn dzə̀ e wìr woo wír vìné kfəə,

⁴⁸wù fiine bey, bo wù kér ghay wo dzə̀ á tìn wun e bàm. A dzə̀ fə̀r wùmòʼ tìn wun.

⁴⁹Kìn dzə̀ fər tàr wov, kìn wan fər tàr wov, kìn dzə̀ wir kfəə woo fó mentsə̀m, bo dzə̀ wù tìn. Á bèy, kìn wù lò, e kòóy mbàm, bo a dzə̀ wù tìn kitú kfə́.

⁵⁰Wù yíi yen wír wo wù‑uù yunen wun, é wùn wun táŋ viyá vee kèʼ fó ghan se wù‑uù fiìnèn kitú kfə́, e dù, e meé e Kiya ke Nsiìr Vifa, aá siysi káv mo á yii laʼ wir lìm, e làʼ viyá vee shooy vidzə̀m ve ví dzəə́ bérí.

⁵¹A viyá vi dzəə́ bér vinín, bo wù laʼ viyá ve ví bér vidzə̀m mo ví dzəə̀n.

⁵²Viyá vi wáa ber vishàr, é bo Kiyá ke Nsiìr Vifa ki gheén, wù yiì nsìysì, e siìr mbàm fo viya ve ví bérí, e bóo tin kitú kfə́.

⁵³Ké wìr kitum wo wù kér wun ki dzə̀ ji wù kú a ker wun moo ŋgaà lìm wo wù laʼ e kitu ke kiya. Vèn wáa yen fo wìr kitum wáa ker fə́r won, a nə̀ʼsì.

⁵⁴A dzə̀ fó dzəə sí fen, la wù yòʼ tìn kitú kfə́, bo wùn à wón vəə́ wíy bòy e Kiya ke Nsiìr Vifa.

⁵⁵A kí dzə̀ bey, bìʼ fo kér mo wír veé Isray mo mò‑oò fəərin áwune fó wòŋ Ejiv. Dzə̀ mo NYÙY TÀR woo Nyùy won.»