Read Lamnso Cù 27 Bible Online

Cù 27 - Lamnso bible

Cù 27

¹NYÙY TÀR yòŋ e Mooser jii,

²«Suúy e wír veé Israyi ji a wìr yiì kilìʼ kee jeéy kí ji wun yíi fo a wír ji cu e NYÙY TÀR,[35] bo wù yíi tin e shùu kav mo wú dzəə̀n.

³Lóo dzə lumèn woo kèʼ fó kiya mbaà, e dù, e meé kiyá mntuùfú, bo dzə̀ á kù tìn e *kisha ke mbàm ke fəvír kí *ashekel mtàn, mo mfìʼ shekel wo dzəə̀n wo cù yii dzə́.

⁴Wáa dzə wiíy, bo dzə̀ ashekel mtaár.

⁵A lò a dzə wír woo kèʼ fó viya vitàn, e dù, e meé kiyá mbaà, bo á tín wo dzəə̀n lumèn ashekel mbaà, e tin wo dzəə̀n wiíy ashekel e ghvə̀m.

⁶A dzə̀ wír woo kèʼ fó ŋwee, e dù, e meé viyá vitàn, bo á tín wo dzəə̀n lumèn ashekel atàn, e tin woo wiíy ashekel ataár.

⁷Wìr wáa dzə, a wù kéʼ fó kiya mntuùfú, a dù duùn fó mbìy, bo á tín wo dzəə̀n lumèn ashekel nshòv sitàn e ghvə̀m, e tin woo wiíy ashekel e ghvə̀m.

⁸«A wìr wo wù kì yiìn kilìʼ kin lò a dzə ghéʼncey wo bó yòʼ dzə̀ wù tìn mo shúu kavi yii dzə́, wù lì wír wo wù kì yíi tin, e wìy sho e taà cù si, é wù siysi káv mo mentàsìn mvə mè dzəə̀n.

⁹A kilìʼ ké wìr ki lò a dzə nyám ye nsər din ji dzə̀ á yiì cu NYÙY TÀR shó, bo nyàm yee shooy sì kifá kee jeéy kí ji ké Nyùy.

¹⁰Bó ŋgaà kilìʼ yòʼ dzəə́ wìy yiì ŋkuvsìn, kìn ji wù li ye juŋ, e kùvsín ye bi shó, kìn ji wù li ye bi, e kùvsín ye juŋ sho. A wù kùvsín, bo fə̀m à ye yì kì dzəə̀n, à ye á kúvsin shó kù sì sé NYÙY TÀR.

¹¹Wìr lo, e kàʼ nyám a dzə̀ ye *kifàn, a bó á yòʼ yii cu NYÙY TÀR shó, bo ŋgaàŋ yíi lì, e wìy, e yen taà cù sho.

¹²Taà cù shwéʼ, e yèn mo yì dzəə̀n, kìn yì bòŋ, kìn yì bìr, é wù yoŋ káv. Káv wo wù yòŋèn, bo kù sì wúwun.

¹³A ŋgaà kilìʼ lò a kòŋ ji wun tín, bo wù laʼ káv woo shooy, e kfə̀n jàv virə́ʼ vitàn, e dzə̀sì kee kimòʼón ki é kitu ke kav.

¹⁴«A wìr cù NYÙY TÀR e lav ji sì kifá ke Nyùy, bo taà cù yíi shweʼ, yén mo yì dzəə̀n, kìn yì bòŋ, kìn yì bìr, é wù yoŋ káv. Mo wù yòŋèn, bo wú tíy fo.

¹⁵A wìr wo wù yiìn cu lò, e kfə̀n a kòŋ ji wun tín lav rə, bo wù laʼ káv woo shooy, e kfə̀n jàv káv lav virə́ʼ vitàn, e dzə̀sì kee kimòʼón ki é kitu ke kav foo fèy, bo lav kfə̀n ne e wun.

¹⁶«A wìr cù NYÙY TÀR e kilíŋ kfə́ ké sum kímóʼ kí wo dzəə̀n vitsə́ʼ, bo á siysì káv sum, a dzə̀ mo a dzə̀ ŋgoòy kifa ke wayín kí nə̀ə́ shó. A súmé lì ŋgoòy sàŋ yee *barli tin e ghvə̀m[36], bo káv sumé dzə̀ kisha ke mbàm ke fəvír kí ashekel mtàn.

¹⁷A wù yiì cu rə́ e súmé, a Kiyá ke Nsiìr Vifa ki kù dzəə́ shaa shaàn, bo kávi kù tíy fo.

¹⁸Yii bèy, wù wáa yiì cu, a Kiyá ke Nsiìr Vifa ki shaá ne, bo taà cù yíi shoʼ kifá fo kitu ke kav. Wù yíi bìʼtì káv, a dzə̀ é kitu ke viya ve ví bér, é bo Kiyá ke Nsiìr Vifa ki gheén.

¹⁹A wìr wo wù yiìn cu e súmé lò, a kòŋ e tin súm və́, e ghan símóʼ sí, bo wù yíi làʼ káv mo wú dzəə̀n, e kfə̀n jàv káv virə́ʼ vitàn, e dzə̀sì kee kimòʼón ki é kitu ke kav foo fèy, bo súmé kfə̀n ne e wun.

²⁰Yii bèy, a ŋgaàŋ lò, e fiìnè súm vən e wìr wo sən, a bó wù yoʼ tòmbìy tìn fo Nyùy, bo wù yòʼ dzəə́ wìy a ker ghay woo kfə̀n tin gheéy.

²¹Wíy lóo dzə e Kiya ke Nsiìr Vifa, é súm woo shooyi kfə́n ji kifá ke NYÙY TÀR ŋkuuŋkùŋ, a dzə ji nshwì və́, aá fó áàtàá cùu ji kéŋ yév.

²²«A wìr cù NYÙY TÀR e súm wo yunéné, a bó yòʼ dzə̀ vitsə́ʼ veé kfəə,

²³bo taà cù biʼtì káv e kitu ke viya ve ví bérí, é bo Kiyá ke Nsiìr Vifa ki gheén, é ŋgaàŋ laʼ mbàm e kishiíy fóo fèy ji kifá ke siìn ké NYÙY TÀR.

²⁴Kiyá ke Nsiìr Vifa ki wíy gheenè, bo súmé kfə́n e wìr wo vé‑eè yunen fó fo, bìʼ fo dzəə̀n vitsə́ʼ veé kfəə foo fèy.

²⁵«Káv se vifa vidzə̀m si kù wíy a dzə mo mfìʼ *shekel wo dzəə̀n wo cù yii dzə́, a shekel mòʼón dzə̀ *gera mbaà.

²⁶«Ké wón nyàm vee dzə́ə mbìyi kí dzə̀ jii, á kù sì vé NYÙY TÀR. Bo dzə̀ ji a dzə̀ la wìr yòʼ kfə̀n a yiì cu sho, kìn dzə̀ wan nàʼ, kìn dzə̀ wo njiì, kù sí kér NYÙY TÀR.

²⁷A lò a dzə dzə́ə mbìyi, a dzə̀ yé nyàm kifàn, bo ŋgaàŋ yíi tin mo kávi dzəə̀n, e kfə̀n jàv káv woo shooy virə́ʼ vitàn, e lì kee kimòʼón ki, e dzə̀sì e kitu ke kav foo fèy. A ŋgaàŋ dzə̀ e là fó yòʼ tin, bo dzə̀ á fiìnè e wìr wo sən, kù mo káv vəə́ dzəə̀n.

²⁸«Ké kifa ke wìr shwiin ne NYÙY TÀR shó shwiín, bo yòʼ dzə̀ á kfə̀n fiìnè, kìn ji á tín, kù sì bey, a fə̀m dzə̀ kee ka, kìn dzə̀ wír, kìn nyám, kìn dzə̀ súm wo dzəə̀n vitsə́ʼ. Kifá ke nshwì kidzə̀m ki sì ké NYÙY TÀR ŋkuuŋkùŋ.

²⁹A dzə̀ wír wo á foon ne ji nshwì, bo yòʼ dzə̀ á kfə̀n tìn, á kù laàr laàrìn.

³⁰«Ké kifa kidzə̀m ke á kavin fó nsay, kìn dzə̀ viyíkìr veé sum, kìn dzə̀ báŋ se vici, bo á jav kirə́ʼ e ghvə̀m, e fo kintóʼ kee kimòʼón ki e NYÙY TÀR ji nsùʼ.

³¹Wìr wáa kòŋ, e tin nsùʼ və, bo wù laʼ káv mo wú dzəə̀n, e kfə̀n jàv virə́ʼ vitàn, e lì kee kimòʼón ki, e dzə̀sì e kitu ke kav, bóo tin sho.

³²Nyám e mòʼón fo see ghvə̀m si dzə̀ nsùʼ NYÙY TÀR. Á táŋ nyám ye yì rúnsi ji ghvə̀m, á bày yee shooy, bo sì yee jeéy ji ye NYÙY TÀR.

³³Lá ŋgaà nyàm yòʼ sìysì e dzəə yee ji fiʼ fəə̀sín ye bi, kìn ji wù kúvsín kuvsín. A wù lò, a tàʼ e kuvsín, bo á táti nyám see sibaà sidzə̀m ji sé NYÙY TÀR, a bó yòʼ dzə̀ á tìn.»

³⁴Á nsər se NYÙY TÀR‑iì foon e Mooser e Gwan Sinay ji wù yoŋ e wír veé Israyi ji á wáa yiì.