Read Lamnso Cù 5 Bible Online

Cù 5 - Lamnso bible

Cù 5

¹Aá tòóy wír e lav nsaʼ, e shìvìr ji wù tiím vinjen, la wù yòʼ fèr kinyo ke wù yenen, kìn ke wù kiìn, bo dzə̀ jay bèy, a njò yíi a dzə rə́ə.

²Kìn wìr lò, e kùm kifá ke *kifàn, là kiíy, kifá moo dzə́n nyàm kifàn, kìn dzə̀ yeé laʼ, kìn dzə̀ yeé kwaʼ, kìn dzə̀ dzə́n kifa ke ŋaŋrìn kí, bo wù kù lì ne kifàn, a wù kér njò.

³A wìr dzə̀ e kifàn kí wùn ke a dzə̀ kí lìysín e wùmòʼ, wìr kum wun là kiíy, e yiì lò, e kìíy, bo ŋgaà kùm kér njò.

⁴A wìr lò, e lìʼ kinyo e kimbùmmbúm ji wun yii á kinyo, kìn dzə̀ ke bi kí, kìn ke juŋ ki, mo wìr lo, wù sàsìn e lìʼ e bóo yiì a kiíy, wù yiì lò e kìíy, bo wù kér njò.

⁵A wìr jày kinyo kímóʼ kí fó vinyò fèn, bo wù kér fó tuuné jay və,

⁶e kfə̀n cù NYÙY TÀR, e fíʼ làʼ njò rə bìʼ kinyo ke wù kì jayin. Wù yíi wìy e njiì, kìn e kifum ki fó ŋgoo bvəy ji cu yee bìʼ lǒn jay, é taà cù táŋrí wun, e màn jay və.

⁷Yii bèy, wáa dzə, a bó yòʼ dzə̀ wù kòóy njiì, bo wù wiy e vibìŋ ví vibaà, kìn e vibuù vi, e fíʼ làʼ njò rə bìʼ jay wo wù yiìn. Kímóʼ kí ji ké cù yee bìʼ lǒn jay, kímóʼ kí ji ké cù yee tòn nyám e dzə̀m.

⁸Wù yíi wìy, e yen taà cù sho, é wù tombìy yiì cu yee bìʼ lǒn jay. Wù kù yíi sàr shinə́n sárin fó kilòŋ, e làa yòʼ tin kitú.

⁹Sarì, é wù wáŋ mensə́ memoʼ mè e virəv vé kiy cù, e màysì kibér, e jiír e sar kiy. Dzə̀ cu yee bìʼ lǒn jay.

¹⁰Á bèy, é taà cù nèn màysì shímóʼ shí ji cu ye tonèné mo kí din fo nsər, e taŋrí ŋgaàŋ, e man jay və, é Nyùy laysin.

¹¹Wáa dzə, a bó yòʼ dzə̀ wù wàa ker vibìŋ vibaà, kìn vibuù vibaà, bo wù wiy e meŋkfəŋ me kpuún mè kilu mòʼón[4] ji cu rə́ jay wo wù jayin. Wù yòʼ yíi cuùrì meŋgvə́r shó, a bó wù yòʼ yíi dzə̀sì sa kiláy kee *frankinsen, bìʼ fo dzəə̀n cu yee bìʼ lǒn jay.

¹²Wù yíi wìy, e yen taà cù sho, é taà cù ŋeʼ kiwó fo fo kifur ji sàʼ, e fəə̀sì e kitu ke cù ye tonèné é kiy cù, e tòn ji cu NYÙY TÀR. Kù sì cu yee bìʼ lǒn jay.

¹³Á mo taà cù ku tàŋrí ŋgaàŋ bèy, e màn jay və, kìn wù jày ka fó vinyò fèy, é Nyùy laysin. Wù yii bèy, é kibér ke meŋkfə̀ŋ ki nèn a dzə ké taà cù, réŋréŋ mo nsər cù vifa ve yi dzəə̀n sá bèy.

¹⁴NYÙY TÀR fó ntò se vinyò símóʼ sí e Mooser jii,

¹⁵a wìr shòʼór nsər Nyùy ji wù yoʼ fò á kifá ke nsər din ji wù kì yíi fo ji cu e NYÙY TÀR, bo wù yíi làʼ njò yee shooy. Wù yíi wìy e kiyáʼ kee là nsem ki, aá kù fiʼ káv kiyaʼ réŋréŋ mo *shekel wo dzəə̀n wo cù yii dzə́. Dzə̀ cu njò yee bìʼ kifá ke wù kì yíi fo e Nyùy.

¹⁶Wù kù kér fó làʼ kifá kee shó ke wù kì yíi fo e Nyùy, e làa yòʼ fo. Wù yíi làʼ, e kfə̀n jàv káv kifa kee shooy virə́ʼ vitàn, e lì kee kimòʼón ki, e dzə̀sì e kitu wo, e fo e taà cù. Taà cù sə́, é wù nèn tàŋrí wun e kiyáʼ ke wù kì foon ji cu njò kí, e màn jay və, é bo Nyùy laysin.

¹⁷A wìr jày, e yiì kinyo ke NYÙY TÀR sháʼnin ji lá wìr yiì, kìn dzə̀ kiné kí, a wù fə̀m yiì là kiíy, wù kù lì njò, a wù kér fó làʼ njò rə.

¹⁸Wù yíi wìy, e yen taà cù e kiyáʼ kee là nsem ke kí gheenen kí ji cu njò, é taà cù nèn tàŋrí wun fo njò ye wù kì liìn là kiíy, é Nyùy laysin jay və.

¹⁹Dzə̀ cu yée làʼ njò, a dzə̀ yé wìr wo wù kér njò e NYÙY TǍR si.