Read Lamnso Cù 7 Bible Online

Cù 7 - Lamnso bible

Cù 7

¹Ké cù yee bìʼ njò kí dzə̀ jii, dzə̀ cu yee jeéyí féyì. A nsər se cù sìn si dzə̀ jii,

²á wíy a see nyam cù rə̀n a dzə̀ é kirə̀ʼ kee fo á yii seé ye cù ye á ton nyám e dzə̀m, lóo see, aá wáa waŋrí mensə́ mvə é virəv vé kiy cù vidzə̀m.

³Á yíi fo fóm si sidzə̀m e Nyùy. Fóm seé kùn, fóm se sí dzəə̀n é wǔn vito,

⁴ndzəʼ see sibaà wùn à fóm sə́ se sí dzəə̀n é shintay si, à kimbày ke bày ke ŋgaà cù kù fəər wùn à ndzəʼ si.

⁵Taà cù wíy tòn e kiy cù. Dzə̀ cu NYÙY TÀR ye və́yí bin fo fo, a dzə̀ cu ye yí laʼ njò.

⁶Ké jav nyàm, a dzə̀ lumèn woo atàá cùú mvə̀m kfəə, wù yì, a wù yí a dzə̀ é kirə̀ʼ kee jeéy kí. Dzə̀ kifá kee jeéy kí féyì.

⁷Nsər cù yee bìʼ njò kù dzə̀ moo ye cù ajay. Taà cù wo wù manrin jay dzə̀ wo wù yíi yòv nyam cù.

⁸Taà cù wo wù yiìn cu wìr ye tonèné, jùv nyàm cù yee shooy yíi a dzə rə́ə.

⁹Cu vifa ve yi ve á naŋsin, e fèr e dzə̀me wíy a dzə yé taà cù wo wù yiìn cu yee shooy, kìn dzə̀ vifá ve yi ve á naŋsin, e tòn, kìn ve á kaŋen é kikaŋ ke sətín kí, kìn e kee tèéter ki.

¹⁰Cu vifa ve yi ve kó vi e dzə̀me nén a dzə yé atàá cù adzə̀m, áwune vee wón Aaron, aá jav réŋréŋ, kìn dzə̀ vifá ve yi ve á tatin meŋgvə́r shó, kìn vee là meŋgvə́r.

¹¹Nsər see bìʼ cu ye wìr fó e NYÙY TÀR ji cu kikòŋnìn si sìne.

¹²A wìr lò a yiì cu rə̀n, a dzə̀ yée beèrì Nyùy, bo wù yii e nyàm cù kikòŋnìn, e bóo kfə̀n dzə̀sì kibán kee là nyaà shó, kfəə́ e taár, ke á tovin meŋgvə́r shó, à ke á vèmèrìn, e bóo yoʼ meŋgvə́r shó yoʼón kí, à ke á fèrìn a dzə̀ e meŋkfəŋ me kpuún mè, e tòv e meŋgvə́r mè.

¹³Wù lóo yiì cu kikòŋnìn rə̀n, yee ji wun beerì NYÙY TÀR, é wù kfən fò sá ntuʼ se kiban símóʼ sí, a dzə̀ see kibán ke nyaà kí.

¹⁴Fo kfəə se kiban sìn, aá ku bàytì ntuʼ e mòʼón mòʼón jeéy jeéy ji ké NYÙY TÀR, é taà cù wo wù kì waŋrin mensə́ me nyàm cù nèn lì mbìv yee shooy.

¹⁵Á kù wíy kfər nyam cù kikòŋnìn ye dzəə̀n cu yée beèrì NYÙY TÀR a dzə̀ e wun kishiíy ké cù. Bó wìr yòʼ wíy lèm kifá fo fo, é kí meé kijàvndzə.

¹⁶Yii bèy, wáa dzə ji wìr wiy e cu kikòŋnìne, a dzə̀ ji wun lem ŋkàʼmé, kìn ji yé kimbòŋwùné, bo á yí e kishiíy ke wù yii cu rə́. Yì rán kibvəə́shí, a kifá ki bér, bo dzə̀ á yì.

¹⁷Á bèy, wáa dzə e kishiíy kee taár, a nyàm dzə̀ə́ sho, bo á kù ton, é yì shwí.

¹⁸A kifá ki bèr fó nyàm cu kikòŋnìn, e meé e kishiíy kee taár, wìr yí, bo wìr wo wù kì yii cu lày ne, a bó Nyùy yoʼ səə̀sí cu rə́. Bo sì lor, wìr wo wù yiin lí lòn fó fo.

¹⁹A nyàm cù rə̀n kùm kifá ke *kifàn kí, bo bó yòʼ dzə̀ á dzəə yì, bo á sí ton tònèn, é yì shwí. Wìr wáa dzə e ránén, là kifàn, bo a dzə̀ wù yì nyam cù kikòŋnìn.

²⁰Wìr wáa ker kifàn, e yì, bo á yíi fəə́r wun fo wír Nyùyí mvəm.

²¹A wìr lòo dzə, e kùm kifá ke kifàn ke kí loòn fo wìr, kìn ke kí loòn fo nyàm, kìn dzə̀ kfə́ə kifàn kiné kí, e yiì lò, e yì nyám ye á cuùn NYÙY TÀR shó ji cu kikòŋnìn, bo á kù yíi fəə́r ŋwèrín fo wír Nyùyí mvəm.

²²NYÙY TÀR kfən yòŋ Mooser,

²³e fò ntò se vinyò símóʼ sí se dzə̀ wír veé Israyi wàa lèm. A sí dzə̀ jii, lá wìr yòʼ wìy yì fóm, kìn dzə̀ sé nàʼ, kìn sé njiì, kìn sé bvəy loŋ.

²⁴A dzə̀ á lì fóm se nyàm ye yì kpuun kpuún, kìn ye yuyrin nyám ye bi, e yiì kifá ke sən kí shó, yii bèy, lá kí yòʼ kòóy ji wìr yí.

²⁵Wìr yí fóm se nyàm ye á cuùn NYÙY TÀR shó,[5] e cu ye və́yí bin fo fo, bo á fəər ŋgaàŋ fo wír Nyùyí mvəm.

²⁶Lá vèn yòʼ wìy yì sá mensə́, a fə̀m dzə̀ me gha, kìn dzə̀ me shinə̀n, kìn dzə̀ me nyàm. Lá vèn yòʼ wìy yì e kirə̀ʼ kidzə̀m fo vèn wíy a dzə.

²⁷Wìr gbu nsər rə̀n, bo á kù fəər ŋwèrín fo wír Nyùyí mvəm.

²⁸NYÙY TÀR kfən fò ntò se vinyò símóʼ sí e Mooser,

²⁹se dzə̀ wír veé Israyi wàa lèm. A sí dzə̀ jii, wìr yii cu kikòŋnìn, bo wù kù fəər mbìv yìmòʼ ji cu NYÙY TÀR ye tayíné,

³⁰e wìy sho e kiwó kfə́ kí ji cu NYÙY TÀR ye və́yí bin fo fo. Wù wiy e fóm se nyàm yee shooy wùn à shúu shiliví, aá nan shúu shiliv é yuv, e dìn e NYÙY TÀR ji cu rə́.

³¹Taà cù yíi tòn fóm si é kiy cù, é shúu shiliví nèn dù aàtàá cùu.

³²Á bèy, é ŋgaà cù nèn kfə̀n fò kibiy ke yìy kí ji mbìv ye wù tayin fo wun cù kikòŋnìn ji ye taà cù.

³³Wàn Aaron woo shó, wo wù kì yiìn cu e mensə́ mè, e yiì e fóm si, dzə̀ wùwun wo wù yíi a ker mbìv yee shooy.

³⁴Fo mvə̀m cu kikòŋnìn wìr veé Isray, NYÙY TÀR shòʼ ne shúu shiliv wo á nanè, à kibiy ke nyàm ye á yiìn cu sho ki, e fò ji mbìv Aaron woo taà cù wùn à wóné. Dzə̀ mo wír veé Israyi kù sí wìy a yiì ghán sidzə̀m.

³⁵Fo cù ye á yii ji yé NYÙY TÀR ye və́yí bin fo fo, á mbìv ye vé‑eè shoʼon ji ye Aaron wùn à wóné, e kèʼ fo ghan se vé‑eè yoʼon áwune ji atàá cù NYÙY TÀR.

³⁶Wáa dzə e kishiíy ke vé‑eè yóʼ áwune, NYÙY TÀR yòŋ ji á mo wír veé Israyi kù sí wìy a fo mbìv rə̀n mo ŋgwàʼ sév sí wíy a dzə.

³⁷Á nsər se cù ye tonèné wùn à sé cù vifa ve yi, à sé cù ajay, à sé cù yee bìʼ njò, à sé cù kinjoʼo, e lì sé cù kikòŋnìn.

³⁸Dzə̀ mo NYÙY TÀR‑iì yòŋèn e Mooser e Gwan Sinay e kirə̀ʼ ké woʼ kí, e kishiíy ke wù‑uù yòŋèn ji wír veé Israyi yii á cu.