Read Lamnso Cù 8 Bible Online

Cù 8 - Lamnso bible

Cù 8

¹NYÙY TÀR yòŋ e Mooser jii,

²«Lì Aaron wùn à wón vəə́, e lì ndzə̀y sé atàá cù si wùn à meŋgvə́r me yoʼ mè, à nàʼ woo lumèn woo wo cù ajay, à viyáʼ vi vibaà, à ŋkaà kiban kee là nyaà, e wìy sho

³e shùu *kibàn ké ntàsín, e bàʼtí màŋgòŋ fo.»

⁴Mooser ku nèn yiì mo NYÙY TÀR suuyin, e bàʼtí màŋgòŋ e shùu kibàn ké ntàsín.

⁵Mooser suúy aáwune jii, «Kinyo ke m lo, a yiì ki kù dzə̀ ke NYÙY TÀR yòŋèn ji á yii.»

⁶Wù suúy bey, e nèn kòʼór Aaron wùn à wóné fó mbìy, a sù virə́ʼ vév.

⁷Wù màysì, e lì kikúm ke da ke fəvír kí, e màʼ e Aaron wùn, e kùr kikuúví. Wù kúr, e lì kikúm ke səənén kí, e màʼ sa e wùn wó, e nèn màʼ shiŋkèéy shé kikum[6] é kitu wo, e nàŋsín, e lì kinsiŋ keé shiŋkèéy ke á bonen, e tsə̀m, e kùr e Aaron mentìntìn ji kí ghár.

⁸Wù nèn lì kifin keé nsaŋ[7], e bàʼrì e shùu shiliv wó, e lì Urim wùn à Tumim[8], e wàyrí sho.

⁹Wù kfən kùr tán ye ndzəméné e Aaron kitu, e sòv kicí ké tan shó, ke á fèrìn e *kisha ke mbàm ke baar kí ji sì á wir Nyùy woo jeéy. Mooser kù‑uù yiì vinyo vidzə̀m réŋréŋ mo NYÙY TÀR‑iì yòŋèn e wun.

¹⁰Mooser nèn lì meŋgvə́r me yoʼ, e yòʼ kibàn ké NYÙY TÀR wùn à kifá kidzə̀m ke kí‑iì dzəə̀n shó ki, ví nèn a dzə vifá, a dzə̀ vé Nyùy.

¹¹Wù wáŋrí memoʼ mè e kiy cù kàŋ saàmbà, e yòʼ kíy wùn à vifá və́ ví, à màkìghìn, à sár vəə́, e yiì bèy ji ví kfə́n ji vifá a dzə̀ vé Nyùy.

¹²Wù màysì, e dù e ké Aaron ki, e sə̀r meŋgvə́r me yoʼ memoʼ mè e kitu wo, e yòʼ ji ŋgaà lìm Nyùy woo jeéy.

¹³Mooser nèn kòʼór lèn wón Aaron. Á wìy fo si, wù màʼ vikúm ve da ve fəvír ví aáwuné wùn, e kùr vikuúví vév, e nèn ndzə̀m tán sí aáwuné vitu mo NYÙY TÀR‑iì yòŋèn e wun ji wù yii.

¹⁴Mooser lò, e kòʼór nàʼ woo lumèn woo bìʼ cu ajay, Aaron wùn à wón vəə́ neér wó yév é kitu wo.

¹⁵Mooser seé, e nèn lì mensə́, e sə̀ʼ e wàn kiwo, e yòʼ loŋ se kiy cù[9] sho, e kaàrí, e tàr, e *kfə̀mrí, e nèn lì kibér ke mensə, e lèér e sar kiy cù ji wú wáa dzə e ránén, a dzə ji kifá ke Nyùy.[10]

¹⁶Wù nèn lì fóm sidzə̀m se sí dzəə̀n é vito, à vifá ve mvəm ví, e lì kimbày ke bày, à ndzəʼ see sibaà wùn à fóm sə́ sí, e tàtí, e tòn e kiy cù.

¹⁷Yii bèy, ké kiber ke nyàm, jáv wùn à jùv, à vitó vi, à jáŋe, wù lì, e fəə̀sín kibeey shó, e tòn e shweesí mo NYÙY TÀR‑iì yòŋèn e wun ji á ku yiì.

¹⁸Mooser nèn lò, e kòʼór kiyáʼ ke cù ye tonèné, Aaron wùn à wón vəə́ neér wó yév é kitu wo,

¹⁹Mooser seé, e nèn lì mensə́, e wàŋrí e kiy cù, e kaàrí, e tàr.

²⁰Á shètì nyám e vibàr vibàr, Mooser tòn kitú wùn à vibar vi, à fóm si.

²¹Á sù vifá ve mvəm ví wùn à vikoy vi, Mooser nèn tòn. Wù‑uù tòn kiyáʼ kee shooy kidzə̀m e kiy cù ji cu ye tonèné, réŋréŋ mo NYÙY TÀR‑iì yòŋèn e wun ji á yii. Kù dzə̀ cu NYÙY TÀR ye və́yí bin fo fo, a kirəm kfə́ kí boŋ NYÙY TÀR.

²²Mooser nèn kòʼór lèn kiyáʼ ke yì‑iì dzəə̀n ké kinjoʼ, Aaron wùn à wóné neèr wó yév é kitu wo.

²³Mooser seé, e sə̀ʼ mensə́, e kùm shóy kitùʼùr ké Aaron ke yìy kí shó, à kiyìy ké kiwo ke yìy kí, à kiyìy ké kiwuù ké yìy kí.

²⁴Á wìy lèn e wón Aarone, Mooser sə̀ʼ mensə́, e kùm shóy sé vitùʼùr vév vé yìy ví shó, à viyìy vé kiwo ve yìy ví, à viyìy vé wuù vé yìy ví, e wàŋrí kibér ke mensə e wǔn kiy cù, e kaàrí, e tàr.

²⁵Wù nèn lì fóm si, seé kùn wùn à se sí sətin vitó si sidzə̀m, à kimbày ke bày ki, à ndzəʼ see sibaà sí wùn à fóm sév sí, à kibiy ke yìy kí.

²⁶Wù nèn tàʼ ntuʼ kiban kee là nyaà fó ŋkaà, e fə̀ə́r kibán ke á tovin e meŋgvə́r mè, e fə̀ə́r ke á vèmèrìn vémerin, ntuʼ e mòʼón mòʼón, e nèn bàʼtí fóm wùn à kibiy ke yìy kí, e neèr kibán kee shooy e kitu wo.

²⁷Wù lì vifá vìn, e wày e Aaron wùn à wóné wo, á nàn e NYÙY TǍR si ji cu NYÙY TÀR.

²⁸Mooser nen kfə̀n sə̀ fo áwuné wo, e neèr e kitu ke nyàm ye yì sí shwí e kiy ji cu ye tonèné, e tòn ji cu kinjoʼ. Dzə̀ cu NYÙY TÀR ye və́yí bin fo fo, a kirəm kfə́ kí rəm, rəʼtìnè.

²⁹Mooser nèn lì shúu shiliv, e nàn e NYÙY TǍR si ji cu. A dzə̀ mbìv wun woo Mooser fo nyàm kinjoʼ mo NYÙY TÀR‑iì yòŋèn e wun.

³⁰Mooser kfən lì meŋgvə́r me yoʼ memoʼ mè, e ŋòʼ mensə́ fo kiy cù, e wàŋrí e Aaron wùn à wóné wùn, e wàŋrí memoʼ mè ji meé ndzə̀y, e yiì bèy, e lèm Aaron wùn à wón vəə́, à ndzə̀y sév sí ji wír wùn à vifá ve siìn ji vé Nyùy.

³¹Mooser suúy e Aaron wùn à wóné jii, «Vèn naá jav nyàm e shùu kibàn ké ntàsín, e yì fó e kibán ke kí dzəə̀n é ŋkaà kinjoʼ ki, kù mo Nyùy‑iì yòŋèn ji vèn à wóné wíy yi.

³²Nyàm bérí, kìn bèr kibán, á tòn é və̀y.

³³Vèn yòʼ yíi fəə shúu kibàn ké ntàsín, e meé mo vishiíy vén vé kinjoʼ vee saàmbà vi yíi mày. Kí kù li kishiíy saàmbà, é bo á maysi, e yòʼ ven.

³⁴Mo á yiìn lán bèn, dzə̀ mo NYÙY TÀR‑iì yòŋèn ji á táŋrí ven, e màn ajay vén.

³⁵Vèn kù wíy gòʼ e shùu kibàn ké ntàsín, à shùy, à vitsə́ʼə́ kishiíy saàmbà, a yiì mo NYÙY TÀR‑iì yòŋèn. Là bey, bo vèn‑éè kpúkír. Á mo NYÙY TÀR yòŋèn e mò ben.»

³⁶Aaron wùn à wón vəə́ ku nèn a yiì kinyo kidzə̀m mo NYÙY TÀR yòŋèn e Mooser.