Read Lamnso Jeremia 10 Bible Online

Jeremia 10 - Lamnso bible

Jeremia 10

¹Éè wìr veé Isray, vèn yuúrí kinyo ke NYÙY TÀR suuy e vèn kí.

²NYÙY TÀR suuy jii: «Lá vèn yòʼ a bìʼnìn liì vitum. Lá visəəm ve ví fəə́sin e mbàʼ vi yòʼ a bemér ven, fə̀m mo vitúm vi fanè.

³Liì wov woo kùm cu dzə̀ kifá kisáŋ. Á gwar kicí fó kòv, ŋgaà fèr nèn lì njàm rə, e sèm shó.

⁴Áwune bárir *kisha ke mbàm e wùn wó, ke fəvír kí, e lì sa ke baar kí, á nèn tìír, e kùm viŋkùm, e fàr shó, fo shí wáa sə̀ʼ.

⁵Mebvə̀m mev mè dzə̀, a mè tíy moo vibámmbó veé súm bòʼ, á bó yòʼ dzə̀ mè sùŋnín. Á lo, á kù bèʼèy bèʼèyìn, a bó yòʼ dzə̀ mè ghàn. Lá vèn yòʼ a fàn, yòʼ dzə̀ mè yiì kinyo e vèn, kìn dzə̀ ke juŋ ki, kìn ke bi kí.»

⁶Éè NYÙY TÀR, wìr woo moo wò yòʼ dzə̀, à dzə̀ e gháʼtín. Yír yée dzə̀ e wíy, bìʼ vitaáví vé ve ghaʼán ví.

⁷Caamfoò, Fòn vitum, dzə̀ la wo yòʼ dzə̀ wù wàa ghvəm wò? Dzə̀ kilíŋ ké ji á wáa ghvəm wò. Mo akiíy veé vitume dzəə̀n wùn aàfon véví, wo dzə̀ á lì, a fìʼsìn wò sho yòʼ dzə̀.

⁸Áwune adzə̀me dzə̀ viyúŋ, aá kfə̀n jiŋè. A dzə̀ áwune yèʼéy ka fo mebvə̀m mè, aá sém a dzə̀ kicí?[22]

⁹Á lo, á wìy e kisha ke mbàm ke fəvír kí fó Tarshish, e wìy e ke baar kí fó Ufas, e lòm shó. Vifá vìn vi kù dzə̀ lím vé fèri wùn à vé kilàme. Áwune fer bèy, á nèn kùr ndzə̀y é wùn wó. Ndzə̀y se vé fèri naŋsin, e bà, e nàá, sí wáa rə̀sìn ji lìŋ.

¹⁰Yii bèy, dzə̀ wò NYÙY TÀR, Nyùy wo ru. Dzə̀ wò Nyùy wo tin, a vifon vé ví wíy shaàrì. Aà shwìíy kilòŋ, kitú ke nsay ki sə̀ʼsì, dòʼshwíiy wò kóʼ, la vitúm vi yòʼ tìím.

¹¹Á suúy e wíri jii, mo anyùyi dzəə̀n a bó yòʼ‑oò bòm áwune yúv wùn à nsay, á wíy bvəʼə́y, e lày fo kitu ke nsay.

¹²Kù‑uù bòm Nyùy kitú ke nsay e vitaáví və́ ví, e bàʼrì ndzə e vifií və́ ví, e nèn fèr yúv mo kiìn wun, wú kfə́vsí.

¹³Wù baʼ jí fo shuù, ndzə́v yeé yuví[23] wàa dzə̀mkìr. Wù lo, wù wìy e mbàʼ fo buu se ndzə. Wù lo, wù yiì, wuú wàa lo, a bàvkìr, lo, wù fə̀ə́r shwér fo wùn virə̀ʼ vé lèm.

¹⁴Ké wìr msòŋ kí dzə̀ a dzə̀ viyúŋ adzə̀m, a bó á yòʼ kér vifií. Vé kilàme sí woóme, bìʼ mebvə̀m me á fèrìn. Vibámmbó ve áwune fèrìn ví dzə̀ kimboʼtì, ví yòʼ dzə̀ vitin.

¹⁵Kù dzə̀ kifá kisáŋ ke á wáa kèŋ kèŋèn. Kishiíy ké nsaʼ ki gheenè, aá bvə́ʼə́y, é ví lay láyin.

¹⁶Nyùy wo Jakov cu yòʼ dzə̀ moo vifá vee shooy. Dzə̀ wun wo wù‑uù bomen vifá vidzə̀m, e nèn shàv Isray ji və́ vee wír. Yír rəə́ dzə̀ NYÙY TÀR woo Taà Mànjòŋ.

¹⁷Wír veé Jerusalem, aŋgàa vibàné gìm ne ven, e tàr, vèn báʼtí vifá vén ví mo á lo, a fəə.

¹⁸NYÙY TÀR suuy jii, «E kee lèn ki, m sí lo, e kuúr wir dzə̀m wo wù dzə́ e wòŋàn. M yíi màʼ ŋgeʼ ye tavín aáwuné kitu, aá yú mo á koó.»

¹⁹Wír veé Jerusaleme wáa toŋ jii, «Óboóy, vèr lèm ne e dzəə ye biibí, a kileémé kér kí dzə̀ é ŋàŋ féyì. Vèr‑iì kí kér ji kí yií a dzə a e dzəə ye dzə̀ vèr kùʼtí.

²⁰Á sàʼày ne vibàn vér, e tiìné akfəə̀ və́. Wón vérí kpùkír ne adzə̀m. Wánlè yoʼ dzəə bèr wóo kfə̀n bàʼrì vibàn vér, e bó a keèrì ndzə̀y shó.»

²¹M bìnèr jii, «Vilìmbìy vesən ví dzə̀ viyúŋ. Á yòʼ lo, á wàa mbaà NYÙY TÀR. Á kinyo ke kí màʼàn áwune, wír vesəné nen tàʼrí taʼrín.

²²Vèn yuúrí, e yù, léŋe sí wiyì, ŋkfə̌n vé rərí keèmè ne, a wìy fo vitum veé mbìv yee kuy. Á sí lo, e bvəʼə́y ŋkà se laʼ seé Juda, é fóo kfə́n ji kirə́ʼ ke yii dzə́ kuúrá shó.

²³«Éè NYÙY TÀR, m kì ji bó yòʼ dzə̀ wìr tìr kitú kfə́, a bó yòʼ jòʼsì wír, wù kìíy mó a tiír kiwuú kfə́, a fìʼ.

²⁴Naàrì mo, éè NYÙY TÀR, a dzə̀ mo dzə̀ kí wàa dzə. Lá à yòʼ lì a dzə̀ mo dòʼshwiiy wò dzəə̀n, fóo lò, e səʼsí mo səʼsín.

²⁵Dìn dòʼshwiiy wò e vitúm ve ví yòʼ ghvə́m wò vi, ku dìn e wír ve á tenen fó a cù wòo. Áwune bvə̀ʼə́y ne rám Jakov, e laàr ŋkuuŋkùŋ, woŋ wóví dú é vifə̀m.»