Read Lamnso Jeremia 11 Bible Online

Jeremia 11 - Lamnso bible

Jeremia 11

¹NYÙY TÀR‑iì sùŋnín e Jeremia jii,

²«Yuúrí ntò se *mensàŋ mem mè, e naàrì e wír veé Judàa wùn à veé Jerusaleme.

³Suúy aáwune ji NYÙY TÀR woo Nyùy woó Isray yoŋ a jii, ‹Lòné dzə̀ wó wìr wo wù yòʼ lem ntò se mensàŋ sìn,

⁴ntò se mò‑oò foon áàtàr véví, e ghan se mò‑oò fəər áwune fó wòŋ Ejiv, fo vé‑eè yén ŋgeʼ mo á ton a dzə̀ kilam. Mò‑oò yòŋ ji áwune wáa yu jí yem, a yiì kinyo kidzə̀m ke m suuyin, aá nèn a dzə a wír vém, é m wáa dzə Nyùy wov.

⁵Á bèy, e nèn wìy yiì kinyo ke mò‑oò kàʼàn áwune shó, e lìʼ ji m wíy fo a áwune nsay, a dzə̀ ye vín nàʼ wùn à vilu vi tsəətìn sho. Kù dzə̀ yìwun ye áwune vee wón wìr vee shooyi dzə́ sho lán və̀n.› » M nèn bìnsí jii, «Amen, NYÙY TÀR.»

⁶NYÙY TÀR kfən yòŋ e mò jii, «Dù, a fìʼtì kinyo kém kí é ŋkà se laʼ seé Juda, e kfə̀n a fìʼtì sa e dzəə seé Jerusalem, aá fiʼ yuùrí ntò se mensàŋ mem, a yiì mo sí dzəə̀n.

⁷Ku fìʼtì ji m yoŋ a jii, ‹E kèʼ mo mò‑oò fəərin atàr vén fó nsay Ejiv, a kàntì áwune akàŋ akàŋ, m kù dzəə́ kantì ven, e wìy shem lán ji vèn wáa yunín a mo.

⁸Yii bèy, bó áwune yòʼ‑oò lo yuùrí, aá yòʼ‑oò ló a gwàrìr feyì. Wìr kù‑uù yii kinyo, a dzə̀ ke shilív sə́ shí tíy sho. M nen bàʼtí lòn e dzə̀m, e màʼ e vèn vee wón véví kitu, a dzə̀ lòn wo á naàrìn é ŋwàʼ mensàŋ me mè‑eè dzəə̀n ji vèn wáa tiy sho, é bo á tén.› »

⁹NYÙY TÀR nen kfə̀n sùúy e mò jii, «Wír veé Juda wùn à ve á dzə́ e Jerusaleme sí kár menàŋ e wò bàm.

¹⁰Áwune kfə̀n ne, a yiì vinyo ve kisaŋ vi ve atàr véví‑iì yii. Atàr véví‑iì tèn fó a yu kinyo kém. Áwune‑eè lò, a leʼnín a dzə̀ áànyùy kisaŋé bàm, a cù. Wír veé mbìv Isray wùn à veé mbìv Judàa tàtí ne adzə̀m, e bìvír mensaŋ me mò‑oò gwàrìn vèr aàtàr véví.

¹¹Bìʼ bey, mo woo NYÙY TÀR nen kàʼ jii, ‹M yíi màʼ ŋgeʼ aáwuné kitu, ye bó yòʼ dzə̀ á bòy fó fo. Áwune yíi lòo toŋ e mò, é la m yòʼ yuùrí.

¹²Ŋgeʼ si lóo ghaʼ, wír veé ŋkà se laʼ seé Juda wùn à veé Jerusaleme lóo dù, lóo toŋ aànyùy ve áwune rə́si cu e kiláy kií, é la á yòʼ fə̀m sə̀ áwune.›

¹³Éè Juda, anyùy véné dzə̀ nyanyày mo ŋkà se laʼ sén sí dzəə̀n, a kíy se cù see fo vèn ton kiláy, cu *Baal sho si dzə̀ sinín moo dzə́ə se sí ghanen é Jerusalem.

¹⁴«Jeremia, lá à yòʼ yiì a bùnrì, lá à yòʼ yiì a buʼ wó e mò bìʼ wír vìn. Aáwune lò, a toŋ, a mbaà mo é ghan se á dzəə̀n é ŋgeʼ, bo m yòʼ‑óò yuúrí.

¹⁵Ábáy, wír ve mò‑oò liìn ji shilív shémé wiy lèn, e yiì ka e mǒ lav, aá jáy ne e ŋàŋ, e yii yév kisaŋe. Áwune kwaʼtì ji dzə̀ m tsə̀ʼ ŋgeʼlàʼ bìʼ cu ye áwune cu mo e nyám si a? A dzə̀ á wàa sheʼrí kév a dzə̀ ka?»

¹⁶Wír veé Isray, NYÙY TÀR‑iì yoŋ ven ji kicí ké *oliv ke kí toon sí, kicí ke kí teʼ, kfə̀n koom báŋ ye juŋ. Yii bèy, a wù sí wìy tòn kicí kin, é kí wáa shwi, a ghvəə moo kinsəm, é tám si wáa faàkìr.

¹⁷NYÙY TÀR woo Taà Mànjòŋ, wo wù‑uù tuuyin ven bàʼtí ne a dzə̀ ŋgeʼ, e taàmé ven shó, a dzə̀ bìʼ liì kisaŋ wo ven vee wír veé Isray wùn à veé Judàa yiìn. Vèn ton kiláy, cu Baal sho, ŋáʼar dòʼshwiiy NYÙY TÀR.

¹⁸NYÙY TÀR‑iì yiì, m kiíy menàŋ me wíri‑iì loòn, a kar e mǒ bàm. Wù‑uù yiì m kiíy kinyo ke vé‑eè táŋ kùm mo,

¹⁹a mò‑oò dzə́ kém nyaáŋ nyaáŋ moo wan njiì wo á liìn ji á du, e see, a bó wù yòʼ gwarìrì. M yòʼ‑oò ló a kiíy ji á kàr á ne menàŋ e mǒ bàm, e yòŋ jii, «Á laar á kicí wùn à báŋ sə́ sí. Á tsəʼ á ŋwèrín fó wòŋ wìr ve tine, é la wìr yòʼ dzəə wìy a kuumé yír rə́.»

²⁰Yii bèy, éè NYÙY TÀR, Taà Mànjòŋ, wò wo à yii tínen vinyo vé réŋ, aà kfə̀n lo, à mùmrì melív me wíri wùn à vifií vév ví, ku yiì, é m yén mo à siir ŋkfə́tír aáwuné kitu. M wày ne kinyo kidzə̀m a dzə̀ e wò kiwo.

²¹NYÙY TÀR nèn lò, e sùŋnín kùm wír veé Anatot ve á taʼ e yuyrí mo, suuy ji m wáa yen a fóo kfə̀n yiysí kinyo e yír NYÙY TÀR, a m mùm, bo áwune yúyri a mo e wóo.

²²Wun woo NYÙY TÀR, woo Taà Mànjòŋ yòŋ jii, «M yíi màʼ ŋgeʼ aáwuné kitu. Wónlě nsùm véví yíi kpu e shùu rər, é wón vév vee vilum wùn à vee vikìyí kpúkír jíŋ.

²³M wíy màʼ ŋgeʼ e wír veé Anatotí kitu e ghan see shó, é la wìr mòʼón yòʼ bèr.»