Read Lamnso Jeremia 13 Bible Online

Jeremia 13 - Lamnso bible

Jeremia 13

¹NYÙY TÀR lò yòŋ e mò jii, «Dù, e yùn bàtàrí wo á tarin e ndzə̀y see làv woo fèm si, e kùr e wò mentay. Kú a yen fo mendzə́v mè kum.»

²M ku nèn yùn bàtàrí mo NYÙY TÀR yòŋèn, e kùr.

³NYÙY TÀR nèn kfə̀n lò, e yòŋ mo fó akàŋ vee abaà, e sùúy jii,

⁴«Shóʼ bàtàrí wo à yunen, e kùr və̀y, e lì, e dù sho e ndzəv yee Perat[25], e lìtì e nsàn kilan.»

⁵M nèn dù, e lìtì e ghaa ndzəv yee Perat mo NYÙY TÀR‑iì yòŋèn e mò.

⁶Vishiíy ví líysín vinín, NYÙY TÀR nèn sùúy e mò jii, «Ŋáʼáy, e dù e Perat, e lì bàtàrí wo mò‑oò yòŋèn, à dù, e lìtì fo.»

⁷M nèn dù, e tùŋ fo mò‑oò lìtìn bàtàrí, e fə̀ə́r, e yèn, a wù bír ne, a bó lùŋfófo yòʼ dzə̀ə́ sho.

⁸NYÙY TÀR nèn kfə̀n sùŋnín e mò.

⁹Wù‑uù sùúy jii, «Dzə̀ mo m yíi yiì, é kinyo ke wìr veé Juda ki bír, é kiŋkoʼòrwùn kév kí may, é kiràʼsìwùn ké Jerusalem ki seéy.

¹⁰Wír liì kisaŋ vìn, á tèn ne fó a yu kinyo kém, a tav a dzə̀ kitú, a yiì kinyo a dzə̀ ke melív mev mè tíy sho, jumrì anyùy vitum, ghvə́mé, kfə̀n cu. Áwune kù wíy lày sa kisáŋ moo bàtàrí və̀n.

¹¹A dzə̀ bìʼ fo mò‑oò liìn wír woó Isray wùn à woó Juda e dzə̀m e mǒ wùn ji á ghár mo, mo bàtàrí lo, wù ghàr mentìntìn me wìr. Suuy mo woo NYÙY TÀR. Mò‑oò li áwune bey ji á wáa dzə wír vém, é leŋ wómé fíʼ a dù, aá wáa sùyrì mo, e kfə̀n a koʼór yír yém. Yii bèy, la áwune yòʼ yuùrí kinyo kém.»

¹²NYÙY TÀR woo Nyùy woó Isray nèn sùúy ji m yoŋ aáwune ji á kù kér fó way a meluʼ vitém vidzə̀m. A m lòo dzə, e yòŋ, áwune biner jii, dzə̀ ji bó vèr yòʼ kì kì ji dzə̀ á wày meluʼ e vitem à,

¹³m bìnèr aáwune á ji wun woo NYÙY TÀR yoŋ a jii, wun yíi noór a wir dzə̀m wo wù dzə́ e nsay fèn, é wù nó, a baa. Afon vee anjìlaʼ Fòn Daviri yíi a baa, áàtàá cùu wáa baa sa, e lì aŋgàa ntum Nyùy wùn à wìr dzə̀m wo wù dzəə̀n é Jerusalem.

¹⁴Wun yíi a lì wír, a fòr a wùmòʼ shó, à ŋgàywìr, à wánlè, suuy a wun woo NYÙY TÀR. Yòʼ dzə̀ wun yiì rə̀r á mendzən mev, e shàm á áwune, e lèm a ji á goʼ atin.

¹⁵Wír veé Isray, NYÙY TÀR sùŋnín ne. Vèn wáa yu kinyo kfə́ kí, e làa yòʼ a koʼór wún.

¹⁶Vèn wáa sùyrì NYÙY TÀR woo Nyùy won, é bo wù yiì a wìy e ndzə ye sənér, é vèn wáa bàyrìn, a bàyrìn aàgwan ve á səə́ne, a bó vèn yòʼ yén rán fo. Vèn wáa sùyrì wun, é bo wù biner ndzə ji ye vitsə̀ʼ, é wáa dzə tím vitsəʼə́.

¹⁷A vèn dzə̀ là fó yuurí, bo m yíi a dìy e kilìr bìʼ kiŋkoʼòrwùn kén. M yíi a dìy feyì kibiíbí, é mensíy mè wáa dàn fo mǒ si, a dzə̀ bìʼ wír NYÙY TÀR ve aŋgàa vibàné koorin ne ji akwàn.

¹⁸NYÙY TÀR yòŋ e mo jii, m suúy á e fòn wùn yaà yeèfòn jii, «Vèn sə́ʼə́y fó kàvàʼ. Vijuŋ ve ntáráʼ won ví mày ne. Ví keèsí ne fo věn kitu.

¹⁹Rə́r sí gìm ne ŋkà se laʼ seé Negev, a bó wìr yòʼ dzə̀ wóo tosín fó, e sə áwune. Á koòrí ne wír veé Juda adzə̀m, e dù sho e kwaʼ nsàm. Á kùúy ne áwune adzə̀m, e dù sho ŋkuuŋkùŋ.»

²⁰Jerusalem, vèn nan síi, e lèéy, e yèn. Aŋgaà vén vibàné sí wiy fo wòŋ kùyi. Wír ve vé‑eè lèmèn e vèné bèé? Wír, a vèn‑eè kóʼor wún shó.

²¹Ntom sén sí bìnkìr ne ji aŋgaà vén vibàn. Á lo koʼór áwune, á lóo taa e věn kitu, é vèn yée? Bó nyári yòʼ yíi ghaʼtí ven moo yé wiíy wo wù lúmé à?

²²A tàm vèn lò, a ghay jii, «Yiì ka, é bo vinyo vìn vi wáa koóy ver? Yiì ka, é bo á tiíné ndzə̀y sér, e lòvtí e vèr ben?» Kù dzə̀ bìʼ yii yén kisaŋe ye á yiìn ne, e tònén.

²³A dzə̀ wìr woó Etiopia[26] kùvsín nshòm rə á? A dzə̀ baá kùvsín vishom və́ á? Bo yòʼ dzə̀ sá ven ve á merìsìn ne a dzə̀ yíi kisaŋe, vèn kfə̀n yiì kinyo kee réŋ kí.

²⁴NYÙY TÀR suuy jii: «M kù yíi taʼár ven moo mvə́y, mvə́y se taʼarin shwér woó woʼ.

²⁵Kin ki sì kilíŋ kén. Dzə̀ mbìv ye m shoʼon ji yéen, bìʼ fo vèn làysìn ne mo, a ghvəm a dzə̀ anyùy kisaŋe. Suuy mo woo NYÙY TÀR.

²⁶Mómò kitú kém, m yíi nàn ndzə̀y fo věn sar, é kinshóʼ kén kí yénsín.

²⁷M yèn ne joonè wo vèn yii. Vèn sí yii a dzə̀ visàkì. Vèn ghvə́m anyùy e vitu ve agwan, ghvə́m e viwoóy. Vèn yii moo lumèn wo wù ghán e wiiy wìr bàm, kìn mo nyàm yee lumèn shiì yee wiíy. Éè Jerusalem, lòné dzə̀ wón. Liì won kisaŋ və̀n wíy mày e ghàn ka?»