Read Lamnso Jeremia 15 Bible Online

Jeremia 15 - Lamnso bible

Jeremia 15

¹NYÙY TÀR nèn yòŋ e mò jii, «A fə̀m wìy Mooser wùn Samuel, a tiy e mǒ si, a lon, bo bó yòʼ dzə̀ m kùvsín kwaʼtì yém, e lèéy wír vìn. Jùm áwune fo mǒ si, aá dukir.

²Aáwune lòo dzə, a dzər e wò jii, ‹Vèr yíi dù a dzə̀ feé?› à bìnèr ji NYÙY TÀR yòŋ a jii: « ‹Wír ve á kì wíy kpu a dzə̀ kifə̀ʼə, du, e kpu kifə̀ʼ. Ve á kì wíy kpu e shùu rərí, du, e kpu rə́r. Ve á kì wíy kpu jíŋe, du, e kpù jíŋ. Wír ve á kì wíy koorí ji akwàné, du, aá koórí.›

³«M wíy yiì, é virə́mrə́m vé vinyò vi koóy áwune, e laàr dzə́ə sikweè. Suuy mo woo NYÙY TÀR. Rə́r sí wíy yuyrí áwune, é jwí si sati, é menə́n meé yuv wùn à nyám se kwaʼ si maysi, e kfə̀r.

⁴M wíy lovtí aáwune ye vitúm veé kitu ke nsay vi wáa leéy, é wúné wáa beemé áwune, a kù dzə̀ bìʼ kinyo ke Manasse woo wan Hesekiya‑aà yiìn é Jerusalem, e ghan se wù‑uù sáʼ vifon e Juda.[28]

⁵«Éè Jerusalem, wíy a sham la ven? Wíy a dìy la ven? Wíy lì la ghán sə́, a dzər ji vèn sà dzə̀ é le á?

⁶Vèn mèŋ ne mo, e bìn ndzə̀m e mò. M wíy màʼ kiwó kém, e ghar ven shó, e laàr. M dòr ne, yòʼ dzə̀ m dzə́ə a ker mendzən fo vèn. Kù suuy mo woo NYÙY TÀR.

⁷Rúrú, m wíy feér áwune, e taʼár moo mvə́y, é la wìr yòʼ bèr é ŋkàlaʼ yìmòʼ é wòŋàn. M wíy laàr wír vém, e yuyrí wón vév, bìʼ fo áwune tenen fó kuvsín yii yév.

⁸M wíy yiì, é vikǐy ŋkfə véví kuʼ, e shaà síy seé ghaa ndzəv. M wíy wìy e ŋgaà laàr e ntìntìn shùy, é wù kiʼ ayǐy won vee vilum. Ŋgeʼ si wíy sàsìn e gbù aáwuné kitu, aá wáa yàʼ.

⁹Wiíy wo wù làyìn wón və́ vee saàmbà sí fénkir, fér kiyoy. Ndzə ye ranén kfə̀n ne fo wun ji vitsə́ʼə́. Á shòór ne wun, nyári wáa dzə e wun shiliv. Ké kiber ke wìr vév, m wíy màʼtì sa áàŋgàa vibàné yúyrí. Suuy mo woo NYÙY TÀR.»

¹⁰Éè mò, yì‑iì yiì ka, é bo yè wor wáa dzəə́ mo féyì? Wan ŋkfə wìr, a wìr dzə̀m woó kitum banè, kfə̀n kuurì. Mo, a m yoʼ foòr wír kifá, a bó wìr yoʼ foòr mo. Yii bèy, a wìr dzə̀m kù kuu mo kúun.

¹¹NYÙY TÀR bìnèr e mo jii, «E ké ru kí, m yíi lùŋèr wò, áà wáa dzə e shií, ŋgeʼ si lóo nəə́, vinyo vi lóo ghaʼ, é m kú a yiì, áàŋgaà vé vibàné wáa wìy, a mbaà a dzə̀ wò.[29]

¹²A dzə̀ wìr bèʼ kisha kee wúntí kíwun kee wìy fó wòŋ kùyi á? A fə̀m dzə̀ kisha kee *brons, bo a dzə̀ wìr bèʼ á?

¹³Yii bèy, ké keŋ yén wùn à bùʼ won, m wíy fo aàŋgaà vén vibàné kisáŋ ji nsàʼmboʼ, a dzə̀ bìʼ ajay ve vèn bùʼtìn woŋ wón e dzə̀m.

¹⁴M wíy yiì, é vèn wáa rèŋ vikwàn fo aŋgaà vén vibàné e wòŋ wo vèn yòʼ kiìn. Dòʼshwíiy wom yii kóʼó, wù wàa baarí moo və́y, e làa yòʼ a ndzəmén.»

¹⁵M nèn bìnèr jii, «Éè NYÙY TÀR, à kì féyì, ku kuùmé mo, kuúme, à wàa leéy mo. Siìr ŋkfə́tír áàŋgaà vém vibàné. Wò, wo à yòʼ yii táv shwiiy kilòŋ, lá à yòʼ laàr mo. Kuúmé ŋgeʼ se m yenen ne bìʼ kinyo ké si.

¹⁶Kinyo ké ki‑iì wìy, e yèn mo, m lí moo viyíkìr. M kér kishéʼrì mo shilív shém shí‑iì tíy sho. Éè NYÙY TÀR, Nyùy woo Taà Mànjòŋ, m kù dzə̀ wo woo wír.

¹⁷M yòʼ‑oò lo yiì tàtí ŋgoo wìr ve á léŋ shéʼ, yú vijuŋ. Mò‑oò sóm vèr mòʼón, bìʼ fo mò‑oò siìn a dzə̀ e wò kiwo, aà yií ne, dòʼshwiíy wáa kiv mo bìʼ wír vìn.

¹⁸Dzə̀ ka ke nyár yémé yòʼ yarì? Kileémé kém kí kù yár yarín, tén fó bonén ji ka? À yíi a dzə fo mò moo dàn wo wù lo, wù yùm e lùm à?»

¹⁹Á bèy, NYÙY TÀR nen bìnèr jii, «Aà lòo dzə, e kùvsín, bo m yíi lì wò, áà wáa lìm fo mò. Aà lòo dzə, a suúy a dzə̀ vinyo ve ví kér mvə́m, e yàr kiyúŋsì, bo à yií a dzə ŋgaà ntum wom, é wír vìne nèn kfə̀n é bàm, e yèn wò, é la yòʼ dù wò, e yèn áwune.

²⁰M wíy yiì, áà wáa dzə fo áwune moo kikum ke kirəv, kirə́v ke á bàʼrìn e kisha kee brons ki. Áwune wíy a fùnèn wò, á bèy, e làa yòʼ ghaʼ wò. M kù wíy a dzə wòsò, a sə wò, a bòyìr wò. Suuy mo, NYÙY TÀR.

²¹M wíy yiì, áà boy fo vé yiì kisaŋé wo, e tin wò fo vé nə̀ʼsìí wo.»