Read Lamnso Jeremia 18 Bible Online

Jeremia 18 - Lamnso bible

Jeremia 18

¹NYÙY TÀR súŋnín e mò woo Jeremia jii,

²«Lò, e sə̀y e wìr wo wù bóm kíŋ sí laʼ. M yíi suŋnín e wò a dzə̀ fó.»

³M nèn sə̀y e wìr wo wù bóm kíŋ sí laʼ, a dù, a wù fer kíŋ e wun kar se lìm.

⁴Wù li mbóm, lóo bom kíŋ shó, yí bírí, wù nèn kfə̀n lì mbóm woo shooy, e bòm a dzə̀ kifá ke sən kí shó mo wù kòŋèn.

⁵NYÙY TÀR nèn tiìsí ntum rə e mò, a yì dzə̀ jii,

⁶«Éè wìr veé Isray, a dzə̀ la m yòʼ yiì sa e vèn mo wìr və̀n yiìn e mbóm ben à? Suuy mo woo NYÙY TÀR. Wír veé Isray, vèn yuúrí, e yù. Vèn kù dzə̀ e mǒ kiwo moo mbóm wo wù dzəə̀n e wìr wo wù bóm vifá kiwo.

⁷A m lòo dzə, a fə̀m dzə̀ é ghàn ka, e sùúy e kitúm ki ji m sí men a áwune, e kètì virə́ʼ vév, e laàr fó,

⁸kitúm ke m yòŋèn shó ki kúvsín liì wov wo bi, bo m sí binèr sa kwaʼtì yém, e làa yòʼ dzə́ə yiì kinyo ke m kì wayin ji m yii aáwune.

⁹M lòo dzə, a fə̀m dzə̀ é ghàn ka, e yòŋ e kitúm ki, kìn e woŋ woo shóo ji m yíi bàʼrì áwune, e tuúy,

¹⁰áwune lo, a yiì a dzə̀ vinyo ve bi ví, e làa yòʼ a yunín mo, bo m yíi kuvsín sa kwaʼtì yém, e làa yoʼ dzə́ə yiì kinyo ke juŋ ke m kàʼàn áwune shó.

¹¹Á bèy Jeremia, bo dzə̀ lèn ji à yoŋ e wír veé Juda wùn à ve á dzə́ e Jerusaleme ji NYÙY TÀR suuy a jii, ‹Vèn leéy, e yèn, m sí siysì ŋgeʼ ye m lo, e kìʼ ven shó, báʼti mo m lo, e nəə́ ven shó. Wìr mòʼón mòʼón kú a kuvsín liì və, a màʼtì liì və wo bi, e màʼtì yíi kisaŋe.›

¹²Yii bèy, áwune kù yíi dù, e sevtí jii, bó yòʼ dzə̀ kí kòóy. Vèr yíi a yiì a dzə̀ kér, é wìr kú a yiì kinyo a dzə̀ mo shilív sə́ she bi shí taʼà.»

¹³NYÙY TÀR nèn kfə̀n sùúy jii, «Dzə́r e vitúm vi vidzə̀m jii, wìr sà‑aà ghàn ne yù kinyo kee ben a? Ŋgònjuù yee Isray mùm ne kinyo ke ghaʼán kí.

¹⁴Kfə́m‑ee yíi ne bùŋ fó vitu ve agwan veé Lebanon a? Ntòŋ sé ndzəv se sí fəər mendzə́v me rəsìn mè fo agwan sii yií ne yùm á?

¹⁵Yii bèy, a wír vémé ŋwày ne mo. Á sí ton kiláy, cu anyùy kisaŋe shó. Anyùyi yií, áwune wáa bàyrìn e dzəə ye á kì ghán sho, dzə́ə, ye dzəə̀n kimvə́mvə ké dzəə, e nèn lò, e bìn a dzə̀ é dzəə ye toʼrìn, dzə́ə, aá yoʼ nàŋsín, yì táʼám.

¹⁶Á yiì ne, nsay yev dú é vifə̀m, a beemé, kirə́ʼ ke á wíy a jàʼ jàʼàn, e wìy dù, e mày. Wìr dzə̀m wo wù wíy a shaà fo, wíy a ker gháʼ, a shaà, a shèŋ a dzə̀ kitú.

¹⁷Mo shwér woó mbìv ntoshùyi yii wiy, táʼar vifá, dzə̀ mo wùn aàŋgaà vév vibàné yíi tam, é m táʼár áwune. M yíi bìn ndzə̀m aáwune, e làa yòʼ a leéy áwune é ghan sé ŋgeʼ.»

¹⁸Wíri nèn lò yòŋ jii, «Vèsən báʼtí, e yèn ó ji á sà‑áà yée e Jeremia a? Bó atàá cù ve á yéʼey vèsəné yòʼ wíy buŋ, a bó akiíy vé a naàrì vèsəné yòʼ wíy a buŋ, a bó aŋgàa ntum Nyùy vé a tiisí ntum rəə́ yòʼ wíy buŋ sa. Vèsən bá menàŋ, e bìvír wun sho, e làa yòʼ dzə́ə a yuurí kinyo kfə́.»

¹⁹Éè NYÙY TÀR, ku yèn kinyo ke kí kooy mo kí. Ku yù búʼú menàŋ me aŋgàa vibàné táŋ e mǒ bàm mè.

²⁰Á yii laáme kinyo ke juŋ ki, a dzə̀ e ke bi kí à? Yii bèy, áwune lò ne, e tùŋ a dzə̀ bií ji m gbu shó. Ku kuùmé mo mò‑oò rə́si tíy e wò si, búʼ wó ji à shám áwune, e làa yòʼ shwiíy kilòŋ, e màʼ ŋgeʼ aáwune.

²¹Bo kí dzə̀ lèn jii, yìi, é mentaàshì mè gháʼ wón vév, e yiì, aá kpúkír é shùu rər. Yìi, é vikìy véví rán alúm wùn à wóné. Ku yiì, áàlúm véví kpú kifə̀ʼ, é rə́r sí tee wón vév vee vilum.

²²La à kù si tsə̀nsí vé rərí, aá sasin, e ghìʼ áwune, é tóŋ ye tavíné kóʼ fo áwuné melav à? Áwune tùŋ ne bií ji m gbu shó, e kòʼór vitám ji m li shó.

²³Éè NYÙY TÀR, à kì menàŋ me áwune kár e mǒ bàm ji á yúyrí mo. Lá à yòʼ làysìn ajay vév. Lá à yòʼ màʼày vinyo vév ve bi ví. Ku yiì, áàŋgàa vibàné ton áwune. Ku nə̀ʼsì áwune é ghan se dòʼshwiiy wò koʼon.