Read Lamnso Jeremia 19 Bible Online

Jeremia 19 - Lamnso bible

Jeremia 19

¹NYÙY TÀR nèn sùúy e mò ji m du, e yùn á mbìʼ wo boméné, lóo dù, m lì á vilìmbìy ve wíri vímóʼ ví, e lì sa atàá cù vee ŋgày sé wìr ámóʼó,

²é vèr áwune du á e Kiwoóy ké Ben Hinnom, dzə́ə fó shùu kày wo á yoŋ ji wó Vimbvə́ʼ ve Vifa. Á mee fo, é m fiʼti á kinyo ke wun suuy e mò aáwune.

³M yií du, m yòŋ á jii, éè afon veé Juda wùn à wír veé Jerusaleme, á yuúrí á kinyo ke NYÙY TÀR woo Taà Mànjòŋ, wun woo Nyùy wìr veé Isray suuy ki. Wù suuy jii, «Vèn yuúrí e yù, m yíi màʼ ŋgeʼ ye tavín é kirə̀ʼ fen, wìr wíy yú, é wúné kuúsí wun.

⁴Kí dzə̀ bey, bìʼ fo wír vìne meŋen ne mo, e bìvír kirə́ʼ kin. Áwune sí ton kiláy fen, cu anyùy sho, cu bèy, a bó atàr vév wùn aàfon veé Judàa yòʼ fə̀m‑eè lo yì‑iì kìíy anyùy vìn. Aáwune kfə̀n‑eè yiì, mensə́ me wìr vee alànjò mè sə́ fen e dzə̀m.

⁵Vé‑eè bòm virə́ʼ vé cù ve nyùy woo *Baal, a tònrì wón vév fó, a cù wun sho, a m yòʼ‑oò yiì yòŋ kinyo kee bey, kìn ji m fó sáʼ yímóʼó bey, a bó kí yòʼ fə̀m‑eè yiì ne a dzə e mǒ kwàʼtì.

⁶Bo ke mo woo NYÙY TÀR suuy ki dzə̀ jii, ghán sí wíy gheén, é la á yòʼ dzə́ə a yòŋ fen ji Kiwoóy ké Tofet, kìn ji Kiwoóy ké Ben Hinnom. Á wíy a yòŋ a dzə̀ ji Kiwoóy ké Kinjuyrì.

⁷«A kí dzə̀ jii, kirə́ʼ kin ki dzə̀ fo m wíy bvəə́r antaŋ wìr veé Juda wùn à veé Jerusaleme. M wíy yiì, áàŋgaà vév vibàné yúyrí áwune fen e shùu rər. Wír ve á dzə wuú yéví kù wíy səʼsí áwune sə́ʼsín, é m fó dzə́n sév ji viyíkìr ve menə̀n wùn à vé nyàm se kwaʼ vi.

⁸M wíy yiì kimbeemè ke kinyò e ŋkàlaʼ fèn, ke á wáa ndzəə. Wìr dzə̀m wo wù shaa, lóo yen, é wúné wáa beemé, é wù wáa shèŋ kitú, bìʼ kinyo ke ghaʼán ke kí kooyin fen.

⁹M wíy yiì, áàŋgàa vibàn véví gim ŋkàlaʼ yev. Wír ve á taʼ e laàr áwune víne wíy sətí fen sə́tín, é ŋgeʼ ye tavín nəə́. A yì wíy nəə́ e dzəə ye biibí, ye áwune wáa kfər wón vév, e kfə̀n a kfər sa afə́r vév kfərín.»

¹⁰NYÙY TÀR‑iì yòŋ ji m fiʼtì bèy, m nèn tìím a e wír ve vèr áwune kì duùné mbìy, e bvə̀ʼ á mbìʼ vəy, aáwune yéné.

¹¹M bvə́ʼə́, m nèn sùúy aáwune á ji NYÙY TÀR woo Taà Mànjòŋ suuy a jii, «Á mo m wíy bvəʼə́y wír vìn wùn à ŋkàlaʼ rə̀n réŋréŋ mo wìr bvə̀ʼə́y mbìʼ wo boméné, e dzəə ye bó yòʼ dzə̀ wìr kfə̀n siìr fo. Á wíy a dzəə̀mè wíri a dzə̀ é Kiwoóy ké Tofet[32] fèn, bìʼ fo bó kirə́ʼ kí yòʼ kfə̀n dzəə́ wìy a dzə fomóʼó.

¹²A m wíy lovtí e ŋkàlaʼ rə̀n wùn à wír vee fóo, e yiì, é fóo wáa dzə moo Kiwoóy ké Tofet bèy. Suuy mo woo NYÙY TÀR.

¹³Lav seé Jerusalem wùn à ntoʼ seé Juda si kù wíy kfən ji kirə́ʼ ké *kifàn, moo Kiwoóy ké Tofet kìn. A dzə̀ jii, lav sidzə̀m se á ton kiláy é kitu wo, cu vifá veé yúv shó, kfə̀n maʼ meluʼ fo, cu anyùy sho.»

¹⁴Jeremia yiì dù, e kfə̀n é bàm fó Kiwoóy ké Tofet, fo NYÙY TÀR‑iì tumen wun, wù dù, e tiìsí ntum. Mo wù wìyìn, e tìím e maàndzə yeé lav cù, e sùúy e wìr dzə̀m jii,

¹⁵NYÙY TÀR woo Taà Mànjòŋ, wun woo Nyùy wìr veé Isray suuy jii, «Vèn leéy, e yèn, m sí lo, e màʼ ŋgeʼ ye tavín é ŋkàlaʼ fèn, e màʼ e ntèʼ see fó ghaŋ réŋréŋ mo mò‑oò sí suuyì, a kù dzə̀ bìʼ fo vèn tavin kitú, e tèn fó a yu kinyo ke m suuyì.»