Read Lamnso Jeremia 2 Bible Online

Jeremia 2 - Lamnso bible

Jeremia 2

¹NYÙY TÀR nèn sùŋnín e mò jii,

²«Dù, a tiisí, é wìr dzə̀m woó Jerusalem wáa yu ji mo woo NYÙY TÀR suuy a jii: « ‹Isray, m kuúme mo wò‑oò wayin shilív e mǒ wùn, aà dzə̀ə́ ji wánlè ŋgòn. Wò‑oò koŋ mo é ghan se wòsò‑oò tatin vijín. Wò‑oò jumrì mo é kirə̀ʼ ké woʼ kí, nsay, a bó kifá ki yòʼ kúy sho.

³Rúrú, Isray‑iì dzə̀ kitúm kee jeéy kí ji ké NYÙY TÀR. Wù dzə̀ ji ŋgòn sə́ sé vifa ve wù kavin. Wìr lúʼ e shuù, Nyùy màʼ ŋgeʼ e wun, lòné jùmrì ŋgaàŋ. Suuy mo woo NYÙY TÀR.› »

⁴Rám Jakov, vèn yuúrí jí se NYÙY TÀR sí, ven adzə̀m vee rám seé Isray.

⁵NYÙY TÀR dzə́ti jii, «Atàr véné‑eè ghàn yèn, a m jáy ka? Áwune‑eè ter fo mǒ wùn ji ka? Áwune‑eè jùmrì a dzə̀ vinyo ve kisaŋ vi, e kfə̀n ji alàykìsáŋ ji ka?

⁶Áwune yòʼ‑oò ló a beè NYÙY TÀR é kinyò kímóʼ kí, NYÙY TÀR wo wù‑uù fəərin áwune fó nsay Ejiv. Nyùy wo wù‑uù tsəənen áwune é woʼ, woŋ siy, fo visóʼsóʼ ví dzəə̀n, woŋ kinjúm, a wú sə́n, e làŋsìn, woŋ, a bó wìr yòʼ yii shaa fo, woŋ, a wìr yòʼ yii dzə́ fo.

⁷M ku lì ven, e wìy sho e nsay njòŋ, e wìy sho ji vèn wáa bòn a vifá ve juŋ ve ví fəə́ fo fo. Vèn nəə́ fó, e nèn bìvír nsay yem bívírín, e yiì, nsay yem kfə́n ji ye *kifàn.

⁸Atàá cùu yòʼ‑oò ló a beè mo woo NYÙY TÀR. Wír ve á yoŋ nsəri yòʼ‑oò ló a kiíy mo, vilìmbìy vi‑iì ŋwày mo, aàŋgàa ntume tiísi ntum a dzə̀ ye *Baal, cu vifá, a yòʼ dzə̀ ví sə̀ áwune.»

⁹«Bo m kfə̀n‑éè din ajay vén. Suuy mo woo NYÙY TÀR. M yíi dìn sa, à vé ram yéné shó.

¹⁰Vèn líysín é wòŋ woo Saypur,[3] woó mvə̀m ndzə̀v, e lèéy. Vèn túm wír e Kedar, é wù leéy fó kijuŋ. Vèn kù yíi yen ji bó kinyo kee ben ki yòʼ‑oò yiì ne kòóy.

¹¹Kitúm ki‑ii yií ne kùvsín anyùy və́ á? Fə̀m mo bó yòʼ dzəə̀n rú anyùy, vé‑ee yií ne kùvsín a? Yii bèy, wír vémé màʼày ne mo wo m kóʼor áwune, e dù, a ghvəm a dzə̀ mebvə̀m, kifá, a bó yòʼ dzə̀ kí sə̀ áwune.

¹²Yúví ku sə̀ʼsì bìʼ kinyo kìn, é fane wáa dzə, é virə́ʼ ví beémé. Suuy mo woo NYÙY TÀR.

¹³Wír vémé jày ne vinyo e mò vibaà. Áwune bìn ne ndzə̀m e mò, mo woo ntòŋ ndzə̀v ye yì fó dzəʼə̀m. Áwune fèr ne a dzə̀ vév vee visə̀m, e lì ndzə́v, e wày shó, visə̀m, a ví káʼkír ne.»

¹⁴«Isray dzə̀ kwàn á? Vé‑eè lo dzə̀ə́ wun e lav vikwàn á? Á kfə́n a koo wun ji kwàn bìʼ ka?

¹⁵Abvərə̀ʼə́ nyam wun, kokìr feyì kitávín. Á laàr ne woŋ wóv, a ntèʼ sí sì sisaʼtìn, a bó kifá ki yòʼ kum sho.

¹⁶Jòkìnyàʼ, kfə́n a dzə ké wìr veé Ejiv. Áwune wíy lò fo Memfis, à fó Tapanes, e wìy, e koo wò, e kwaày kitú ké.

¹⁷Yeè mbàʼ, bó yòʼ wìy wò e kinyo kìn ki e wò kitu à? Kí dzə̀ bìʼ méŋ ye wò‑oò meŋen NYÙY TÀR. NYÙY TÀR woo Nyùy wò, wo wù‑uù tsəə́ne wò.

¹⁸À du ka lèn e Ejiv? À dù ji à ku dù, e nò a dzə̀ mendzə́v meé Naay à? À du ka lèn e Assiriya? À dù ji à ku dù, e nò a dzə̀ mendzə́v meé Yufret à?

¹⁹Yii yé ye bií yíi way wò e ŋgeʼ. Bin ye à bìnèn ndzə̀m e mòó yíi dìn kisáŋ ké. Kú a kiíy, a yen kinyo ke à yii ki. Maʼày ye à màʼàyìn NYÙY TÀRí bìr féyì, a kí kfə̀n kér nyár e ŋàŋ. À yòʼ yii fan mo gheéy. Suuy mo woo NYÙY TÀR woo Taà Ndzə, mo woo Taà Mànjòŋ.»

²⁰«Isray, e kèʼ fo kèʼ, à kù‑uù mèŋ ne sáʼ yém, e tèn fó a neŋ e mǒ sar. Wò‑oò kinèn ji bó yòʼ dzə̀ à yù kinyo kém, e lò fo fo, e shòʼ a dzə̀ virə́ʼ vé anyùy. Wò‑oò ghán vitú ve agwan vidzə̀m, du e sar se vici ve rəŋsìn ví, néŋ fo, yii visàkì vé.

²¹Mò‑oò bìy wò moo kitiír ke tayín kí,[4] kitiír ké *vayin ke á tayin mbìy táyín. À yèe, e bóo dù ji kitiír ke bi kí, a koóm a dzə̀ báŋ se bi sí?

²²Aà fə̀m sù wún e kfə́ə shùv vəneé, aà fə̀m sə̀ʼ wún shó moó le, m kù a yen ajay vé. Suuy mo woo NYÙY TÀR woo Taà Ndzə.

²³«A dzə̀ à ghàn é le, e bó a yòŋ ji à yoʼ lòr kitú ké, e kfə̀n a yòŋ ji à yòʼ kóyti mebvə̀m me Baal? Leéy mo wò‑oò lóvti e kiwoóy, e yèn kinyo ke wò‑oò yiìn kí. Leéy mo à léʼnin, du e mbìy, léʼnin, kfə́n e bàm moo *kamer woo wiíy, kamer wo wù jòyìn, a tàʼ lúm.

²⁴À dzə̀ ji kimbèʼbìy ké kwaʼ ki, ke kí jòyìn, a ghan, a tàʼ lúm e kirə̀ʼ ké woʼ kí. A dzə̀ bìnèr la vifií və́ é ghan se shií və̀n ŋaʼayin ne? Nyàm yee lumèn ye yì taʼ wun yòʼ kfə̀n katìrì. Yee wiíy kù sì kibáʼtín é ghan see shooy.

²⁵Lá à yòʼ dzə́ə a leʼnín, áàlábáʼ vée wáa sàʼkìr, é kilòŋ ké ki wáa yum. Yii bèy, à kù tíy ké ji kí yòʼ kér a kinyo. À koŋ ké a dzə̀ anyùy vitum, aà kù kér fó a ghan e bàm wó.»

²⁶«Mo shòŋ yii woóme e ghan se á koon, dzə̀ mo Isray yíi a woomé. Áwune yíi a woomé wùn aàfon véví, aàtǎr ntoʼo, e lì atàá cù vév wùn aàŋgàa ntum Nyùy vév vé kisaŋe.

²⁷Ven vin, vèn yoŋ e kicí kí jii, ‹À dzə̀ tàr wor,› yoŋ e kilán ki jii, ‹À dzə̀ yè wor wo wù‑uù dzəən ver.›[5] Vèn yòʼ wiy fo mǒ wùn, vèn kù sí bin a dzə̀ ndzə̀m e mò. Yii bèy, ŋgeʼ si nəə, vèn nèn a toŋ ji m wiy, e sə̀ ven.

²⁸Anyùy vén ve vèn bomené bèé? Vèn kú a leéy a dzə̀ áwune, a vé‑éè sə́ ven fó ŋgeʼ, aá sə́. Òó mbaà Juda, anyùy véné dzə̀ nyanyày, aá dzə̀ é mentey mo ŋkà se laʼ sén sí dzəə̀n.

²⁹«Vèn kfə̀n báshi mo é gha lèn? Bó yòʼ tèn ven sáʼ yém a? Suuy mo woo NYÙY TÀR.

³⁰M màʼ ne ŋgeʼ e vèn à wón véné kitu, la vèn yoʼ yèʼéy kinyo fo fo, yì láy kisáŋ. Vèn ló fó fo, e yùyrí aŋgàa ntum vém yuyrín, kù moo bvərə̀ʼ wo wù nyárninè.»

³¹«Éè ŋgwàʼ yeé Isray, vèn yuúrí, e yù jí NYÙY TÀR. Mò‑oò ló a ker ven a dzə̀ e wó ŋgeʼe á? Mò‑oò lo màʼày ven é woʼ, kìn é ndzə vitsə̀ʼ á? Yiì ka, é bo wír vémé wáa suúy jii, ‹Vèr fəə̀ ne fo wo ŋgeʼe lèn, a bó vèr yòʼ dzəə́ yìi kfən e Nyùy sar saʼ?›

³²A dzə̀ wánlè ŋgòn làysìn vifá və́ vé viŋgòn a? A dzə̀ jìn làysìn ndzə̀y sə́ sé vijin á? Yii bèy, wír vémé làysìn ne mo, á làysìn ne mo kàŋ là táŋ.

³³«Vèn kì dzə́ə sé viŋkar feyì, a vikìy ve bií kù yéʼey fo vèn.

³⁴Ndzə̀y sén sí sì mensə́ mensə́, a dzə̀ mensə́ me aghéʼncey ve vèn yúyri là njò. Bó vèn yòʼ‑oò lo koò áwune, aá kív kirə́ʼ. Vinyo vìn vi yénsin bèn,

³⁵a vèn kù yoŋ kén ji á yòʼ kì á fo kinyò, a bó yòʼ dzə̀ Nyùy wàa shwiíy a kilòŋ vèn áwune. Vèn wáa kiíy, m kù yíi tiír ven é kibàʼ ke nsaʼ, ven ve á yoŋ ji á yòʼ kér jay.

³⁶Vèn yèe, e bó a leʼnín, a lò fo fèn, a dù fèn? Wír veé Ejivi yíi màʼ sa ven, kù mo veé Assiriyàa‑aà màʼàn.

³⁷Vèn wíy lò sa fo fo, e wóo kitu. Mo woo NYÙY TÀR mèŋ ne wír ve vèn tiirin vifií e wùn wó, a bó yòʼ dzə̀ áwune sə̀ ven gheéy.»