Read Lamnso Jeremia 20 Bible Online

Jeremia 20 - Lamnso bible

Jeremia 20

¹Pashur woo taà cù, a kfə̀n dzə̀ taà nshìy e lav cù, a dzə̀ wan Immer, yú kinyo ke Jeremia tiisin.

²Mo wù yuun bey, e nèn yòŋ, á dzə́v Jeremia woo *ŋgaà ntum Nyùy, e wày é kibuʼ ke kí‑iì dzəə̀n é shùu kibùʼ wo á yoŋ ji wó Benjamin, a wú dzə̀ é kirəv ké lav cù kee kuy.

³Ndzə bvəə́shí, e jàv, Pashur shóʼ Jeremia fo kibuʼ, Jeremia suúy shó jii, «Bó NYÙY TÀR yòʼ dzəə́ yoŋ yír yé ji Pashur, yí sì a dzə̀ ji Ndzəbeémé[33].

⁴A NYÙY TÀR shu bèy, suuy jii, ‹M wíy yiì kinyo e wò, a dzə̀ ke wúné wáa beemé wò, e kfə̀n yiì bèy e ŋkar sé si. À wíy yen mo aŋgaà vév vibàné wíy laàr áwune e nyùy rə̀r. M wíy way wír veé Juda adzə̀m e fòn woó Babilon kiwo, é wù li áwune, e dù sho e Babilon, kìn wù yúyri yùyrín.

⁵A m wíy yiì, áàŋgàa vibàn véví yer bùʼ fo ŋkàlaʼ fèn e dzə̀m. Á wíy tayrí kéŋ yév e dzə̀m, e kuúy ambùʼmé vév, à bùʼ wo afon veé Judàa baʼtin e dzə̀m. Á wíy faàsì kifá kidzə̀m, e tatí, e dù sho e Babilon.

⁶Fo ké ki, wò woo Pashur, á yíi koorí vèn à wír vee wò laʼa adzə̀m, e dù sho e wòŋ woo Babilon, é vèn kpúkír fó, aá dzəəme ven fó, e dzəə̀mè vèn à ŋkar sé si sidzə̀m, a kù dzə̀ se wò‑oò tiisin ntum kimboʼtì aáwune.› »

⁷Éè NYÙY TÀR, à lèvtí ne mo, m ku biìmé biimén. À tàv ne, e shaà mo, à ghàʼ ne mo. M sì wo nshéʼmé kishiíy kidzə̀m, wìr dzə̀m kù sí gbu mo gbúun.

⁸M lo ji m súŋninè, m wàa toŋ, a rəəmé a dzə̀ ji ŋgeʼ wùn à kimbivìr ki waà dzə̀. NYÙY TÀR, kinyo ké ke m fiʼtì ki kfə̀n ne ji nshoórsí wùn à nshéʼmé mo kishiíy kí dzəə̀n.

⁹M fə́m liʼ ji m yòʼ dzəə́ yiì a kuumé wò, a m yòʼ dzəə́ yiì a yòŋ kinyo e wò yir, bo kinyo ké ki kù lo, a lùm e mǒ shiliv moo və́y, və́y, mo wú baári e mǒ vighvər. Dzəə̀ ye m kúʼtí wún yòʼ dzə̀, yòʼ dzə̀ m yù fó kuʼtí.

¹⁰M yú, aá ghvəvrì mo mbìv sidzə̀m, virə́ʼ vidzə̀m vi sí beéme beèmén. Ŋkar sém sé tim sidzə̀m si sí suuy jii, «Á sómér wun, vèsən wáy wun e vé saʼá wo.» Á sí leey ji m bayrin, yoŋ jii, á lévtí wun, e kòóy kinyo kée màʼ wun sho, e nen siìr ŋkfə́tír.

¹¹Yii bèy, NYÙY TÀR dzə̀ vèr wun moo kintav ke wìr rə̀r, a wír ve á dzə wuú yémé yíi gbùkìr, e làa yòʼ màʼ mo. Dzə̀rkìtu wíy koo áwune, aá wáa woomé, bìʼ fo á mùmèn ntéŋ fó màʼ mo. A bó á yòʼ wíy làysìn nshoórsí wov é ghan símóʼ sí.

¹²Éè NYÙY TÀR woo Taà Mànjòŋ, yii mumrì wò wír ve á yii réŋ. Wò, wo à kiìn mo melív mev wùn à vifií vév ví dzəə̀n, ku yiì, é m yén mo à siir ŋkfə́tír aáwuné kitu. M wày ne vinyo vém vidzə̀m a dzə̀ e wò kiwo.

¹³Á wáa yòv, a sùyrì NYÙY TÀR. Á wáa burí NYÙY TÀR. Wù fə̀ə́r ne ghéʼncey, fo vé vibàné wo.

¹⁴Éè mò, lòné ku shòv kishiíy ke vé‑eè dzəən mo. Kishiíy ke yè wor‑iì dzəən mo, kí kú a dzə là kisəəvì.

¹⁵Lòné ku shòv wír wo wù‑uù wìyìn e sáʼka və̀n, e fèr e tàr wor, wír, wo wù‑uù fìʼtìn ji á kòóy ne a wán lumèn, e yiì, tàr wor wáa sheʼrí.

¹⁶Ŋwèrín kú a dzə moo ŋkà se laʼ see fó ŋgùʼ,[34] ŋkà se laʼ se NYÙY TÀR‑iì bvəʼtin là mendzən. Kijàvndzə kidzə̀m, wù kú a yu a dzə̀ shirəə́, a shí kóʼó. Shùy lóo meé e ntìntìn, é wù wáa yu a dzə̀ léŋ rər.

¹⁷Kí kú a dzə bèy, bìʼ fo wù yòʼ‑oò lo yùy mo, a m dzə̀ə́ e bvə̀m. Bo bvə́m yè worí‑iì yíi a dzə say yém, é m goʼ e yè wór bvə̀m.

¹⁸Mò‑oò fəə́ ka fó bvə̀m feyì, ji m ku fəə̀, a sòrkìr, a yen ŋgeʼ sìn bèn, é dzəʼə̀m yémé ku wìy mày a dzə̀ wùn à woómé si a?