Read Lamnso Jeremia 25 Bible Online

Jeremia 25 - Lamnso bible

Jeremia 25

¹Viyá vi‑iì mèé vikweè mo Jehoyiakim woo wan Josia‑aà yiin vifon e Juda, NYÙY TÀR nèn sùŋnín e mò woo Jeremia kùm wír veé Juda adzə̀m. Kiyá kee shooy ki‑iì dzə̀ ké mbìy ki ke Nebukadnessar‑iì yiin vifon e Babilon.

²M nèn a fìʼtì e wìr dzə̀m woó Juda, a fìʼtì e wìr dzə̀m wo wù dzə́ e Jerusalem jii,

³«Sì lèn viyá nshòv sitaár e mbaà mo NYÙY TÀR kù tiísi kinyo kfə́ e mò. A wù‑uù kèʼ, a Fòn Josia woo wan Amon sáʼ ne e Juda kiyá nshòv sitaár e ghvə̀m. M ku nèn a fìʼtì ntum Nyùy e vèn là yar, e wìy meé lán, vèn ku tèn fó yu.

⁴«NYÙY TÀR kú a tum vé lìm və́ vee aŋgàa ntum adzə̀m fo věn wùn akàŋ akàŋ, yii bèy, la vèn yòʼ a yuurí, a vèn yòʼ fə̀m gwarìr kinyo kfə́.

⁵Á kù‑uù fiʼtì jii, ven adzə̀me ku màʼtì a liì won kisaŋ, e màʼtì a yii yén ye bií, e wìy gòʼ e nsay ye NYÙY TÀR‑iì yiìn ne fò e vèn aàtàr véné ji yéen ŋkuuŋkùŋ.

⁶Lá vèn yòʼ a mbaà anyùy, a cù áwune. Lá vèn yòʼ a lìm fo fo. Lá vèn yòʼ a ghvəm vifá, a fér ven e wó yéné, a yiì, é Nyùy wáa shwiíy kilòŋ. A vèn lò, a yunín wun, la wù yòʼ dzəə màʼ ŋgeʼ e věn kitu.

⁷NYÙY TÀR kitú kfə́ suuy ji vèn yòʼ‑oò lo yùnín a wun. Vèn ŋàʼár ne a dòʼshwíiy və e vifá ve vèn fèrìn ví, e nèn jàŋ ŋgeʼ e věn kitu.

⁸«Mo kí dzəə̀n ben, NYÙY TÀR woo Taà Mànjòŋ suuy jii, ‹Mo vèn tenen ne fó a yunín jí sém,

⁹bo m yíi tsənsí vitúm veé mbìv yee kuy wùn à kilìmbìy kév kee Nebukadnessar, wo dzəə̀n fon woó Babilon, a wù dzə̀ ji ŋgaà lìm wom. M yíi tsənsí, aáwune wiy, e kìʼ woŋ wón e rə́r sí, e tatí wir dzə̀m wo wù dzə́ fo, à vitúm vidzə̀m ve ví kaarin fó vi. M yíi bvəʼə́y fó ŋkuuŋkùŋ, é fóo wáa beemé, wíri lóo leéy, aá wáa ndzəə, é vèn wáa dzə kifá ke nshéʼmé ki, e wìy dù, e mày. Suuy mo woo NYÙY TÀR.

¹⁰M wíy yiì, é la á yòʼ dzəə wìy yù léŋ kisheʼrì kìn wó vijùŋ aáwuné mvəm, aá yòʼ wíy yu sa yòv vijìn. Á yòʼ wíy yu fo á jo kibán, a bó á yòʼ wíy yen fo á sə̀ʼə̀n kikaʼày.

¹¹Woŋ və̀n e dzə̀me yíi səʼsí, e dù e vifə̀m, é wùn à vitúm vee fó ghaŋ vi tátí, a rèŋ vikwàn e fòn woó Babilon sar, kiyá msaàmbà.

¹²Kiyá kee msaàmbà ki mayì, é m maʼ ŋgeʼ e fòn woó Babilon wùn à kitúm kfə́ kí bìʼ ajay vév, e yiì, é fóo du é vifə̀m ŋkuuŋkùŋ. Suuy mo woo NYÙY TÀR.

¹³Ŋgeʼ ye m yiysin e wír vìné kitu kù wíy nəə́ áwune e dzə̀m. Kinyo kidzə̀m ke á saŋen é ŋwàʼ fèn ke Jeremia‑aà tiisin kùm vitúm vìn vidzə̀m ki kù wíy koóy.

¹⁴M kù wíy siìr ŋkfə́tír e Babilon kitu, kù mo yii yéví dzəə̀n, e siìr sa mo lim yéví dzəə̀n, é vitúm wùn aàfon ve tavkíné wiy, e koòrí áwune ji akwàn.› »

¹⁵NYÙY TÀR woo Nyùy wìr veé Isray nèn lò sùúy e mò jii, «Bàr melùʼ və̀ne, a dzə̀ ŋgeʼ ye m maʼ e vitúm ví kitu. Kò, e dù, e nòór vitúm vi shó, vitúm ve m lo, e tsənsí wò fo áwuné wùn.

¹⁶Áwune yíi no, a rəvkír, e kfə̀n lì kibaá e si, a dzə̀ bìʼ rə́r se m yíi tsənsí aáwuné mvəm.»

¹⁷M ku nèn sə̀ bàr və̀n fo NYÙY TǍR kiwo, e nòór vitúm vidzə̀m sho, vee fo wù‑uù tumen mo.

¹⁸Mò‑oò nòór Jerusalem wùn à ŋkà se laʼ seé Juda si, aàfone, à vé saʼa, e nòór ji fóo du é vifə̀m, e lày kisáŋ. Wíri lóo leéy, é wúné wáa beemé, aá wáa ndzəə, a lì fó ji liy, mo kí dzəə̀n e shem lán.

¹⁹M kfən nòór sa Farao woo fon woó Ejiv wùn aàtǎr ntoʼ vəə́, à vé saʼa, à wìr dzə̀m woo fó,

²⁰e lì wir dzə̀m wo yì‑iì dzəə̀n kiŋgwìy fo. Mò‑oò nòór sá afon veé nsay Us adzə̀m, e kfə̀n nòór sa veé nsay Filistia, aá dzə̀ ji woó Ashkelon, woó Gasa, woó Ekron, à kibér ke wìr keé Ashdod ki.

²¹M kfən nòór wír veé Edom wùn à veé Moavi, à veé Ammone,

²²e lì afon veé Taya adzə̀m wùn à veé Sidone, à veé ŋguùŋè Rìbà Ndzə̀v woo fóo.

²³M noór sá wír veé Dedan wùn à veé Tema, à veé Busi, e lì wir dzə̀m wo wù yii keŋrì kitú kéŋrin,[38]

²⁴e lì sa afon veé Arabia adzə̀m wùn aàfon vitume adzə̀m ve á dzə́ e kirə̀ʼ ké woʼ kí,

²⁵afon veé Simri adzə̀m wùn à veé Elame, à veé Mediàa adzə̀m,

²⁶afon veé mbìv yee kuy adzə̀me nó sá bàr woo shoon, à vee kwaʼdáa, à vee fó mentsə̀mé. Vitúm vidzə̀m ve ví dzəə̀n é kitu ke nsay vi ku nò, wìr wáa no, wìr wáa no. Á nó, e mày, fòn woó Babilon[39] nèn nò sá.

²⁷NYÙY TÀR nèn sùúy e mò jii, «Suúy aáwune ji NYÙY TÀR woo Taà Mànjòŋ, wun woo Nyùy wìr veé Isray suuy a jii, ‹Vèn nó ben, a baakír, é kiŋgeʼ ki wáa yiì, é vèn gbukir, e làa yòʼ yu fó nànèn, a dzə̀ bìʼ rə́r se m tsə́nsi, é sí nəə́ ven.›

²⁸Aáwune dù, a ten fó sə bàr woo shoon fo wò, e no, à yòŋ aáwune ji NYÙY TÀR woo Taà Mànjòŋ yoŋ a jii, ‹Vèn kù kér fó no.

²⁹Vèn leéy, e yèn, m sí keʼ, a màʼ ŋgeʼ a dzə̀ fo mǒ ŋkàlaʼ,[40] bo dzə̀ vèn yiì bòy moó le? Yòʼ dzə̀ vèn yiì bòy fo ŋgeʼ, bìʼ fo m sí lo, e tsənsí rə́r, é sí nəə́ wir dzə̀m woó kitu ke nsay. Suuy mo woo NYÙY TÀR woo Taà Mànjòŋ.›

³⁰«Jeremia, ku yìysí vinyo vìn vi vidzə̀m, ji á mo kí wíy koóy a áwune. Suúy aáwune jii: « ‹NYÙY TÀR yíi a nyàmkìr fo ntoò yùv. Jì rə yíi a dzə̀mkìr fo wun kirə̀ʼ ké dzə ke ranén kí. Wù yíi a wamrí wír və́ kitávín, é kiléŋléŋ kí wáa koʼ moo ké wìr ve á nyeŋ báŋ se *vayin, a wìr dzə̀m woó kitu ke nsay yíi yuʼnín wun.

³¹Kiyor ki yíi a koʼ buú se ndzə sidzə̀m, bìʼ fo NYÙY TÀR kér nsaʼ wùn à vitúm vi vidzə̀m. Wù yíi tiír wir dzə̀m e kibàʼ ke nsaʼ, e tsənsí wír ve á méŋ wun, é rə́r sí yúy. Suuy a wun woo NYÙY TÀR.› »

³²NYÙY TÀR woo Taà Mànjòŋ suuy jii: «Á leey á, e yèn, ŋgeʼ sí ram, wiyì, lo fo kitum kímóʼ kí, túmsin e kímóʼ kí. Kinsəm ke tavín kí kar virə́ʼ, wiyì, kí wiy fo ndzəywoŋ.»

³³Wíy lòo dzə e ghan fen, é wír ve NYÙY TÀR laàrsìné wáa neŋnín virə́ʼ vidzə̀m, e kèʼ fo buu ndzə fèn, e dù, e bàʼ e və́səə. Wìr wó a dìy áwune yòʼ wíy a dzə sho, kìn wo wù báʼti dzə́n sév, e dzəə̀mè. Dzə́n sév sí wíy a neŋnín e nsay moo jáŋ bèy.

³⁴NYÙY TÀR suuy jii: «Ven vee anshìy wìr vém, vèn wáa toŋ, a dìy. Ven ve á sáʼ wír vém, vèn wáa dzəŋrí e kibvə̀r. Ghán se á yíi seerí ven sí ghèén ne. Vèn sí yìi gbù, e bvəʼkír moo kíŋ mbóm ye tayíné.

³⁵Bó anshìy wìr vémé yòʼ wíy a ker fo dzə̀ á lìr, a wír ve á sáʼ wír vémé yòʼ wíy koóy fó leʼ, e dù.»

³⁶Á yú á mo anshìy wírií tóŋé. Á ku yù mo vé saʼ wìr Nyùyi diyì, a dzə̀ bìʼ fo NYÙY TÀR sí laar woŋ wóv.

³⁷Á laàr ne woŋ wón wo wú‑uù dzəə̀n nyaáŋ, a dzə̀ bìʼ dòʼshwiiy NYÙY TÀR wo wù koʼon é ŋàŋ.

³⁸NYÙY TÀR fəə̀ ne mo bvərə̀ʼ fəə̀ fo wun kirə̀ʼ ké kilìr, a woŋ wóví kù sí lo, e lày làyìn, bìʼ rə́r se aŋgàa vibàné lo, e nəə́ áwune shó, a dzə̀ bìʼ dòʼshwiiy NYÙY TÀR.