Read Lamnso Jeremia 29 Bible Online

Jeremia 29 - Lamnso bible

Jeremia 29

¹*Ŋgaà ntum Nyùy woo Jeremia nèn lò, e sàŋ ŋwàʼ e Jerusalem, e tsə̀nsí e Babilon ji wó vilìmbìy ve ví‑iì berin fo vilìmbìy ve wìr veé Juda ve á dzəə̀n fó vi. Wú kfə́n a dzə sa wó atàá cù wùn à wír ve vé‑eè dzəə̀n ji aŋgàa ntum Nyùyi, e kfə̀n a dzə wó wìr dzə̀m wo Nebukadnessar‑iì koon fó Jerusalem, e dù sho e Babilon.

²Wù‑uù sáŋ ŋwàʼ və̀n, aá koó ne Fòn Jehoyiacin wùn à yaà yeèfòn, aàtǎr ntoʼo, à vé saʼ veé Juda wùn à veé Jerusaleme, e kfə̀n koò sá vé fèri wùn à vé kilàme, e fəə̀ shó fo Jerusalem.

³Jeremia‑aà sàŋ ŋwàʼ və̀n, e tùm a dzə̀ Elasa woo wan Shafan wùn Gemaria woo wan Hilkia ji á du á sho e Babilon. Wír vìne dzə̀ ve Fòn Tsədekiya woó Juda‑aà tsənsin fo Fòn Nebukadnessar woó Babilon wùn. Ŋwàʼ və̀ne‑eè dzə̀ jii:

⁴NYÙY TÀR woo Taà Mànjòŋ, wun woo Nyùy wìr veé Isray suuy e wìr dzə̀m wo wun woo NYÙY TÀR‑iì yiìn, á koó fó Jerusalem, e dù sho e Babilon jii,

⁵«Vèn baʼri lav si, a dzə sho, e mvə̀ʼ súm sí, a kav vifá fo fo, a yi.

⁶Vèn wáy vikìy é melav, é vèn áwune dzəə́ wón, à vee vilume, à vee vikìyí. Vèn wáa nəə́ vikǐy woné, a juùr vee vikìyí, aáwune wáa dzəə́ sa vév vee wón. Vèn wáa kùʼ kùʼùn, e làa yòʼ a mày màyìn.

⁷Vèn wáa mùm ji ŋkàlaʼ yee fo m tsənsin ven wáa dzə a kijuŋ, a bùnrì ji NYÙY TÀR sə́ á áwune, bìʼ fo áwune yíi lòo dzə kijuŋ, bo vèn yíi a dzə sa kijuŋ.

⁸Mo woo NYÙY TÀR woo Taà Mànjòŋ, mo woo Nyùy wìr veé Isray kfə́n a suúy jii, lá vèn yòʼ biìmé, é wír vén ve á dzəə̀n ji aŋgàa ntum Nyùy wùn à ve á shwéŋ vinyóo bóʼtí ven. Lá vèn yòʼ wày vifií e wír ve á tiísi vinyo ve á yenen é njèm a kù dzə̀ ve ví gheen ven ví.

⁹Áwune tiísi a dzə̀ kimboʼtì e mǒ yir, m yoʼ tùm áwune.» Suuy a wun woo NYÙY TÀR.

¹⁰NYÙY TÀR kú a suúy jii, «Kiyá kee msaàmbà ke á lèmèn ji ké vifòn veé Babilon ki wíy shaà, é m nèn bìnkìr, e lèéy ven, e yiì kinyo ke mò‑oò kàʼàn ven shó, e lì ven, e kfən sho e věn wòŋ.

¹¹Mo woo NYÙY TÀR suuy jii, m kì vinyo ve m leemè ven shó, m leemè e dzəʼə̀m ye juŋe, a bó yòʼ dzə̀ e ŋgeʼ. M wíy yiì, é vèn wáa dzə kijuŋ, a leéy fó mbìy, a ker kwaʼtì ye juŋe,

¹²e nèn a mbaà mo, a lon ke á lóné, é m wáa yu tóŋ yén.

¹³Vèn wíy a tàʼ mo, a yen. Vèn wíy lòo tàʼ mo shilív shén shidzə̀m,

¹⁴é m yii, é vèn yén. Suuy mo woo NYÙY TÀR. M wíy siìr vijuŋ vén e vèn. M wíy baʼtí ven fó vitum vidzə̀m, à fó virə̀ʼ ve mò‑oò taʼarin ven, á dùkìr sho vi, e nèn lì, e kfən sho e kirə̀ʼ kee fo mò‑oò jùmèn ven, é bo vèn du, a dzə e kwaʼ nsàm.» Suuy a wun woo NYÙY TÀR.

¹⁵A vèn lò, a suúy jii, NYÙY TÀR fò ne ven wír ve á tiísi ntum rə é Babilon,

¹⁶vèn kù yòʼ yuùrí kinyo ke NYÙY TÀR suuy kùm fon wo wù sáʼ lèn ji njìlaʼ Fòn Davir ki, e yuùrí kee kùm wir dzə̀m wo wù dzəə̀n é mvə̀mlaʼ fèn, a dzə̀ ji afə́r vén ve á yòʼ‑oò lo koò áwune, e tàtí ven shó, e dù sho e kwaʼ nsàm.

¹⁷NYÙY TÀR woo Taà Mànjòŋ suuy jii, «Vèn yuúrí, e yù, m yíi tsənsí rə́r wùn à jiŋ, à kifə̀ʼ ki, e yiì, é wír veé wòŋàne wáa dzə moo *fig wo wù birin ne e dzəə ye bó yòʼ dzə̀ wìr kfə̀r.

¹⁸M yíi nəə́ áwune e rə́r sí wùn à jiŋ, à kifə̀ʼ ki, é vitúm vidzə̀m vi wáa leéy, é wúné wáa beemé, aá wáa ndzəə. Wír adzə̀m vee fo m wíy jùm áwune, aá duú wíy a lì áwune ji kifá ke liy ki, e kfə̀n a beèmè áwune béemen, a kèŋ, a sheʼ.

¹⁹A kí yíi koóy áwune bey, a dzə̀ bìʼ fo á yòʼ yuúri kinyo kém, a mò‑oò rə́si tsə́nsi vé lìm vém vee aŋgàa ntum, aá wiy, súŋnin aáwune akàŋ akàŋ. Suuy mo woo NYÙY TÀR.

²⁰Ven adzə̀m ve mò‑oò fəərin fó Jerusalem, á dú é Babilon, vèn yuúrí kinyo ke mo woo NYÙY TÀR suuy ki.

²¹Mo woo NYÙY TÀR woo Taà Mànjòŋ, mo woo Nyùy wìr veé Isray, m suuy kùm Ahav woo wan Kolayia wùn Tsədekiya woo wan Ma‑Aseyia jii, áwune li mo, téʼ e si, bóʼti ven, a m yíi way áwune e Fòn Nebukadnessar woó Babilon kiwo, é wù wáa yuyrí áwune, a vèn yéné.

²²Bìʼ bey, wír ve vé‑eè koon fó Juda, e dù sho e Babilone wíy lòo kuù wír, aá wáa yòŋ ji NYÙY TÀR ku lòvtí a sho mo vé‑eè lovtin e Tsədekiya wùn Ahav ve fòn woó Babilone‑eè tònèn é və̀y atin.

²³Áwune‑eè yiì ne joonè é Isray, a wìr li wiiy ŋgaà və shùu lav. Áwune bóʼti kimboʼtì e mǒ yir, a bó m yoʼ tùm áwune. M kì vinyo ve áwune yiìn vidzə̀m, a m dzə̀ njen. Suuy mo woo NYÙY TÀR.»

²⁴NYÙY TÀR nèn yòŋ e Jeremia ji wù du, e tiìsí e Shemayia woó Nehelam ji

²⁵NYÙY TÀR woo Taà Mànjòŋ, wun woo Nyùy wìr veé Isray suuy a jii, «À sàŋ ne aŋwàʼ e wò yir, e tsə̀nsí e wìr dzə̀m wo wù dzəə̀n é Jerusalem, e sàŋ sá wó Tsəfaniya woo wan taà cù woo Ma‑Aseyia, a ŋwàʼ və̀ne kfə̀n dzə̀ sá wó atàá cù adzə̀m. Wò‑oò sàŋ bey, a yòŋ e Tsəfaniya jii,

²⁶‹NYÙY TÀR lèm ne wò ji taà cù, e Jehoyiada woo taà cù ntaʼ ji à wáa leéy a lav NYÙY TÀR. Aà yén wír wo wù baá, yoŋ ji wun tiísi ntum Nyùy, à wày kibúʼ e wun shwin, e kfə̀n wày fáŋ kishàa é kilòŋ wó.

²⁷Yì‑iì yiì ka fo à yii sá e Jeremia woó Anatot bèy? Wù tiísi vinyo e vèn, bóʼti ji wun dzə̀ á *ŋgaà ntum Nyùy.

²⁸Wù‑uù tsə̀nsí ntum e vèr é Babilon ji vèr yíi rèŋ a vikwàn fó ntàmda. Vèr baʼri á lav si, a dzə sho, e mvə̀ʼ a súm sí, a kav a vifá fo fo, a yi.› »

²⁹Kí nen lò, e kòóy ji taà cù woo Tsəfaniya sə́ ŋwàʼ woo shooy, a yòŋ, a ŋgaà ntum Nyùy woo Jeremia yuúri.

³⁰NYÙY TÀR nèn sùúy e Jeremia jii,

³¹«Tsə́nsí ntum e wír ve á dzəə̀n é kwaʼ nsàmé ji kinyo ke NYÙY TÀR yoŋ kùm Shemayia woó Nehelam ki dzə̀ á jii, mo wù tiisin ne ntum kimboʼtì e vèn, e yiì, vèn biímé kimboʼtì, a bó m yoʼ tùm wun,

³²bo ke NYÙY TÀR yoŋ ki dzə̀ á jii, ‹M yíi màʼ ŋgeʼ e Shemayia woó Nehelam wùn à kfə́ə rəə́ kitu. Wìr və yòʼ yíi ber e wír vémé mvəm, fə̀m e mòʼón. Wù yòʼ yíi yen vinyo ve juŋ ve m yíi yiì e wír vémé, bìʼ fo wù dùŋèn ne wír vìn, á wáa tsəy kóy vèr áwune.› Suuy mo woo NYÙY TÀR.»