Read Lamnso Jeremia 3 Bible Online

Jeremia 3 - Lamnso bible

Jeremia 3

¹«A lùmèn fə̀ə́r wiíy, wù du, wìr wo sən li, e wày é lav, a dzə̀ wù kfə̀n sə̀, e siìr e lav à?[6] Bo bó yòʼ sì kon, a nsay yíi bir, e fòy fòyìn a? Isray, à yiì ne visàkì vèn à vé ve viŋkari anín. À kfə̀n sí wiy ji à yén mo a? Suuy mo woo NYÙY TÀR.

²«Nàn sí yée, e lèéy vitú ve agwan vi. Kirə́ʼ kí dzə̀ shó ke bó à yoʼ bìvír e visàkì vé vi á? À lo, à wàa teʼ aŋgàa viŋkar vé e ghaŋ se dzəə, a teʼ mo ŋgaà kimfaàsì tèʼ mbèʼŋkùm e woʼ. À bìvír ne nsay e visàkì vi, liì wò kisaŋ yiì ne, nsay fóy.

³Kí nen yiì, ŋweʼe tén gbu, e yiì, wuú tén sə́ʼə́y, a bó vishí vé vi yòʼ din ji kinyo ki kooyì. Ví kù dzə̀ ji vé sàkì, là woómé.

⁴Kfə̀n lò ne wò lèn, a yòŋ mo jii, ‹Tàr wor, à dzə̀ ŋkar yem yee kèʼ fo mǒ ghan sé viŋgòn.

⁵A dzə̀ tàr wor kù wìy a shwiíy rú a dzə̀ kilòŋ a? A dzə̀ wù kù wìy a màʼ ŋgeʼ e mò, e dù, e mày à?› Isray, á mo à yoŋrì mo ben, kù buʼtì a dzə̀ vinyo ve bi ví mo à kòŋèn.»

⁶Yì‑iì dzə̀, a Josia sáʼ ji fon woó Juda, NYÙY TÀR suúy e mò jii, «À dzə̀ a yén mo Isray ŋwayin ne mo, a yiì a? Wù kòʼ ne e vitu ve agwan ve dáa adzə̀m, e kfə̀n ghànén e sar se vici ve rəŋsìn ví vidzə̀m, ghán, yii visàkì fo.

⁷M wáa ki ji wù yíi ghan, yii vinyo vìn bèn, é wù kfə́n, e yèn á mo, la wù yòʼ kfə̀n, a jemèr rə yee Juda woo wir kisaŋ kù yén vinyo və́.

⁸M lò, e fò ŋwàʼ njàvsìn e Isray wo wù‑uù ŋwayin mo, e fə̀ə́r wun bìʼ visàkì ve wù‑uù yii vidzə̀m. M lòo leéy, e yèn ji bó fər və Juda woo wir kisaŋ yoʼ yèn á bèy, a fàn gheéy, wù kù fəə̀ sáa visàkì.

⁹Wù yòʼ‑oò lo yen jay Isray wù wáa meé e kinyò, wù nèn bìvír nsay, mo wù ŋwáy mo, ghán, cu vilán wùn à vicí ví.

¹⁰Vinyo vìn vidzə̀m vi‑iì kòóy ben, la wìr kisaŋ woo Juda wo dzəə̀n jemèr Isray yòʼ kfə̀n é bàm, e yèn mo shilív sə́ shidzə̀m. Wù ku kfə̀n a dzə̀ e kiloʼ ki. Suuy mo woo NYÙY TÀR.»

¹¹NYÙY TÀR nèn lò, e sùúy e mò jii, «Mo Isray fə̀m ŋwayin mo, kfə́ kí kù dzə̀ kiwóvrín, e shaà ké làykìsáŋ jèmèr rə yee Juda.

¹²Dù ri, a fìʼtì ntum yem e Isray, kitúm, a dzə̀ keé mbìv yee kuy ji m suuy a jii: « ‹Isray, wò wo à ŋwayin mo, ku kfə̀n é bàm, e mǒ wùn. Suuy mo woo NYÙY TÀR. M yòʼ dzəə́ yiì a shwiíy kilòŋ wòsò, mo m dzəə̀n ŋgaà nshámmé. Kù suuy mo woo NYÙY TÀR. Bó m yòʼ kù wíy gòʼ, a shwiíy kilòŋ wòsò.

¹³Ku biìmé a dzə̀ liì kisaŋ wo wò‑oò yiìn. Wò‑oò táv kitú vèn NYÙY TÀR woo Nyùy wò, ghvə́m anyùy a dzə̀ vé vitum, du, cu e sar se vici ve rəŋsìn ví vidzə̀m, e làa yòʼ a yunín mo gheéy. Suuy mo woo NYÙY TÀR.

¹⁴« ‹Wónen, ven ve á ŋwayin mo, vèn kfə́n é bàm e mǒ wùn, kù kér mo ven. Suuy mo woo NYÙY TÀR. Vèn kfə́né, é m shóʼtí wir mòʼón mòʼón fo ŋkàlaʼ, e shòʼtí fo kfəə abaà abaà, e lì, e dù sho e Gwan Sion[7].

¹⁵M yíi fo ven vilìmbìy ve ví yú mo, é ví wáa dànèr ven e vifií ví wùn à kiíyi.

¹⁶Wíy lóo dzə, a vèn kúʼ ne e wòŋ, é la wíri yòʼ dzə́ə a yòŋ kinyo kee kùm ŋkùv mensàŋ[8] NYÙY TÀR. Kí yòʼ fə̀m dzəə́ wìy a dzə aáwuné vifii, kìn ji áwune wáa kuumé, a bó wù yòʼ fə̀m wíy a dzə e shií, kìn ji á wáa fèr wo sən. Suuy mo woo NYÙY TÀR.

¹⁷Wíy lòo dzə e ghan see shooy, aá nèn a yòŋ Jerusalem ji kàvàʼ NYÙY TÀR, é vitúm vidzə̀m vi wáa baʼtí fo, a cù mo woo NYÙY TÀR. Áwune yòʼ dzəə́ wìy a yiì vinyo ve kisaŋ ve melív mev mè koŋè.

¹⁸Ghán sin si dzə̀, a wír vén vee rám Juda wùn à vee rám Israyi wíy tatí, e fəə fo vitum veé mbìv yee kuy, e kfən e nsay ye mò‑oò foon áàtǎr ram véné ji vitsə́ʼ.› »

¹⁹«Wír veé Isray, mò‑oò yén jii, m yíi lèm a ven jeéy e wón vém adzə̀mé mvəm, e fo ven nsay ye juŋ, vitsə́ʼ, a ví bòŋ feyì, e shaà ve ví dzəə̀n é vitum vímóʼ ví. M kfə́n a ki ji vèn yíi a yòŋ a mo ji Tàr won, a ghan e mǒ mbòv, e làa yòʼ bìn ndzə̀m e mò.

²⁰Abaày wìr veé Isray, moo wiíy wo wù ŋwayin lúm və, a ghan, kù dzə̀ mo vèn yiìn ne vèsən. Suuy mo woo NYÙY TÀR.»

²¹Á ku yù mo tóŋe wiy fo kitu ke agwan, a dzə̀ wír veé Isray mo á diy, búʼ wó, bìʼ fo áwune làysìn ne NYÙY TÀR woo Nyùy wov, e nèn jày dzə́ə.

²²NYÙY TÀR yóŋ jii, «Éè wǒn kisaŋe, vèn binkir, é m yiì màyìr liì won kisaŋ.» Wíri bínsí jii, «Vèr sí kfə́n, e yen wò, kù dzə̀ wò NYÙY TÀR woo Nyùy wor.

²³Dzə̀ rú ji cu anyùy ye vèr‑iì yii aàŋkoŋ, yii aàgwane dzə̀ á lím kisaŋe. Rúrú, a dzə̀ kù lùŋèr NYÙY TÀR woo Nyùy wor, Isray.

²⁴Cu ye vèr‑iì cu *Baal wo dzəə̀n kifá ke woomé ki kù yiì kfə́, vèr láy vifá láyin, e kèʼ fo meterí. Vèr lày vifá vidzə̀m ve atàr vérí‑iì ndzə̀ʼnìn, e lèm ŋgoo se nyàm wùn à sé bvəy si, à wón vér vee vilum wùn à vee vikìyí.

²⁵Vèr‑íì neem e woómé sí si, é joonè wórí kfə́vsí ver. Vèr aàtàr vérí‑iì jày ne e NYÙY TÀR woo Nyùy wor, e kèʼ, a vèr dzə̀ə́ e vinsùm vi, e wìy shem lán. Bó vèr yòʼ‑oò dzəə́ yúnin NYÙY TÀR woo Nyùy wor.»