Read Lamnso Jeremia 30 Bible Online

Jeremia 30 - Lamnso bible

Jeremia 30

¹Kinyo ke NYÙY TÀR‑iì suuyin e Jeremia ki kìne.

²NYÙY TÀR, wun woo Nyùy wìr veé Isray suuy jii, «Sáŋ vinyo ve m suuyin e wò vi vidzə̀m e ŋwàʼ.

³Leéy, e yèn, ghán sí sí gheenè se m wíy siìr vijuŋ ve wìr vém veé Isray wùn à veé Judàa. M yíi siìr áwune é nsay ye mò‑oò foon ne aàtàr véví, aáwune nèn yì vitsə́ʼ vév.»

⁴Kinyo ke NYÙY TÀR‑iì suuyin kùm Isray wùn Juda ki dzə̀ jii:

⁵«Á yú, shirəə́ shi jiyì, a virə́ʼ ví beéme, a bó nyaáŋ yòʼ dzə̀.

⁶Á rəti, e yèn ó. Lùmèn‑ee yií ne a lum wán á? Yií ka lèn, é bo á wáa yen vilum adzə̀m, aá tóm viyéŋ, kù moo wiíy wo wù lúmé? Yiì ka, é bo sí wìr dzə̀me wáa kìʼ e rəə́yín?

⁷Á virom eèy, kishiíy kin ki wíy a dzə kibiíbí féyì, kishiíy, a kee moo kíwun ki yòʼ dzə̀. Wíy a dzə ghán sé ŋgeʼ ye tavín e kfə́ə Jakoví wùn, yii bèy, aáwune wíy bòy fo fo.»

⁸NYÙY TÀR woo Taà Mànjòŋ suuy jii: «Kishiíy kee shooy ki dzə̀ ke m wíy beʼ kimbùŋ fo áwuné mbèʼ, e tiiné asháŋ vév, é la vitúm vi yòʼ dzə́ə a ker áwune ji akwàn.

⁹Á bèy, aáwune wíy a lìm a dzə̀ fo mò woo NYÙY TÀR woo Nyùy wov, a yunín njìlaʼ Davir woo fon wov, wo m wíy koʼór, e fo aáwune.

¹⁰Éè rám Jakov, vèn dzə̀ ji aŋgàa lìm vém, lá vèn yòʼ a fàn. Éè wír veé Isray, lá vèn yòʼ a yàʼ. Suuy mo woo NYÙY TÀR. M wíy bòyìr rú vèn à rám yéné fo vitúm veé ndzəywoŋ ví wo, vitúm, fo vé‑eè koon ven, e dù sho, á wáa rèŋ vikwàn. Rám Jakovi wíy kfən e bàm, a dzə dzə́ yee nyaáŋ, a dzə akiŋsìn, wìr wó a bemér áwune yòʼ wíy a dzə.

¹¹M dzə̀ vèsən, a m wíy sə ven. Suuy mo woo NYÙY TÀR. M wíy səʼsí vitúm vidzə̀m sə́ʼsín ŋkuuŋkùŋ, vitúm, vee fo mò‑oò taʼarin ven, á dùkìr. Yii bèy, fo kén kí, m yòʼ wíy səʼsí ven ŋkuuŋkùŋ. M wíy nyèr ven é dzəə yee weè, yòʼ dzə̀ m màʼtì ji vèn du, a bó m máʼ ŋgeʼ e věn kitu.»

¹²Ke NYÙY TÀR yoŋ e Sion ki dzə̀ jii: «Nyár yéné yòʼ dzə̀ ye dzə̀ á fèr, vileémé vén ví yòʼ dzə̀ ví bònén.

¹³Wìr wó a shoòmè kinyo kén yòʼ dzə̀. Kifú kí yòʼ dzə̀ kée fèr vileémé vén, dzəə̀ ye dzə̀ vèn bónén yòʼ dzə̀.

¹⁴Vé kikòŋnìn vén adzə̀me làysìn ne ven, á yòʼ dzəə́ gwarìr kinyo kee kùm ven. M dzə̀v ne ven, a dzə̀ mo a kì dzə̀ dzə̀v ŋgaà vibàn, m taàmé ne ven moo ŋgaà vibàn woo mbuù mendzə̀n, a dzə̀ bìʼ fo ajay véné kùʼùn ne e ŋàŋ, vinyo vén ve bi ví sì ŋkóŋkóŋ.

¹⁵Vèn tóŋ vileémé vén lèn bìʼ ka? Nyár yéné yòʼ dzə̀ ye dzə̀ á fèr. M lóvti e vèn ben, a dzə̀ bìʼ fo ajay véné kùʼùn ne e ŋàŋ. Vinyo vén ve bi ví sì ŋkóŋkóŋ.

¹⁶«Yii bèy, a wír ve á bivirin vené dzə̀, aá kù wíy bivír sa áwune bey. Á wíy koorí aŋgaà vén vibàn adzə̀m, e dù sho ji vé sháŋé. Á wíy faàsì vifá ve wìr ve á faàsìn vén, a wír ve á nə̀ʼsìn vené wíy a dzə sa e nə̀ʼsì.

¹⁷M yíi yiì, é vèn bónén. M yíi fèr vileémé vén, fə̀m mo aŋgàa vibàn véné yoŋ ven ji ajùmfóŋgày, yoŋ ji Sion woo là ŋgaà benben. Suuy mo woo NYÙY TÀR.»

¹⁸NYÙY TÀR suuy jii: «Vèn leéy, e yèn, m sí yìi rər mendzən me rám Jakov, e siìr vijuŋ ve laʼ sév fó. Á wíy bàʼrì ŋkàlaʼ yev fo yì‑iì dzəə̀n, é ntoʼ yev kú a dzə sa fo yì‑iì dzəə̀n.

¹⁹Yòv vibeèrì wíy a koʼ fo áwuné mvəm, é léŋ kisheʼrìi wáa koʼ sa fo fo. M wíy səə̀vì áwune, aá kuʼ, e làa yòʼ a dzə ashàr. M wíy yiì, aá wáa ghvəm áwune, e làa yòʼ a kay.

²⁰Wón véví kfə̀n wíy a dzə mo vé‑eè rə́si dzə́ fo ŋgùʼ, é màŋgòŋ wìr vém tám e mǒ si, a m wíy màʼ ŋgeʼ e wìr dzə̀m wo wù nəʼsì áwune.

²¹Wìr wov wo kuʼùn kù wíy a dzə wír woo áwuné ram, ŋgaà saʼ wov kù wíy fəə a dzə̀ fo áwuné mvəm. M wíy koʼór wun e mǒ mentsə̀m, é wù kóʼtí e mǒ ghaŋ. A dzə̀ cì la kwán, a dzə e mǒ ghaŋ, a bó shóʼ mo ŋgaàŋ? Suuy mo woo NYÙY TÀR.

²²Vèn wíy a dzə wír vém, é m wáa dzə Nyùy won.»

²³Á leéy, e yèn dòʼshwiiy NYÙY TÀR. Wù kóʼ moo kiìkir. Wù wiy moo kinsəm, a wù wiy, e shùʼùy e wír ve á buʼtì vinyóo kitu.

²⁴Dòʼshwiiy NYÙY TÀR wo ghaʼán və̀n yòʼ wíy mày, a bó wù máysí lim rə́ ye yí dzəə̀n e wun kwàʼtì. Wíy lòo dzə e vishiíy ve ví wiyì, é vèn nèn kìíy vinyo vìn.