Read Lamnso Jeremia 33 Bible Online

Jeremia 33 - Lamnso bible

Jeremia 33

¹Jeremia wáa dzə e mvə̀m kibùʼ ke nshèelav fo vé‑eè fìnèn wun, NYÙY TÀR nèn kfə̀n lò sùŋnín e wun fo ji akàŋ abaà.

²Wun woo NYÙY TÀR wo wù‑uù bomen kitú ke nsay, e nàŋsín, e kfə̀n tùúy, a yír rəə́ dzə̀ NYÙY TÀR, suuy jii,

³«Á mbaà a dzə̀ mo, é m yú tóŋ yé, e sùúy wò vinyo ve ghaʼtín ví ve ví dzəə̀n é kilìr, aà yóʼ ne kìíy.

⁴Mo woo NYÙY TÀR woo Nyùy wìr veé Isray suuy kùm lav seé ŋkàlaʼ fèn wùn à ntoʼ yeé Juda jii, á bvə̀ʼə́y a ne fó, e lì tíy, e tòm virə́v vé kày sho, bìʼ wír veé Babilon ve á tsə́y kay fo ndzə, ghíʼ áwune e rə́r sí.

⁵Yii bèy, a wír ve á búʼ ji á sə́ vitú vév víne kù yíi kpu rə́r, é fóo rún e dzə́n sé wíri sí. Á kù yíi kpu bìʼ dòʼshwíiy wom wo wù koʼon é ŋàŋ. M yíi rəʼ sí yém fó ŋkàlaʼ fèn, a dzə̀ bìʼ vinyo ve kisaŋ vi vidzə̀m ve áwune yii.

⁶«Yii bèy, a m wíy lò, e fèr áwune, aá bónén, a dzə atávkín, e yiì, aáwune wáa dzə dzə́ ye juŋe ji nyaáŋ, e kfə̀n a dzə akiŋsìn.

⁷M wíy siìr vijuŋ ve Juda wùn à vé Isray vi fó, e tuúy áwune, aá wáa dzə mo vé‑eè yii dzə́ fo mbìy.

⁸M wíy làysìn ajay vév adzə̀m ve vé‑eè rə́si jáy e mò, e làysìn vinyo vév ve bi ví vidzə̀m ve vé‑eè buʼtì, tsə́y kóy vèr áwune, e nèn sù njò yev.

⁹Ŋkàlaʼ rə̀n wíy a fo mo vijuŋ wùn à kishéʼrì ki, à ghvə́me, é wáa dzə kiŋkoʼòrwùn kém e vitúm ví si. Vitúm vidzə̀m veé kitu ke nsay vi wíy lòo yu vinyo ve juŋ ve m yii e wír vémé, à mo m səəvì ŋkàlaʼ rə̀n, aá wáa fàn, a yàʼ.»

¹⁰NYÙY TÀR suuy jii, «Mo wíri yoŋ ji kirə́ʼ kin ki lày ne kisáŋ, a bó wíri, kìn nyám si yòʼ dzə̀ fó, dzə̀ rú. Ŋkà se laʼ seé Juda wùn à dzə́ə seé Jerusalem si dzə̀ lèn ji làykìsáŋ kirə̀ʼ, bó wíri kìn nyám si yòʼ kum fo. Yii bèy, aá kù kfə̀n wíy a yu

¹¹léŋ kisheʼrì fo, a yu wó vijùŋe, a yu yòv vijìn, a yu sa yòv wìr ve á wiy e cúu é lav cù ji á beerì Nyùy. Á wíy a yòv jii: « ‹Á wáa beèrì NYÙY TÀR woo Taà Mànjòŋ, wù dzə̀ e juŋ, a koŋ ye wù koŋ wír vəə́ yòʼ wíy mày.› A kí dzə̀ jii, m wíy siìr vijuŋ veé nsay foo fèy mo ví‑iì yii dzə́. Suuy mo woo NYÙY TÀR.»

¹²Kinyo ke NYÙY TÀR woo Taà Mànjòŋ yoŋ ki dzə̀ jii, «Kirə́ʼ kin ke kí duùn ne e vifə̀m, a bó wíri, kìn nyám si yòʼ dzə̀ fó ki dzə̀, a vibìn vé nyàm vi kfə̀n wíy a dzə fo, áànshìyi wáa lèm nyám sév fó. A kí kù wíy a dzə bèy ŋkà se laʼ see fó sidzə̀m.

¹³Rúrú, anshìy bvəyi kù dzəə́ wìy a taŋ bvə́y sév e ntèʼ seé mbìv wòŋ agwan, a taŋ e ntèʼ seé Shefela, à seé Negev si, a taŋ bèy e nsay Benjamin, kfə̀n a taŋ sa e virə̀ʼ veé ghaa Jerusalem, a taŋ e ntèʼ seé Juda sidzə̀m. Suuy mo woo NYÙY TÀR.

¹⁴«Ghán sí wiyì se m wíy yiì, é ŋkàʼmé wo mò‑oò kàʼàn wír veé Isray wùn à veé Judàa shó gheén. Suuy mo woo NYÙY TÀR.

¹⁵«Wíy lòo dzə e ghan fen, é m yii, é tám woo réŋé fəə́ e Davir ram, a ŋgaàŋ wíy a saʼ woŋ, a tinén vinyo tìítiy, a yiì a dzə̀ vinyo ve ru ví.

¹⁶Wíy lòo dzə e ghan fen, é wír veé Judàa boy, é dzəʼə̀m wìr veé Jerusaleme wáa dzə e kiŋsìn. A yír ye á wíy a yòŋ ŋgaàŋ shoo dzə̀ jii, ‹NYÙY TÀR dzə̀ Ŋgaà Lùŋèr wor.›

¹⁷Bó rám Daviri yòʼ wíy a buŋ wír wo wù wáa saʼ vifon veé Isray. Suuy mo woo NYÙY TÀR.

¹⁸Bó atàá cù ve kù dzəə̀n wír veé ram Levìi yòʼ wíy a buú wír wo wù wáa tiy e mǒ si ghán sidzə̀m, a yiì cu ye tonèné wùn à yé vifa ve yii, à yé nyàme.»

¹⁹NYÙY TÀR nèn kfə̀n sùŋnín e Jeremia.

²⁰Wù‑uù sùúy jii, «Mo bó yòʼ dzə̀ kí kòóy ji dzə̀ á bìvír *mensaŋ me vèr à kishiíy kí gwàrìn, vèr à vitsə́ʼ ví gwár, yee ji lá kishiíy wùn à vitsə́ʼ ví yòʼ dzə́ə a dzə e ghan se m sìysìn,

²¹bo bó yòʼ dzə̀ sá kí kòóy ji mensaŋ me vèr Davir woo ŋgaà lìm wom mè wìy mày, é la wìr woo Davir ram yòʼ dzəə wìy a yi vifon, a saʼ e wun ntaʼ. A bó yòʼ dzə̀ sá mensaŋ me vèr aàtàá cù mè wìy mày, áwune vee rám Levi ve á yii lim yém.

²²M wíy yiì, é rám Davir woo ŋgaà lìm womé kuʼ, é yé atàá cùu kuʼ sá, áwune ve kù dzəə̀n rám Levi, ve á lim fo mò. Á kù wíy a dzə moo mejiy me mè dzəə̀n é yuv, a dzə moo síy seé meshavtí me rìbà ndzə̀v se bó yòʼ dzə̀ wìr tàŋ, e kìíy.»

²³NYÙY TÀR kfən lò, e sùúy e Jeremia jii,

²⁴«Bó à yoʼ yù kinyo ke wír vìne suuyì à? Á yoŋ ji NYÙY TÀR mèŋ á ne rám yee baà ye wù‑uù shavin ji á wáa saʼ a mbìv wòŋ yee Juda, à yee Isray. Áwune yoŋ bèy, nèn ŋwáy wír vém ŋwáyín, e làa yòʼ dzə́ə a yen áwune ji kitúm.

²⁵Mo woo NYÙY TÀR nén a suúy ji a lò a dzə rú ji m yòʼ‑oò lo gwàr mensaŋ mem vèr à kishiíy kí, à vitsə́ʼ ví, e kfə̀n lèm nsər se sí wáa dànèr yúv wùn à nsay,

²⁶bo m wíy meŋ rú rám Jakov wùn à yé Davir woo ŋgaà lìm wom, e làa yòʼ wìy shoʼ wír fo wun ram ji wù wáa saʼ a rám Abraham wùn à Aysi, à Jakov. M wíy siìr vijuŋ vév fó, a sham áwune.»