Read Lamnso Jeremia 35 Bible Online

Jeremia 35 - Lamnso bible

Jeremia 35

¹NYÙY TÀR‑iì sùŋnín e mò woo Jeremia e ghan se Jehoyiakim woo wan Josia‑aà dzəə̀n fon woó Juda, e yòŋ jii,

²«Dù, e yèn wír veé kfəə Rekavi, e sùúy, aáwune wiy, áà li, e dù sho e wàn lav wùmòʼ é lav cù, e fò meluʼ, aá nó.»

³M nèn dù, e yèn rám Rekav e dzə̀m, a yí dzə̀ jii, Jaasania wo á yoŋ tàr wov sá ji Jeremia, wo dzəə̀n wan Habassinia. M yén wun, wùn aàfə́r vəə́, à wóné,

⁴e nèn lì áwune, e wìy sho e lav cù, e nə̀ə́ sho e wón Hanané wàn lav. Hanan və̀n dzə̀ wan Igdalia woo *ŋgaà ntum Nyùy. Wàn lav və̀n‑eè dzə̀ é ghaa wàn lav wo dzəə̀n wo atǎr saʼ, a wù‑uù dzə̀ e Ma‑Aseyia woo wan Shallum kitu ke wàn lav. Shallum və̀n dzə̀ wo yì‑iì leey wun shuu se kày seé lav cù.

⁵Vèr áwune nəə́ bey, m nèn tìír ŋgìv se melùʼ wùn aàbàri e rám Rekaví si, e nèn sùúy ji áwune wáa no a meluʼ.

⁶Yii bèy, áwune bìnèr jii, «Vèr yòʼ yii nó meluʼ, bìʼ fo tàr wor woo Jehonadav[44] woo wan Rekav‑iì foon nsər e vèr ji lá wìr fo vèr à wón vérí yòʼ wìy mùm, e nò á meluʼ.

⁷Lá vèr yòʼ wìy bòm á lav. Lá vèr yòʼ wìy a way a ŋgoòy kifa. Lá vèr yòʼ wìy a bìy a vitiír vé *vayin, kìn ji vèr wáa ker a vifá vìn ji vér. Vèr kù wíy a beè a dzə̀ á e tàv sí, e nèn wìy bonén, e shiíy a e nsay ye vèr dzəə̀n shó moo viŋgwìy rə̀n.

⁸Vèr yùnín ne kinyo kidzə̀m ke tàr wor Jehonadav wo dzəə̀n wan Rekav‑iì yòŋèn e vèr. Bó ver vin, kìn vikìy vér, kìn wón vér vee vilum, à vee vikìyí yòʼ‑oò yiì ne nò meluʼ e věr dzə̀ʼə̀m.

⁹Bó vèr yòʼ‑oò ghàn sìíy bòm lav si, a dzə sho, aá yòʼ‑oò yiì a ker súm sé vitiír vé vayin, kìn sé vifa ve yi.

¹⁰Vèr kù yii dzə́ a dzə̀ é tàv sí, a vèr yùnín ne kinyo kidzə̀m ke tàr wor Jehonadav‑iì yòŋèn e vèr.

¹¹Fòn Nebukadnessar woó Babilon‑eè nə̀ə́ rə́r é wòŋàn, vèr nèn yèn ji ghèén, é vèr lo, e dù, e beè e ŋkàlaʼ Jerusalem, e fíʼ leʼ a vé rər veé Babilon wùn à veé Siiriàa. Vèr ku nèn gòʼ, a dzə e Jerusalem fèn.»

¹²NYÙY TÀR nèn sùŋnín e Jeremia,

¹³e tiìsí ntum ye wù yíi dù, e tiisí e wír veé Juda wùn à veé Jerusaleme jii, NYÙY TÀR woo Taà Mànjòŋ, wun woo Nyùy wìr veé Isray dzə́r a jii, «Vèn yoʼ yèʼéy kinyo fo kinyò fèn, yée a yunín mo a? Suuy mo woo NYÙY TÀR.

¹⁴Jehonadav woo wan Rekav‑iì fò nsər e wón vəə́ ji lá á yòʼ a no a meluʼ. Áwune ku nèn yùnín, e làa yòʼ a no, e wìy, e shem lán, a dzə̀ bìʼ fo á lem nsər tàr wov. Kém kí nén a dzə, a m rə́si súŋnin e vèn, a bó vèn yòʼ yú kinyo kém.

¹⁵M tsə̀nsí vé lìm vém vee aŋgàa ntum fo věn wùn akàŋ akàŋ, á wíy, a fìʼtì e vèn ji wìr mòʼón mòʼón fo vèn maʼti á yii rə́ kisaŋe, e kùvsín, a yiì a réŋ, e làa yòʼ a jùmrì a anyùy kisaŋe, a lìm fo fo, é vèn ku nèn wìy a dzə a e nsay ye mò‑oò foon e vèn aàtàr véné. Yii bèy, la vèn yòʼ a gwàrìr kinyo kém, e làa yòʼ yuurí.

¹⁶Wón Jehonadav woo wan Rekavi‑iì lèm ne kinyo ke tàr wov‑iì yòŋèn aáwune, yii bèy, a vèn tèn ne fóo yu kinyo kém.

¹⁷Á bèy, mo woo NYÙY TÀR woo Taà Mànjòŋ, mo woo Nyùy wìr veé Isray nén a suúy jii, vèn yuúri yù, m lo, e màʼ ŋgeʼ ye mò‑oò yòŋèn e dzə̀m e wír veé Juda wùn à wìr dzə̀m woó Jerusalem kitu, a dzə̀ bìʼ fo m suŋnin aáwune, la á yòʼ yuùrí. M jáŋ áwune, á tén fó biimé.»

¹⁸Jeremia nèn sùúy e kfə́ə Rekavi ji NYÙY TÀR woo Taà Mànjòŋ, wun woo Nyùy wìr veé Isray yoŋ a jii, «Mo vèn yunin kinyo ke Jehonadav woo tàr won, a jùmrì kinyo ke wù yòŋèn kidzə̀m, a yiì kinyo kidzə̀m ke wù‑uù suuyin e vèn,

¹⁹bo ke mo woo NYÙY TÀR woo Taà Mànjòŋ, mo woo Nyùy wìr veé Isray suuy ki dzə̀ jii, Jehonadav woo wan Rekav yòʼ wíy buú wír fo wun ram wo wù wáa tiím e mǒ si, a cù mo.»