Read Lamnso Jeremia 36 Bible Online

Jeremia 36 - Lamnso bible

Jeremia 36

¹Wáa dzə e kiya ke kí‑iì meen ji kweè, mo vé‑eè koʼorin Jehoyiakim woo wan Josia ji fon woó Juda, NYÙY TÀR kfən sùŋnín e Jeremia, e tiìsí ntum rə shó.

²Wù‑uù sùúy shó jii, «Lì kiŋkur ke ŋwàʼ ki, e sàŋ vinyo vidzə̀m sho, ve m suuyin e wò kùm Isray wùn à Juda, à vitúm vidzə̀m vi, a dzə̀ ji vinyo ve m yòŋèn, e kèʼ fo ghan se Josia‑aà sáʼ vifon, e wìy shem lán.

³Sáŋ ó, e ghanmóʼ, é wír veé ram Judàa yú ŋgeʼ ye m báʼti ji m maʼ aáwuné kitu, é wìr dzə̀m maʼti yii rə́ ye bií, é m laysin ajay vév wùn à vinyo vév ve bi ví.»

⁴Jeremia ku nèn jàŋ Baruk woo wan Neria, a yòŋ vinyo vidzə̀m e naáy naáy, a dzə̀ ve NYÙY TÀR‑iì tiisin e wun, Baruk wáa saŋ e kiŋkur ke ŋwàʼ.

⁵Jeremia wìy lò, e yòŋ Baruk, e sùúy sho jii, «Á tìír ne mo fo NYÙY TǍR lav.

⁶Ló dù wò fo. Ku dù a dzə̀ é kishiíy ke wíri báʼti, a lèm jíŋ, e yòŋ ŋwàʼ və̀ne, é wíri yú kinyo kìn ke NYÙY TÀR suuyin e mò, m yóŋ, à sáŋ. Ku yòŋ, é wìr dzə̀m woó Juda wo wù wìyìn fó ntèʼ see fó ghaŋ yú sá kijuŋ.

⁷À yoŋ bèy, tam aáwune wáa buʼ wó e NYÙY TÀR, é wìr wáa bìn ndzə̀m e wun liì kisaŋ, bìʼ fo dòʼshwiiy NYÙY TÀR wo wù koʼon wùn à ŋgeʼ ye wù baʼtin ne a kìʼ áwune shó, dzəə̀n e gháʼán.»

⁸Baruk woo wan Neria ku nèn yiì kinyo kidzə̀m ke Jeremia woo *ŋgaà ntum Nyùy‑iì yòŋèn e wun. Wù‑uù yòŋ kinyo ke NYÙY TÀR é lav Nyùy, kù mo á saŋen é ŋwàʼ.

⁹A kí dzə̀ jii, yì‑iì dzə̀ é ŋwee wo wú‑uù meen ji bvə̀ʼə̀ fo kiya ke kí meen ji tàn, mo Jehoyiakim woo wan Fòn Josia woó Juda‑aà yiin vifon, wìr dzə̀m wo wù‑uù dzəə̀n é Jerusalem wùn à woo lò fó ntèʼ seé Juda sidzə̀m shóʼ kishiíy ji wìr dzə̀m lem á jíŋ, e bàʼtí e lav cù.

¹⁰Kù‑uù dzə̀ kishiíy kin ke Baruk‑iì duùn é lav cù, a yòŋ kinyo ke Jeremia‑aà suuyin fó ŋwàʼ, wìr dzə̀m wáa yuurí. Wù‑uù nə̀ə́, e tìím a dzə̀ e Gemaria shùu lav, a lav rə̀n dzə̀ é maàndzə yee fó yuv, e dzəə ye yì nəə e lav cù fo Shùu Kày wo Fíyi. Gemaria və̀n‑eè dzə̀ wan Shafan woo ŋgaà saŋ wo kuʼùn.

¹¹Mikayia wo tàr wov dzəə̀n Gemaria woo wan Shafan wáa dzə fo, e yù kinyo ke NYÙY TÀR kidzə̀m mo Baruk yòŋèn fó ŋwàʼ,

¹²e nèn fəə̀, e dù e ntoʼ, e nə̀ə́ e lav yee fo ŋgaà saŋ woó ntoʼ yii dzə́, a vé sáʼa‑aà kér dzəʼə̀m fo. Vé‑eè dzə̀ jii, Elishama woo ŋgaà saŋ, Delaya woo wan Shemayia, Elnatan woo wan Akbor, Gemaria woo wan Shafan, Tsədekiya woo wan Hananiya, e lì vé saʼa adzə̀m.

¹³Wù dù bèy, e nèn kwèr kinyo kidzə̀m e naáy naáy mo wù kì yuun a Baruk yoŋ fo ŋwàʼ, a wìr dzə̀m yuúri.

¹⁴Vé saʼ adzə̀me nèn tùm Jehudi, a dzə̀ wan Netania, a Netania dzə̀ wan Shelemia, wo dzəə̀n wan Kushi. Wù dù, e sùúy e Baruk jii, «Lì ŋwàʼ wo à yoŋ, a wíri yuúri və̀yi e kiwó ké ki, e wìy sho.» Baruk ku nèn lì ŋwàʼ woo shooy, e wìy sho fo áwune‑eè dzəə̀n.

¹⁵Áwune nèn yòŋ e wun jii, «Ku dzə̀ʼə̀m e nsay, e yòŋ ŋwàʼ və̀yi, é vèr yú.» Baruk ku nèn a yòŋ, áwune wáa yuurí.

¹⁶Áwune yú vinyo vìn vidzə̀m, e nèn a fàn, e leèynín, e sùúy e Baruk jii, «Vèr kù kér fó bùn fon, e fìʼtì kinyo kìn sho kidzə̀m.»

¹⁷Áwune yòŋ bèy, e dzə̀r e Baruk jii, «Suúy ó e vèr mo à ghanen, e bóo saŋ vinyo vìn? Dzə̀ ji Jeremia kì yoŋ, aà sáŋé à?»

¹⁸Baruk bìnèr aáwune jii, «Kù yòŋ Jeremia jí sìn sidzə̀m e shuu vəə́, m sáŋ kém saŋén é ŋwàʼ.»

¹⁹Vé saʼa nèn yòŋ e Baruk jii, «Dù, é vèn Jeremia lir, a yen fó yiì, é wìr kiíy fo vèn dzəə̀n.»

²⁰Áwune yòŋ bèy, e nèn lì kiŋkur ke ŋwàʼ kìy, e lèm e wàn lav wo yì‑iì dzəə̀n wo Elishama woo ŋgaà saŋ, e nèn dù e taa kibùʼ, e bùn fon, e fìʼtì kinyo kidzə̀m sho.

²¹Fòn nèn tùm Jehudi ji wù du, e lì a ŋwàʼ woo shooy. Wù nèn dù, e lì fo Elishama wàn lav, e wìy sho, e nèn a yòŋ, fòn wùn à vé saʼ ve vé‑eè tíy e fòn ghaŋe wáa yuurí.

²²Ghán see shoon si‑iì dzə̀ é ŋwee kintòn, a fòn dzə̀ é faáy woo fo á yii dzə́ e ghan sé kintòn, yór və́y fó kiy wo ferìné.

²³Jehudi yoŋ vilíŋ ve ŋwàʼ və̀y vitaár kìn vikweè, fòn nèn shèr vee shooy e shishwàshwàʼ shi, e tòn e kiy. Kù bey, e meé mo kiŋkur ke ŋwàʼ kìy ki‑iì màyìn.

²⁴Fòn wùn aàtǎr ntoʼ və́ adzə̀m ve vé‑eè yuun vinyo vìne yòʼ‑oò lo fàn, a bó wìr fo áwune yòʼ‑oò lo saàsì ndzə̀y fó wùn.

²⁵Fə̀m mo Elnatan wùn à Delaya, à Gemaria‑aà bun fon ji nyàr káʼ, lá á dzəə tòn a ŋwàʼ və̀y, fòn yòʼ‑oò ló a yuurí.

²⁶Fòn lò bèy, e nèn tùm wan ntoʼ woo Jeraameel wùn à Serayia woo wan Asriel, à Shelemia woo wan Abdeel ji á koó á ŋgaà saŋ woo Baruk wùn *ŋgaà ntum Nyùy woo Jeremia. Yii bèy, a NYÙY TÀR kì lìtì ne áwune.

²⁷Mo Fòn Jehoyiakim tònèn kiŋkur ke ŋwàʼ ke jí se Nyùy se Jeremia‑aà yòŋèn, Baruk sáŋ siy si‑iì dzəə̀n shó, NYÙY TÀR nèn sùúy e Jeremia jii,

²⁸«Lì ŋwàʼ wúmóʼó, e sàŋ kinyo kidzə̀m sho, kù mo kí‑iì dzəə̀n e wó mbìyi wo Jehoyiakim woo fon Juda‑aà tònèn.

²⁹Sáŋé, à yòŋ ké wun woo Fòn Jehoyiakim woó Juda ji NYÙY TÀR suuy a ji wù‑uù ton ŋwàʼ və̀n, fáŋnin a ji Jeremia sà yèe, e bó a saŋ ji fòn woó Babilon yíi wìy, e bvəʼə́y ŋkàlaʼ rə̀n, e yuyrí wíri wùn à nyám si á?

³⁰Bo kinyo ke NYÙY TÀR suuy kùm wun woo Fòn Jehoyiakim woó Juda ki dzə̀ á jii, ‹Bó wìr woo bvəm rə́ yòʼ wíy a saʼ a vifon vee Davir ram. A ké wun woo fon ki dzə̀, aá wíy sàŋ dzə́n rə́, é yí wáa rəsí e shùy, a shaà, a shiíy e kintòn.

³¹M wíy màʼ ŋgeʼ e wùn kitu, e màʼ e rám rəə́, à e və́ vé saʼa, a dzə̀ bìʼ yii yév kisaŋe. M wíy wìy e ŋgeʼ si sidzə̀m se mò‑oò yòŋèn ji m wíy nəə́ áwune shó, e nəə́ sa wír ve á dzə́ e Jerusalem, à veé Judàa adzə̀m, a kù dzə̀ bìʼ fo áwune tenen fó yu kinyo kém.› »

³²Jeremia nèn kfə̀n lì kiŋkur ke ŋwàʼ kímóʼ kí, e fò e Baruk woo ŋgaà saŋ wo yì‑iì dzəə̀n wan Neria, e nèn kfə̀n a ruvtí vinyo vidzə̀m, Baruk wáa saŋ réŋréŋ mo wù‑uù saŋen é ŋwàʼ mbìyi wo Fòn Jehoyiakim woó Juda‑aà səən, e tòn. Jeremia kfə̀n‑eè dzə̀sì sá vinyo vímóʼ ví shó.