Read Lamnso Jeremia 37 Bible Online

Jeremia 37 - Lamnso bible

Jeremia 37

¹Fòn Nebukadnessar woó Babilon‑eè kòʼór Tsədekiya woo wan Josia ji fon Juda, e lèm ji wù wáa saʼ a e Fòn Jehoyiacin[45] woo wan Jehoyiakim ntaʼ.

²Yii bèy, à wun, à və́ vé saʼa, à wír vee wun nsayi, wìr wóo yuurí kinyo ke NYÙY TÀR‑iì tumen Jeremia sho yòʼ‑oò ló a dzə.

³Fòn Tsədekiya nèn lò, e tùm Jehukal woo wan Shelemia, wùn taà cù Tsəfaniya woo wan Ma‑Aseyia, ji á du, e yèn á Jeremia woo *ŋgaà ntum Nyùy, e yòŋ sho a ji kii wun, wù kú a bùnrì a NYÙY TÀR woo Nyùy wov, ji wù sə́ á áwune.

⁴Yì‑iì dzə̀ é ghan fen, aá yóʼ ne fìn Jeremia e lav sháŋ, a wù dzəə́ ghánen e wírí mvəm kicaárín.

⁵Kú a dzə sa e ghan fen, a vé rə́r fòn woó Ejivi fəə́ ne nsay Ejiv, a wìy, a vé rər veé Babilon ve vé‑eè gìmèn Jerusaleme yú ne, e lò fo fo.

⁶NYÙY TÀR nèn kfə̀n sùŋnín e Jeremia woo ŋgaà ntum və.

⁷NYÙY TÀR woo Nyùy wìr veé Isray‑iì sùúy shó jii, «Mo fòn woó Juda tumen wò ji à wáa buʼ wó e mò, dù sùúy sho ji vé rə́r Farao ve vé‑eè wìyìn ji á sə́ wune sí lo, a kfən a bàm é Ejiv, aáwuné nsay.

⁸Aá ló kfən, é wír veé Babilone siir ŋkfənèr, e nə̀ə́ ŋkàlaʼ rə̀n e rə́r sí, e faàsì fó, e tòn a e və́yí.

⁹NYÙY TÀR suuy a jii, ‹Lá vèn yòʼ a boʼtí vitú vén ji wír veé Babilone dù a ne ŋkuuŋkùŋ, aá yòʼ dzəə́ wìy nəə́ ven. E ké ru kí, bó yòʼ dzə̀ á gòʼ, e làa kù nəə́.

¹⁰A fə̀m lò a dzə ji vèn gháʼ vé rər veé Babilon ve vèn áwune maʼ rə́r, é bér ve á lemkin, a neŋnín e tàv sí, bo á kù lo, e nànèn, e tòn ŋkàlaʼ rə̀n e və́yí.› »

¹¹Mo vé rə́r Farao‑oò meʼen Jerusalem, a vé rər veé Babilone ló ne fo fo,

¹²Jeremia nèn a fəə fo ŋkàlaʼ ji wun du e nsay Benjamin, e dù, e sə rə́ yee kéŋ aàfə́r vəə́ mvəm.

¹³Wù dù, e mèé e shùu kày wo wú nəə e nsay Benjamin, wìr wo yì‑iì dzəə̀n kitú ke wìr ve á leey kay, a yír rəə́ dzə̀ Irija, a dzə̀ wan Shelemia woo wan Hananiya nèn ghàr wun, a yòŋ jii, «Á kfən e bàm, à sí léʼ, e dù, e tatí ŋgoo rə̀r yeé Babilon.»

¹⁴Jeremia nèn bìnèr jii, «Bó yòʼ dzə̀ bey, bó m yòʼ léʼ, e dù, e tatí wír veé Babilon.» Wù wáa yòŋ bèy, la Irija yòʼ fə̀m a yuurí, e nèn kù koò wun koón, e dù, e fò e vé saʼa.

¹⁵Kilòŋ kí‑iì shwìíy áwune bìʼ Jeremia, á nèn yòŋ, á dzə̀v wun, e fìn e Jonatan woo ŋgaà saŋ lav, a vé‑eè binèr ne ji lav vé sháŋé.

¹⁶Lav rə̀n‑eè dzə̀, a mbvə̀ʼ ye tuŋén dzə̀ é sar wo, á fìn Jeremia, wù dzə̀ʼə̀m fo vishiíy vinín.

¹⁷Fòn Tsədekiya lò, e tòóy, á wìy e Jeremia, wùn wun bàr wún é faáy, fòn dzə́r shó bámbám jii, «À kér ntum ye yì loòn fo NYÙY TÀR á?» Jeremia bìnèr jii, «Nyàr, yì waà dzə̀. Vé rərí yíi koo a wun, e dù, e way a e fòn woó Babilon kiwo.»

¹⁸Jeremia kfən bùn fon jii, «Nyàr, m sà jày ka e fòn wùn à vilìmbìy və́ ví, e jày e wír vìne ye á wáy mo é sháŋ á?

¹⁹Aŋgàa ntum fòne sà bèé lèn, áwune ve vé‑eè tiísi ntum Nyùy e fòn ji bó fòn woó Babilon yòʼ yíi kìʼ wun, e kìʼ woŋ və́ e rə́r sí á?

²⁰Nyàr, éè tàr wor, m lón a ji á ku sə̀ á mo. Lá á yòʼ dzəə siìr a mo é sháŋ woo Jonatan lav fo m yiì kpù á fo.»

²¹Fòn Tsədekiya nèn fò sáʼ, á lí Jeremia, e dù, e fìn e kibùʼ ke nsheèlav, a sə ntuʼ kiban fo vé fèri kishiíy kidzə̀m, a fo sho, e meé mo kibán ki‑iì màyìn kidzə̀m fo ŋkàlaʼ. Jeremia ku nèn a dzə e kibùʼ ke nsheèlav.