Read Lamnso Jeremia 38 Bible Online

Jeremia 38 - Lamnso bible

Jeremia 38

¹Mo Jeremia kù‑uù tiísi ntum rə, Shefatia woo wan Mattan wùn à Gedalia woo wan Pashur, à Jukal woo wan Shelemia, à Pashur woo wan Malkia nèn yù vinyo ve wù rə́si yoŋ e wíri.

²Wù‑uù yoŋ ji NYÙY TÀR suuy a ji wír ve á goʼ e Jerusaleme wíy kpu yé rər, kìn yé jiŋ, kìn yé kifə̀ʼ. Yii bèy, a wìr wo wù du, e shwi kitú e wír veé Babiloné wo wíy bòy. Séʼ və wíy a dzə dzəʼə̀m, é wù goʼ e tin.

³NYÙY TÀR kfə́n a suúy jii, wun yíi way a ŋkàlaʼ rə̀n e vé rə́r fòn woó Babiloné kiwo, aá ton.

⁴Vé saʼ vìne nèn dù, e bùn fon jii, «Á ku lì a jwè və̀n, e dù sho a e kisəə. Wù semèr a kóy vé rər ve á berin á e ŋkàlaʼ fèn e vinyo ve wù táŋri vi, kfə̀n semèr a wó wìr dzə̀m. Bó kfə́ kí yòʼ dzə̀ á ji wun sə́ wíri, wù bá kfə́ a dzə̀ á menàŋ.»

⁵Fòn nèn bìnèr jii, «Wù sì e věn kiwo, bó yòʼ dzə̀ m kàr kinyo kén.»

⁶Á bèy, áwune nèn lì Jeremia, e dù, e wày é mbǐʼ mendzə̀v wo buʼùn wúmóʼó, a yì‑iì dzə̀ wó wàn ntoʼ woo Malkia, a wú dzə̀ é kibùʼ ke nsheèlav. Vé‑eè sə̀yír Jeremia aàkfə̀ə́, a bó mendzə́v mè yòʼ‑oò dzə̀ə́ e mbìʼ fen, yì‑iì sì kishaʼàr shó. Jeremia nèn sə̀y e nə̀ə́ e kishàʼàr.

⁷Ebed‑Melek wo dzəə̀n wír woó Etiopia,[46] a dzə̀ nshìylav fàáy nèn yù ji á wày ne a Jeremia e mbǐʼ mendzə̀v. Wù yú bey, a fòn kì dzə́ e shùu kày wo á yoŋ ji wó Benjamin,

⁸e kù nèn fəə̀ fó ntoʼ, e dù, e bùn fon jii,

⁹«Nyàr, wír vìne jày á ne e kinyò ke á yiìn e Jeremia woo *ŋgaà ntum Nyùy. Á wày á ne wun e mbǐʼ mendzə̀v, a wù yíi kpu a jíŋ fo. Bó kifá ke yi ki yòʼ dzəə́ kum a e mvə̀mlaʼ, é bo wù wáa ker a kfə́.»

¹⁰Fòn nèn yòŋ e Ebed‑Melek jii, «Ku lì vilum fo fèn mtaár, é vèn áwune du, e fə̀ə́r Jeremia fo mbǐʼ mendzə̀v, fo wù yiì kpù fó.»

¹¹Ebed‑Melek ku nèn lì wír vìn, wùn áwune dù, e nə̀ə́ e wàn lav woó sar kitàv keé ntoʼ, e lì viŋkway ve ndzə̀y ve ví sí saʼkìrì, e dù, e sə̀yír e kfəə̀ é mbìʼ wo Jeremia‑aà dzəə̀n shó.

¹²Ebed‑Melek woo wir Etiopia və̀n nèn yòŋ e Jeremia jii, «Tómbìy fàvtì vinsàʼ ve ndzə̀y viy vi e wò kàvìr sí, e bóo wayrí akfə̀ə́ shó. Jeremia ku nèn yiì bèy.»

¹³Áwune nèn sə̀ŋ Jeremia aàkfə̀ə́, e fə̀ə́r fo mbìʼ. Jeremia nèn gòʼ, a dzə e kibùʼ ke nsheèlav.

¹⁴Fòn Tsədekiya nèn lò, e tòóy Jeremia woo ŋgaà ntum Nyùy, á wìy sho e shùu ràŋ fo fòn yii shaa, e bó a nəə́ e lav cù. Fòn nèn yòŋ e Jeremia jii, «M dzə́r kinyo ke m dzə́r e wò, lá à yòʼ lìtì kinyo fo mò.»

¹⁵Jeremia nèn yòŋ e Tsədekiya jii, «Nyàr, a m sà sùúy suuyrú e wun, bo bó á yòʼ sà lo, e yuy mo á? A m lò, a tir wun, bo á yòʼ fə̀m‑éè yuúrí á ntir yem.»

¹⁶Fòn Tsədekiya nèn lì Jeremia, wùn wun bàr wún, wù lìʼ jii, «Mo NYÙY TÀR wo wù fó dzəʼə̀m e vèsən dzəə̀n shó e tin, yòʼ dzə̀ m fò wò e kpúu, kìn ji m fó wò e wír ve á taʼ e laàr wòo.»

¹⁷Jeremia nèn yòŋ e Tsədekiya ji NYÙY TÀR woo Taà Mànjòŋ, wun woo Nyùy wìr veé Isray yoŋ a jii, «A fòn lòo dzə, e lì kitú kfə́, e dù, e shwì vilìmbìy ve fòn woó Babilon sho, bo fòn yíi lùŋ, é la á yòʼ dzəə yiì tòn a ŋkàlaʼ rə̀n e və́yí. Bo fòn wùn à kfə́ə rəə́ wàa yíi gòʼ atin.

¹⁸Yii bèy, a fòn tèn fóo dù, e shwi kitú e vilìmbìy ve fòn woó Babilon vi, bo á yíi way a ŋkàlaʼ rə̀n e wír veé Babiloné kiwo, aá ton e və́yí, é la fòn yòʼ bòy sa a fo áwuné wo.»

¹⁹Fòn Tsədekiya nèn a wovrí kfə́ e Jeremia jii, «M fan afə́r vém veé Juda ve vé‑eè shwiin ne kitú e wír veé Babilone. M fan ji kìn m du, aá wáy mo aáwuné wo, aá wáa nə̀ʼsì.»

²⁰Jeremia bìnèr jii, «Á yòʼ wíy way a fon e wír vee shooyí wo. Kí dzə̀ á ji fòn ku yùnín a dzə̀ á kinyo ke NYÙY TÀR ke m tiisin á e wun, é vinyo ve fòn vi nèn wìy a ghan a kijuŋ, é dzəʼə̀m fòne wáa dzə a e kiŋsìn.

²¹Yii bèy, a fòn tèn fó shwi kitú, bo kinyo ke NYÙY TÀR ghemen ndzə, e dìn e mò kí dzə̀ á jii,

²²mò‑oò yèn, a vé rərí lí vikìy ve vé‑eè berin é ntoʼ Juda, a dù sho ji á fó e vé saʼ fòn woó Babilone. Vikìy víne‑eè du bèy, táŋ vinyo ve fòn a jii: « ‹Ŋkar sé se tim sí bòʼtí ne wò, á lèvtí ne wò, à jáy dzə́ə. À tò ne e kishàʼàr wuu baà, áwune bín ndzə̀m e wò.›

²³«E ké ru kí, vé rər veé Babilone wíy koo a vikǐy ntoʼ wùn à wóné adzə̀m, e dù a sho. A fòn kitú kfə́ yòʼ wíy bòy a fo áwuné wo. Fòn woó Babilon kù wíy koo a wun, e dù a sho, aá kfə̀n wíy tòn a ŋkàlaʼ rə̀n e və́yí.»

²⁴Fòn Tsədekiya nèn yòŋ e Jeremia jii, «Aà koŋ, e bòy fo kpu, lá à yòʼ yiì, é wìr kiíy kinyo ke wòsò fèrìn kin.

²⁵A vé wòŋe yiì yù ji wòsò waà kì sùŋnín, e wìy, a sòv ji à suúy á kinyo ke à kì yòŋèn e mò, e sùúy a ke m kì suuyin e wò, e kàntì wò ji lá à yòʼ lìtì a kinyo fo áwune, fo á yúyrí á wò,

²⁶à nèn sùúy aáwune jii, à kì bùn a dzə̀ á fon, a toŋ a ji lá wù yòʼ dzəə yiì siìr a wò e Jonatan lav, fo à yiì kpù á fo.»

²⁷Vé wòŋ adzə̀me ku nèn wìy, e yèn Jeremia, a dzətí, wù nèn bìnèr vinyo vidzə̀m a dzə̀ mo fòn kì yòŋèn e wun. La áwune yòʼ dzəə dzə̀r kinyo sho, bìʼ fo wìr yòʼ‑oò lo yù kinyo ke wùn fòn kì fèrìn.

²⁸Jeremia ku nèn gòʼ e kibùʼ ke nsheèlav fèy, e dù, e mèé mo rə́r sí‑iì tònèn Jerusalem.