Read Lamnso Jeremia 4 Bible Online

Jeremia 4 - Lamnso bible

Jeremia 4

¹«Éè Isray, a vèn sí koŋ e bìnkìr, vèn kù kfə̀n é bàm, e yèn a dzə̀ mo. Suuy mo woo NYÙY TÀR. Vèn ku tsə̀ʼ joonè wón woo mebvə̀me fo mǒ si, e làa yòʼ kfə̀n a dzən tùʼtàn.

²Wìr lóo kàʼ kinyo, lóo kàn yír yém, mo woo NYÙY TÀR, wù kù a suúy a dzə̀ suuyrú, a yiì vinyo vee réŋ, là kiloʼ. Á bèy, é vitúm vidzə̀m vi nèn a wìy, a yen mo, é m wáa səə̀vì áwune, aáwune nèn a tuy shwín ji m dzə̀ á wóov.»

³NYÙY TÀR nén a suúy e wír veé Juda wùn à veé Jerusaleme jii: «Vèn lim kwáʼ sén se sí tíy là lim si. Lá vèn yòʼ wày kiŋgway e kighìn.

⁴Ven vee wír veé Juda wùn à ve á dzə́ e Jerusaleme, vèn kú a tiy a dzə̀ e mǒ *mensàŋ me m gwàrìn vèsən. Vèn su melív men mè, é mè wáa tiy e mò woo NYÙY TǍR wùn. Là bey, bo dòʼshwíiy wom yíi koʼ moo və́y, a dzə̀ bìʼ vinyo vén ve bi ví, lóo tòn ven, é la wìr wóo ndzəmér yòʼ a dzə.»

⁵«Á wáa dù, e tòŋ sóŋ, é yí ghánén woŋ e dzə̀m. Á wáa fìʼtì e Juda, e kfə̀n fùŋ sá e Jerusalem ji NYÙY TÀR yoŋ a jii, ‹Á báʼtí, a nyeŋ, a dù e ŋkà se laʼ see vikum.

⁶Á túy á cícíwàr, é wú wáa dìn dzəə Sion[9]. Á wáa nyeŋ, e fíʼ bòy, lá wìr yòʼ a tiytíy. M wiy e mbvəərì fo mbìv yee kuy. Ŋgeʼ ye tavín yíi gbù.› »

⁷Ŋgaà wo wù wiy ji wun bvə́ʼə́y vitúm[10] fəə̀ ne, a wìy. Wù wiy moo bvərə̀ʼ wo wù fəən fo wun kileèmè. Wù màʼtì ne kirə́ʼ kfə́, a wìy ji wun laar nsay yen. Ŋkà se laʼ sén sí lo, e kfən e vifə̀m, é la wìr yòʼ dzə́ə a kùm fo.

⁸Bo dzə̀ ji vèn kúr vinsàʼ ve ndzə̀y ví, a toŋ, a dìy. Nyùy kù dzəə́ shwiiy kilòŋ vèsən áwune é ŋàŋ.

⁹NYÙY TÀR lò, e yòŋ jii, «Wíy lòo dzə e kishiíy fóo fèy, é tímé kpú fon wùn aàtǎr ntoʼo. Shilív shé atàá cù shi wíy tum, aàŋgàa ntum Nyùyi wíy a yàʼ.»

¹⁰M nèn shùsín jii, «Yímóy, NYÙY TÀR woo Taà Ndzə, rúrú, à bòʼtí ne wír veé Jerusalem ji woŋe yíi a dzə a nyaáŋ, wáa dzə lèn, a rə́r sí kér áwune fó asìʼ.»

¹¹Ghán see shooy si yíi gheén, aá wáa fìʼtì e wír veé Jerusaleme ji NYÙY TÀR yoŋ a jii, «Kinsəm ke biibí kí sí wiyì, kí wiy fo vitu ve agwan veé woʼ, e teè wír vém, a bó kí yòʼ wiy e njà shwer wo wú feési virə́ʼ feesín.

¹²Kinsəm ke kí wiy e Nyùy vitaaví kin ki dzə̀ kibiíbí. Dzə̀ mo woo NYÙY TÀR mo m wiy, e saʼ wír vém.»

¹³«Vèn leéy, e yèn, ŋgaà vibàn və̀ne, a wù wiy moo mbàʼ. *Viténtén vév vé rər ví wiy moo kiìkir bèy. Nyám sév sé ŋkoʼ si féŋ kinyeŋ, shaa lùŋ wo wiy. Ŋgeʼ si nə̀ə́ ne vèsən, vèsən kù lày ne bèn.

¹⁴Éè Jerusalem, vèn su vinyo ve bi ví fo věn meliv, e fíʼ lùŋ. Vèn wíy keerí kwaʼtì ye bií ben, e wìy dù, e meé e le?

¹⁵Vé ntume wiy fo Dan, e mbìv yee kuy. Á fiʼtì ŋgeʼ ye biibí fó agwan veé Efrayim.

¹⁶Á yoŋ jii, ‹Á ku yiì, é vitúm vi kiíy. Á ku fìʼtì e Jerusalem ji aŋgàa laàri waà wiyì. Áwune lò ne fo vitum vee kwaʼda, a wìy. Á wiy, búʼ shirəə́ she rər kùm ŋkà se laʼ seé Juda.

¹⁷Á yíi gìm Jerusalem, e tar mo vé shìyi gìm kwáʼ.› Kù dzə̀ bìʼ fo Jerusalem tavin kitú vèr áwune. Suuy mo woo NYÙY TÀR.

¹⁸Yii yé ye bií wìy ne e vinyo vìn vi e wò kitu. Jerusalem, liì wò kisaŋ wày ne wò e lòn. Kù dzə̀ seʼ vinyò vé ve bi ví, a wù bìr é ŋàŋ. Wù sòv ne wò a dzə̀ é shiliv.»

¹⁹Éè mò, nyár yémé ghàʼ ne, a yòʼ dzə̀ m kùʼtí. Nyár ye yí dzəə̀n e mǒ shiliví dzə̀ féyì. Shilív shém shí búʼ e ŋàŋ féyì. Yòʼ dzə̀ m gòʼ kisə́sə. M yú mo sóŋé súŋninè, yú, a leŋ rərí wiyì.

²⁰Ŋgeʼ wiy, bátir yìmòʼ. Woŋ və̀ne bvə̀ʼə́m ne e dzə̀m. Á lò ne, e sàʼày táv sér, e sàtì ndzə̀y sə́ e vinsàr vinsàr.

²¹M kù wíy gòʼ, a yen cícíwàr rər vən, e gòʼ, a yu kiléŋléŋ ké sǒŋ rər kin bèn, e dù, e meé e le?

²²Wír vémé dzə̀ viyúŋ, aá yòʼ kì mo. Áwune dzə̀ vinjìŋ ve won, aá yòʼ kì vinyo. Áwune dzə̀ anjàn yiì ye bií, aá dzə̀ anjìʼ yiì ye juŋe.

²³M lèéy ne kitú ke nsay, e yèn a kí dzə̀ kilàsir, a dzə ji nə̀ʼkìkì, e lèéy yúv, e yèn a wú sə́n sənén ji cùm.

²⁴M lèéy agwan, e yèn, aá səʼsì, e yèn, aàŋkoŋe shaasìnè.

²⁵M lóo leéy, e làa yòʼ kfə̀n yen wír, e yèn sá, a menə́n meé yuv medzə̀m mè féŋkír ne.

²⁶M kfən yèn, a nsay ye juŋ ló ne, e dù ji wóʼ, a ŋkà se laʼ see fó si sì é vifə̀m, a kù yii dòʼshwiiy NYÙY TÀR woó ŋàŋ.

²⁷Ke NYÙY TÀR suuy ki dzə̀ jii, «Nsay yíi a dzə e laarìn e dzə̀m, yii bèy, a bó m yòʼ yíi laàr e dzə̀m ŋkuuŋkùŋ.

²⁸Nsay kù yíi a dìy, é yúví wáa sən sənén. M sùúy ne bèn, a bó yòʼ dzə̀ kí kfə̀n kùvsín. M wày wáyín féyì, a bó yòʼ dzə̀ m kfə̀n lèéy bám.»

²⁹Vé nyàm se ŋkoʼ wùn à vé kintee yíi koʼór ŋkèŋ, é wíri sám fó ŋkà se laʼ sidzə̀m. Aámóʼó léʼ, e tòkír e kòv sí, aámóʼó kóʼ é vilála. Ŋkà se laʼ sidzə̀m si yíi kfən sighá, é la wìr yòʼ kfə̀n a dzə fo.

³⁰Éè Jerusalem, à kwaʼ ji à yii a dzə̀ ka, aá sí lo, e bvəʼə́y wò? À wáyri wún e ndzə̀y se baar seé kilùm si, wáyri wún e vifá ve sùsù vee *kisha ke mbàm ke baar kí ji ka? À shim sí yé e kinshìm ki bìʼ ka? À náŋsin wún wó kisáŋ. Aŋgàa viŋkar vée ŋwày ne wò. Á taʼ e laàr a dzə̀ dzəʼə̀m yé.

³¹M yú tóŋ moo yé wiíy wo wù lúm wán. M yú dzəm moo yé wiíy wo wù jonsì wán və mfùmèn. Dzə̀ tóŋ ŋgònjuù yee Sion, mo yì yoysìnè. Yì ramsì kiwó, suuy jii, «Lòné shòv ne mo. M gbù ne e vé kinjuyrìí wo, aá sí lo, e yuy mo.»