Read Lamnso Jeremia 40 Bible Online

Jeremia 40 - Lamnso bible

Jeremia 40

¹Vé‑eè koò Jeremia, e kùr áàsháŋé, e dù sho e Rama, fo vé‑eè du e wír veé Jerusalem wùn à veé Juda ve wír veé Babilone‑eè koóri ji á du sho e Babilon. Nebusaradan woo mfòóme anshìy fòn nèn wìy, e bòyìr Jeremia fo fo. Wáa dzə e ghan fen, NYÙY TÀR kfən lò, e sùŋnín e Jeremia, e tiìsí ntum rə shó.

²Nebusaradan‑eè bòyìr Jeremia bèy, e jàŋ, e sùúy sho jii, «NYÙY TÀR woo Nyùy wò‑oò sùúy ne ji ŋgeʼ sìn si yíi wìy a e wòŋàn.

³Wù wìy ne sho, kù mo wù‑uù suuyin. A vinyo vìn vidzə̀m vi kòóy bèn, a dzə̀ bìʼ fo vèn jayin e NYÙY TÀR, e tèn fó a yunén wun.

⁴E ké lèn ki, m sí bvər asháŋ fo wò koy. A dzə̀ à wìy, é wòsò wáa dù e Babilon, é m du, a leéy fo wò, aà bèn koŋè. Yii bèy, a kí dzə̀ e làa yòʼ gheén wò, lá à yòʼ wìy. A dzə̀ à wàa dù fo à yenen fóo gheén wò, wóŋe néŋ e wò si tèéter.

⁵Aà koŋ, e gòʼ fèn, bo dzə̀ à wàa kfən, e yèn Gedalia wo tàr wov dzəə̀n Ahikam woo wan Shafan. Fòn woó Babilon lèm ne wun ji wù wáa saʼ ntèʼ seé Juda. Ku dù, é vèn áwune wáa dzə. Kí búŋ fó bèy, à wàa dù rì fo à kòŋèn.» Wù yòŋ bèy, e nèn fò viyíkìr sho, e kfə̀n fò wun afómo, wù wáa dù.

⁶Jeremia nèn dù e Mispa, e yèn Gedalia woo wan Ahikam, wùn áwune, à wír ve vé‑eè berin é nsay Judàa wáa dzə.

⁷Amfòómé rər adzə̀m wùn à vé rər ve á yòʼ‑oò ló ne fò shiŋkfə́ŋe yú ji fòn woó Babilon kòʼór ne a wan Ahikam woo Gedalia ji wù wáa saʼ a woŋ. Wù lèm ne a wir dzə̀m wo bó á yòʼ‑oò lo koò, e dù sho e Babilon e wun sar, à vilum, à vikìy, à wóné, a kù dzə̀ aghéʼncey veé nsay foo fèy.

⁸Amfòómé víne yú bey, e nèn dù e Mispa, e yèn Gedalia fo. Áwune‑eè dzə̀ jii, Ishmael woo wan Netania, Johanan wùn Jonatan vee wón Karea, wùn à Serayia woo wan Tanhumet, à wón Efay woo wír woó Netofàa, e bóo lì Jesania woo wír woó Maaka, wír wùn à wír véví.

⁹Gedalia woo wan Ahikam, a tàr à tàr wov dzə̀ Shafan nèn sùŋnín aáwune wùn à e wír véví, e kàn yír Nyùy, e sùúy jii, «Lá vèn yòʼ a fàn fó a lìm fo wír veé Babilone. Vèn wáa dzə e nsay fèn, a lìm fo fòn woó Babilon, é kinyo kén kidzə̀m ki wáa ghan kijuŋ.

¹⁰A dzə̀ fo kém kí, bo m yíi a dzə e Mispa fèn, e lì kirə́ʼ kén e wír veé Babiloné si, ve á wíy a wìy, a yen ver. Á bèy, fo kén kí, vèn kú a dzə e ntèʼ se á foon e vèn, a baʼtí meluʼ, a kòy vicí ve ví koomen e lùm, a naá meŋgvə́r mè, a lèm.»

¹¹Wír veé Juda adzə̀m ve á dzə́ e Moav, à ve á dzə́ e Ammon, à ve á dzə́ sa e Edom, e lì ve á dzəə̀n é vitum vímóʼ vií yú ji fòn woó Babilon lèm a wíri é Juda, e shòʼ á Gedalia ji wù wáa saʼ a áwune.

¹²Á yú bey, e nèn kfə̀nkír fo virə̀ʼ vidzə̀m fo vé‑eè jùmèn áwune, á dùkìr. Áwune nèn wìy e Mispa, e yèn Gedalia fo. Á wìy bèy, e nèn bàʼtí meluʼ, e kòy vicí ve ví koomen e lùm, kifá kidzə̀m ki wáa dzə kigháʼán.

¹³Wáa dzə e kishiíy kímóʼ kí, Johanan woo wan Karea wùn aàmfòómé rər ve á yòʼ‑oò ló ne fò shiŋkfə́ŋe wìy e Mispa, e yèn Gedalia fo,

¹⁴e yòŋ sho jii, «À kì ji Baalis woo fon Ammon tùm ne Ishmael woo wan Netania ji wù laar wò a?» Yii bèy, la Gedalia yòʼ a biimé kinyo ke áwune suuyì.

¹⁵Johanan nèn sə̀mrì e Gedalia jii, «Màʼtì, é m du, e yùyrí Ishmael, é la wìr yòʼ kìíy. Á maʼtì ji wù laar wò, é wír veé Juda adzə̀m ve á kaarin wòo táʼrí, é wír vìn ve á berin é Judàa lay a?»

¹⁶Yii bèy, Gedalia woo wan Ahikam bìnèr e Johanan woo wan Karea jii, «Lá à yòʼ yiì kfə́ə kinyò kee ben. M yòʼ yén ji kinyo ke à suuy kùm Ishmael ki dzə̀ á rú.»