Read Lamnso Jeremia 43 Bible Online

Jeremia 43 - Lamnso bible

Jeremia 43

¹Jeremia màysì ntum sidzə̀m se NYÙY TÀR woo Nyùy wov‑iì tumen wun sho, e tiìsí e wìr dzə̀m.

²Mo wù màysìn, Asaria woo wan Hoshayia wùn à Johanan woo wan Karea, à vimbaa ve wìr vímóʼ ví vidzə̀m vi nèn sàyín e Jeremia wùn jii, «À bóʼti a dzə̀ kimboʼtì. Bó NYÙY TÀR woo Nyùy wor yoʼ tùm wò ji à wiy, e yòŋ ji lá vèr yòʼ dù, a dzə e Ejiv.

³Bàyír Baruk woo wan Neria wò e věr bàm ji à wiy, e fíʼ way ver e wír veé Babiloné wo, aá yúy, kìn aá koórí ver, e dù sho e Babilon.»

⁴Á bèy, Johanan wùn aàmfòómé rər adzə̀m, à kibér ke wìr ki nèn tèn fó yu kinyo ke NYÙY TÀR suuyin ji á goʼ á e nsay Juda.

⁵Johanan wùn aàmfòómé rər adzə̀me ku nèn kùúy kibér ke wìr keé Juda kidzə̀m, à wír ve vé‑eè kfənkin fó vitum, fo vé‑eè jùmèn, á dùu.

⁶Vé‑eè lì sá vilum adzə̀m, à vikìy, à wóné, à wón ntoʼ vee vikìyí, ve Nebusaradan woo mfòóme anshìy fòn woó Babilon‑eè lèmèn e Gedalia, wo tàr wov dzəə̀n Ahikam woo wan Shafan. Á kfən lì sa Jeremia woo *ŋgaà ntum Nyùy wùn Baruk woo wan Neria.

⁷Áwune‑eè ŋwày sáʼ NYÙY TÀR, e dù e nsay Ejiv, e nèn a dzə e mvə̀mlaʼ yee Tapanes.

⁸NYÙY TÀR súŋnín e Jeremia, aá dzə̀ é Tapanes jii,

⁹«Lì tíy ye faŋkìné, e wàyrí e mvə̀m nsay, e sar dzəə ye fiìn,[49] ye yì nəə e Farao ntoʼ yeé Tapanes. Kú a wayrí, a wír veé Judàa yéné.

¹⁰Suúy aáwune ji NYÙY TÀR woo Taà Mànjòŋ, wun woo Nyùy wìr veé Isray suuy a jii, ‹Vèn leéy, e yèn, m yíi wìy e ŋgaà lìm wom woo Nebukadnessar woo fon woó Babilon, e tuúy kàvàʼ və é kitu ke tiy ye m yòŋèn, á wáyrí rən, é wù tám kibeey kfə́ ké vifòn e kitu wo.

¹¹Wù wíy wìy, e laàr Ejiv, a wír ve kév kí dzəə̀n ji á kpú a dzə̀ kifə̀ʼə wíy kpu kifə̀ʼ, ve kév kí dzəə̀n ji á koó ji akwàn, aá koórí, ve á kì wíy kpu e shùu rər, aá kpú rə́r.

¹²Fòn Nebukadnessar wíy tònrì lav se wír veé Ejivi yii cu anyùy sho. Wù wíy tònrì fó, e kuúy anyùy vév, e dù sho. Wù wíy yèr nsay Ejiv, é la kifá ki yòʼ bèr, kù mo gày kìv menser fo vifam. Wù yerì, é wù fəə́ fó fo kicaárín là kinjivìr.

¹³Wù wíy bvəʼtí sə́y seé virə̀ʼ vé anyùy se sí dzəə̀n é Heliopolis e nsay Ejiv, e tònrì lav se cù se anyùy veé Ejiv.› »